មហាសាមគ្គីជនជាតិ គំរូក្នុងសហគមន៍

25/02/2026 - 06:40

អ្នកមានប្រិយភាពគំរូ

ពេលរំលឹកដល់លោកសើុងគាង នៅភូមិត្រាយ៉ ឃុំឡឹមតឹង ទីក្រុងកឹងធើ បងប្អូនខ្មែរគ្រប់រូបសុទ្ធស្គាល់និងកោតសរសើរយ៉ាងខ្លាំង។ ដ្បិតថា គាត់មិនត្រឹមតែជាអ្នកឧស្សាហ៍ព្យាយាម ស៊ូទ្រាំលំបាកក្នុងការប្រកបការងារចិញ្ចឹមជីវិត ដើម្បីជីវភាពគ្រួសារធូរធារប៉ុណ្ណោះទេ ថែមទាំងជាបុគ្គលគំរូ មានការរួមចំណែកយ៉ាងសកម្មក្នុងការកសាងភូមិស្រុកទៀតផង។

លោកសើុងគាងទទួលបានប័ណ្ណសរសើររបស់រដ្ឋមន្រ្តី ប្រធានគណៈកម្មាធិការជនជាតិ។

រស់នៅក្នុងគេហដ្ឋានយ៉ាងសមរម្យ លោក សើុងគាង បានបង្ហាញទឹកមុខរីករាយចំពោះសមិទ្ធផលដែលសម្រេចបាន។ ក្រៅពីផ្ទះ លោកគាងនៅទាំងមានដីស្រែជាង ៣ ហិកតា ព្រមទាំងមានទម្រង់ចិញ្ចឹមជ្រូកនិងគោរាប់សិបក្បាល។ លោក គាង ឱ្យដឹង៖ “ពេលរៀបការដំបូង ឪពុកម្តាយចែក ដីស្រែឱ្យបាន ៦ កុង និងដីធារសម្រាប់សង់ផ្ទះ ដូច្នេះ ខ្ញុំក៏បានកែប្រែដីជុំវិញផ្ទះដើម្បីដាំបន្លែ ចិញ្ចឹមជ្រូក និងបិតស្រាលក់ដើម្បីរកប្រាក់ចំណូល។ ខ្ញុំគិតថា រស់នៅតំបន់ជនបទ លុះណាមានដីស្រែច្រើន ទើបអាចធ្វើជាអ្នកមានបាន”។

ជាមួយនឹងរបៀបគិតបែបនេះ លោកគាងបាន បន្តផលិតស្រូវ ដាំបន្លែ ចិញ្ចឹមជ្រូកនិងបិតស្រា។ ប្រាក់សន្សំបានមកទាំងប៉ុន្មាន គាត់យកទៅវិនិយោគ លើការជួលនិងទិញដីស្រែបន្ថែម រហូតធ្វើឱ្យជីវភាពកាន់តែធូរធារឡើងជាលំដាប់។ លោកគាង ឱ្យដឹងបន្ថែម៖ “បិតស្រាផ្សំការចិញ្ចឹមជ្រូកគឺជួយបន្ថយចំណាយឱ្យចំណីជ្រូកហើយជ្រូកឆាប់ធំ ធាត់ទៀតផង។ ក្នុងមួយឆ្នាំ ខ្ញុំចិញ្ចឹមជ្រូកបាន ៣ លើក រៀងរាល់៣ខែខ្ញុំលក់ម្ដង បានពី២០ ទៅ ៣០ ក្បាល។ ទម្ងន់មួយក្បាលជាង ១០០ គីឡូក្រាម រកបានប្រាក់ចំណេញជាមធ្យមពី ២ ទៅ ៣ លានដុងក្នុងមួយក្បាល។ ក្រៅពីនេះ ខ្ញុំថែមទាំងធ្វើឡឧស្ម័ន ដើម្បីកុំឱ្យប៉ះពាល់ដល់បរិស្ថានផងនិងមានហ្គាសសម្រាប់ប្រើប្រាស់ក្នុងគ្រួសារផង។ អាស្រ័យធ្វើការរកស៊ីមានប្រសិទ្ធភាពនិងសន្សំសំចៃ រហូតមកទល់ពេលនេះខ្ញុំមានដីស្រែ ៣០ កុង”។ មិនត្រឹមតែប៉ុណ្ណោះ លោកគាង នៅបន្តវិនិយោគលើការចិញ្ចឹមគោពូជបង្កាត់ស៊ីន ដើម្បីបង្កើនប្រាក់ចំណូលសម្រាប់គ្រួសារ។ ជាច្រើនឆ្នាំមកនេះ គាត់បានបន្តការចិញ្ចឹមគោពី៥ ទៅ៦ក្បាល។ ថ្មីៗនេះ គាត់ទើបលក់គោ ៣ ក្បាល រកបានប្រាក់ចំណេញជាង ៥០ លានដុង។

មិនត្រឹមតែពូកែខាងធ្វើសេដ្ឋកិច្ចប៉ុណ្ណោះទេ លោកគាង ថែមទាំងចិញ្ចឹមកូន ២ នាក់ឱ្យរៀនសូត្របានចប់ចុងចប់ដើម មានការងារធ្វើ រកបានប្រាក់ចំណូលលំនឹងទៀតផង។ ជាច្រើនឆ្នាំមកនេះ ក្នុងតួនាទីជាអ្នកមានប្រិយភាព លោកគាង នៅទាំងបានចលនាមាមីងខ្មែរឱ្យអនុវត្តល្អតាមគោលការណ៍ គោលនយោបាយរបស់បក្សនិងច្បាប់របស់រដ្ឋ ព្រមទាំងចូលរួមបរិច្ចាគដីដើម្បី កសាងផ្លូវជនបទ រក្សាអនាម័យបរិស្ថាន ដាំផ្កា និងរួមចំណែកជាថវិកាសម្រាប់ដំឡើងអំពូលភ្លើង បំភ្លឺផ្លូវជនបទ។ល។ ដើម្បីកសាងភូមិស្រុកឱ្យមានភាពស្អាតនិងស្រស់បំព្រង។

លោក លីវទ្រិញហ្វី ប្រធានការិយាល័យវប្បធម៌ និងសង្គមឃុំឡឹមតឹង ឱ្យដឹង៖ “លោកសើុងគាង ជាអ្នកមានប្រិយភាពគំរូ ចូលរួមយ៉ាងសកម្ម ក្នុងការចលនារបស់ភូមិភាគ។ មិនត្រឹមតែពូកែខាងធ្វើសេដ្ឋកិច្ចប៉ុណ្ណោះទេ លោកគាង ថែមទាំងអនុវត្តតួនាទីយ៉ាងល្អក្នុងនាមជាស្ពានតភ្ជាប់រវាង បក្ស រដ្ឋអំណាចជាមួយប្រជាជន និងចូលរួមសម្រុះសម្រួលដោយជោគជ័យករណីវិវាទក្នុងគ្រួសារជម្លោះដីធ្លី និងសុវត្ថិភាពចរាចរណ៍។ល។ នៅឆ្នាំ ២០២៣ លោកសើុងគាង បានទទួលប័ណ្ណសរសើរពីរដ្ឋមន្ត្រី ប្រធានគណៈកម្មាធិការជនជាតិ អំពីស្នាដៃឆ្នើមក្នុងការងារជនជាតិនិងគោលនយោបាយជនជាតិរបស់បក្សនិងរដ្ឋ”៕

យ្វីអាញ់-ដាលីន

ចែករំលែកអត្ថបទ

ពាក្យគន្លឹះ