បង​ស្រី​លី​ធី​អ៊ុក  នៅ​ភូមិ​មណ្ឌល​២ ឃុំ​ថាញ់​ភូ ស្រុក​ម៉ី​ស្វៀង ខេត្ត​សុក​ត្រាំង ខិត​ខំ​​ឧស្សាហ៍​ព្យា​យាម ពល​កម្ម​ផលិត​និង​ប្រឹត​សំ​ចៃ ដើម្បី​គ្រួ​សារ​ឈាន​ឡើង​ចាក​ផុត​ពី​ភាព​ក្រី​ក្រ។ បច្ចុប្បន្ន ដោយ​ភាព​ប៉ិន​ប្រ​សប់​ក្នុង​ការ​គិត​គូរ​រក​ទទួល​ទាន​ ម្ល៉ោះ​ហើយ​ជីវ​ភាព​គ្រួ​សារ​បង​កាន់​តែ​មាន​ភាព​ធូរ​ធារ​ឡើង​។

ស្នាម​ញ​ញឹម​របស់​បង​ស្រី​លី​ធី​អ៊ុក​ (ខាង​ស្ដាំ​ដៃ) រីក​រាយ​ក្រោម​ដំ​បូល​ផ្ទះ ថ្មី​ដែល​ប្ដី​ប្រ​ពន្ធ​បង​សាង​ឡើង​។

សម្លឹងឃើញផ្ទះឥដ្ឋរបស់បងស្រីលីធីអ៊ុក សាងសង់បានសមរម្យដូចនេះ គ្មានអ្នកណានឹកស្មានបានថាកាលពីមុន ប្ដីប្រពន្ធបងជាអ្នកដើរស៊ី ឈ្នួលជួលព័ទ្ធនោះទេ។ តាមប្រសាសន៍បងស្រីអ៊ុក ប្ដីប្រពន្ធបងតាំងពី រៀបការមកដឹងតែពីដើរធ្វើការឈ្នួល ដូចជា ឆ្លូកស្ទូង ដកស្មៅ ច្រូកកាត់ ជាដើមអស់ការងារនៅភូមិស្រុក ក៏បណ្ដើរគ្នាទៅរកការងារធ្វើនៅក្រៅខេត្ត។ ខណៈពេលរដ្ឋជំនួយផ្ទះតាមសេចក្ដីសម្រេច១៦៧ និងឧបត្ថម្ភ បុលទុនអាទិភាព បងស្រីលោះបានដីស្រែ១កុងដែលឪពុកម្ដាយចែកឲ្យហើយក៏ប្ដេជ្ញាចាកផុតពីភាពក្រីក្រ។ បងអ៊ុករៀបរាប់ "ឆ្នាំ២០១២ នៅ ពេលរដ្ឋជំនួយឲ្យបុលមានដើមទុន ខ្ញុំចាប់ផ្ដើមដាំដំណាំ ដូចជា ម្រះ ត្រសក់ ស្ពៃជាដើម ដើម្បីឆាប់បានប្រមូលផល។ ប្ដីប្រពន្ធខ្ញុំរួចពីកិច្ចការងារផ្ទះក៏ទៅធ្វើការឈ្នួល ដើម្បីរកប្រាក់ចំណូលលំនឹងជីវភាព"។ ធ្វើរកបណ្ដើរប្រឹតសំចៃបណ្ដើរ បងសន្សំទិញបានជ្រូកមកចិញ្ចឹម។ បងស្រីអ៊ុក ឲ្យដឹងបន្ថែម៖ "ក្នុងការដាំដំណាំ ខ្ញុំលៃលកពេលវេលាដាំឲ្យខុសរដូវកាល  ទើបលក់បានថ្លៃគិតជាមធ្យមក្នុងមួយរដូវ ខ្ញុំអាចរកបានប្រាក់ចំ ណូលពី១៥ ដល់២០លានដុង(មួយឆ្នាំដាំ៣រដូវ) ។ មានដើមទុន ខ្ញុំវិនិយោគចិញ្ចឹមជ្រូកមេសម្រាប់លក់កូន ជាធម្មតាមេជ្រូកកើតកូនពី ១០ ដល់១២ក្បាល ខ្ញុំលក់៦ក្បាល (តម្លៃ១,៣លានដុង/ក្បាល) ទុកចិញ្ចឹម ៦ ក្បាល។ សន្សែសន្សំទិញមាសទុកសម្រាប់ជួលស្រែធ្វើ"។ ក្រោយរយៈពេល៤ឆ្នាំ ដាំដំណាំធ្វើស្រែ និងចិញ្ចឹមសត្វគ្រួសារបងអ៊ុកជួលបានដី ស្រែ១៣កុងសម្រាប់ធ្វើស្រូវ។ ផ្ដើមពីនោះ ជីវភាពគ្រួសារ បងស្រីកាន់តែធូរធារឡើង។

បងស្រីលីធីធ្វី ប្រធានភូមិមណ្ឌល២ ឲ្យដឹង ៖ "មុននេះគ្រួសារបងអ៊ុក គឺ ជាគ្រួសារក្រីក្រ ប៉ុន្តែគាត់ប្រឹងប្រែងធ្វើការរកទទួលទានខ្លាំងណាស់។ តាំងពីមានដើមទុន ជំនួយរបស់រដ្ឋ ប្ដីប្រពន្ធបងគិតគូរពង្រីកសេដ្ឋកិច្ច រហូតឈានឡើងចាកផុតភាពក្រីក្រ។ សង្កេតឃើញប្ដីប្រពន្ធគាត់ឧស្សាហ៍ព្យាយាមរកទទួលទាន ក្រៅពីធ្វើស្រែ ដាំដំណាំ ចិញ្ចឹមជ្រូក បងអ៊ុក នៅចិញ្ចឹមគោបង្កាត់ស៊ីន ហើយនៅពេលទំនេរទៅធ្វើការឈ្នួលដើម្បីរកប្រាក់ចំណូលបន្ថែម អាស្រ័យហេតុនេះ ទើបមាមីងនៅទីនេះអ្នកណាក៏ស្ងើចសរសើរនិងស្រឡាញ់រាប់អាន។ បងស្រីអ៊ុក ជាស្រ្ដីគំរូមួយរូបក្នុង ការអភិវឌ្ឍន៍សេដ្ឋកិច្ចគ្រួសារ ដើម្បីបងប្អូននារីក្នុងភូមិរៀនសូត្រយក តម្រាប់តាម "៕

លីធាន-ពេជ្រសឿន