គោលនយោបាយ -ការរស់នៅ គោលនយោបាយ

18/08/2015 - 08:54

មុខមាត់ថ្មីនៃស្រុកឡុងភូ

ស្រុកឡុងភូ ខេត្តសុកត្រាំង មានជនរួមជាតិខ្មែររស់នៅជាង២៨,៥%។ ការវិនិយោគទុនរបស់បក្សនិងរដ្ឋ ក្នុងរយៈពេលកន្លង បានជួយឲ្យស្រុកឡុងភូ មានការរីកចម្រើនខាងហេដ្ឋារចនាសម័្ពន្ធសេដ្ឋកិច្ច-សង្គមកិច្ចរបស់ស្រុកកាន់តែរីកចម្រើន។

ផ្លូវគមនាគមន៍ជនបទរបស់ស្រុកសុទ្ធតែក្រាលបេតុង រួមចំណែកក្នុងការអភិវឌ្ឍន៍សេដ្ឋកិច្ច-សង្គមកិច្ច។

តាមប្រសាសន៍ លោកគឹមហែន ប្រធានគណៈកម្មាធិការប្រជាជន ស្រុកឡុងភូ ឲ្យដឹង៖ រយៈពេល៤ឆ្នាំកន្លង ស្រុកកៀរគរទឹកប្រាក់បានជាង៩៩ពាន់លានដុង ដើម្បីវិនិយោគទុនកសាងហេដ្ឋារចនាសម័្ពន្ធសំខាន់ៗជាង២០០សំណង់ បង្កលក្ខណសម្បត្តិឲ្យការអភិវឌ្ឍន៍សេដ្ឋកិច្ច-សង្គមកិច្ចលើភូមិសាស្រ្ត។ មកទល់ពេលនេះ ប្រព័ន្ធគមនាគមន៍ជនបទធារាសាស្រ្ត អគ្គិសនី ទឹកប្រើប្រាស់អគារសិក្សាដំណាក់សុខាភិបាល ។ល។ ជាសារវ័ន្តបម្រើការបានល្អសម្រាប់ការបង្កបង្កើនផលនិងប្រើប្រាស់របស់ប្រជាជន។ បច្ចុប្បន្ន ការអភិវឌ្ឍន៍ឃុំដាយង៉ាយឲ្យទៅជាទីប្រជុំជនត្រូវបានរដ្ឋាភិបាលផ្តល់សច្ចាប័នរីឯឃុំត្រឿងខាញ់ ត្រូវបានទទួលស្គាល់ជាឃុំសម្រេចលក្ខឋានទីក្រុងប្រភេទV។

ឧត្តមភាពរបស់ស្រុកឡុងភូ នោះគឺបង្កបងើ្កនផលកសិកម្ម សំខាន់គឺដំណាំស្រូវម្ល៉ោះហើយរយៈពេលកន្លង ស្រុកបានផ្តុំកម្លាំងបង្កើនប្រព័ន្ធធារាសាស្រ្តជំរុញយ៉ាងខ្លាំងក្លានូវការផ្ទេរជូនវិទ្យាសាស្រ្តបច្ចេកទេស ប្រើពូជដំណាំថ្មីៗសម្រាប់បង្កបង្កើនផល កសាងវាលស្រែធំ; អនុវត្តបានល្អនូវគ្រោងការយន្តកម្មក្នុងការប្រមូលផលស្រូវ។ល។ អាស្រ័យហេតុនោះ ទិន្នផលនិងបរិមាណផលដំណាំ សត្វចិញ្ចឹមនៅលើភូមិសាស្រ្តស្រុក ពីមួយថ្ងៃទៅមួយថ្ងៃកាន់តែកើនឡើងជាលំដាប់។ ពិសេសគឺផ្ទៃដីផលិតស្រូវរបស់ស្រុកចំនួន១៥.៥០០ហិកតា មានតម្លៃផលិតកម្មជាមធ្យមភាគសម្រេចជាង១២៧លានដុង/ហិកតា/ឆ្នាំ លើសផែនការនៃសេចក្តីសម្រេចជាង៥៨,៧% និងកើនទ្វេដងបើធៀបជាមួយនឹងឆ្នាំ២០១០។ ពូគឹមជីថៀង នៅភូមិបឹងធំ ឃុំឡុងភូ ស្រុកឡុងភូ ឲ្យដឹង៖ "ដោយសារមានផ្លូវគមនាគមន៍ជនបទចុះដល់ភូមិស្រុក មានប្រឡាយនាំទឹកសាបសម្រាប់បង្កបង្កើនផលខួបប្រាំងវស្សា ម្ល៉ោះហើយកសិករផលិតស្រូវបាន៣រដូវ/ឆ្នាំ។ ក្នុងការបង្កបង្កើនផលទៀតសោត ភាគច្រើនមាមីងកសិករសុទ្ធសឹងអនុវត្តវិទ្យាសាស្រ្តបច្ចេកទេសក្នុងការផលិតជ្រើសរើសពូជស្រូវអតិផល មានដូច៖ ST; OM49000; RVT។ល។ ជាពូជផ្តល់ទិន្នផលនិងគុណភាពខ្ពស់ បានជាជីវភាពរបស់កសិករខ្មែរពីមួយថ្ងៃទៅមួយថ្ងៃកាន់តែធូរធារគ្រាន់បើ"។

អស់រយៈពេល៤ឆ្នាំអនុវត្តការកសាងជនបទថ្មី បច្ចុប្បន្ន នៅលើភូមិសាស្រ្តស្រុកមានឃុំត្រឿងខាញ់គឺជាឃុំមានជនរួមជាតិខ្មែររស់នៅកុះករដំបូងត្រូវបានទទួលស្គាល់ជាឃុំសម្រេចបទដ្ឋានជនបទថ្មី។ រីឯឃុំតឹងថាញ់ បានសម្រេចលក្ខឋានជនបទថ្មីទាំង១៩លក្ខឋាន ឃុំឡុងឌឹក សម្រេចបាន១៥លក្ខឋាន ឃុំដទៃពីនោះសុទ្ធតែសម្រេចបានពី១១ដល់ ១៣លក្ខឋាននៃឃុំជនបទថ្មី។ លោកគឹមហែន គូសបញ្ជាក់៖ "មុខមាត់ជនបទនៅស្រុកឡុងភូ ពីមួយថ្ងៃទៅមួយថ្ងៃកាន់តែរីកចម្រើន ជីវភាពសម្ភារៈស្មារតីរបស់ប្រជាជននៅទីនេះ ត្រូវបានលើកស្ទួយហេដ្ឋារចនាសម័្ពន្ធជនបទមានការអភិវឌ្ឍន៍។ល។ នេះគឺជាគ្រឹះធារដើម្បីស្រុកឡុងភូ ឈានឡើងអភិវឌ្ឍជាងទៀតក្នុងរយៈពេលខាងមុខ"៕

យ្វីអាញ់-លីសៀ

ចែករំលែកអត្ថបទ

ពាក្យគន្លឹះ