ព្រឹត្តិការណ៍ - នយោបាយ ព្រឹត្តិការណ៍

03/09/2026 - 21:31

កិច្ចប្រជុំបង្កើតសហករណ៍វប្បធម៌ - ទេសចរណ៍ - សិល្បៈយៀងតៀង

រសៀលថ្ងៃទី៣ ខែកញ្ញា នៅឃុំធ្វឹងហ្វា ទីក្រុងកឹងធើ គណៈកម្មាធិការប្រជាជនឃុំធ្វឹងហ្វាបានចាត់តាំងកិច្ចប្រជុំបង្កើតសហករណ៍វប្បធម៌ - ទេសចរណ៍ - សិល្បៈយៀងតៀង អាណត្តិកាល ២០២៦-២០៣០។

អ្នកតំណាងទាំងឡាយចូលរួមកិច្ចប្រជុំ។

ក្នុងកិច្ចប្រជុំនេះ អ្នកតំណាងទាំងឡាយបានស្តាប់ការអនុម័តលើសេចក្តីព្រាងលក្ខន្តិកៈ ផែនការសកម្មភាព ចងក្រងវណ្ណកម្ម ធ្វើអាជីវកម្មសេវាកម្ម សេចក្តីសម្រេចចិត្តនិងបញ្ជីសមាជិកចូលរួមសហករណ៍វប្បធម៌ - ទេសចរណ៍ - សិល្បៈយៀងតៀង។ យោងលើស្មារតីប្រជាធិបតេយ្យ សមាជិកទាំងឡាយបានផ្តោតពិភាក្សា ចូលរួមមតិយោបល់និងអនុម័តិឯកភាពលើខ្លឹមសារសំខាន់ៗដើម្បីសហករណ៍ចូលដំណើរការ។ កិច្ចប្រជុំក៏បានបោះឆ្នោតជ្រើសរើសមុខតំណែងនាយកនិងសមាជិកត្រួតពិនិត្យសហករណ៍ អាណត្តិកាល ២០២៦-២០៣០ សំដៅអនុវត្តភារកិច្ចគ្រប់គ្រង ដឹកនាំសកម្មភាពសហករណ៍តាមបទបញ្ញត្តិ។

កម្មវិធីសិល្បៈអបអរសាទរពិធីបើកកិច្ចប្រជុំ។

ក្រោយពីកិច្ចប្រជុំ ក៏បានឯកភាពនិងបោះឆ្នោតជ្រើសរើសសមាជិកជាផ្លូវការចំនួន៩នាក់និងសមាជិកចងសម្ព័ន្ធមិនរួមទុនចំនួន៣១នាក់ ដោយមានវិសាលភាពសកម្មភាពនៅក្នុងនិងក្រៅភូមិឋានឃុំធ្វឹងហ្វា។ ក្នុងនោះ លោកស្រី សើងធីយ៉េវ ត្រូវបានបោះឆ្នោតជ្រើសរើសកាន់តំណែងនាយកសហករណ៍អាណត្តិកាល ២០២៦-២០៣០។

សហករណ៍វប្បធម៌ - ទេសចរណ៍ - សិល្បៈយៀងតៀង ជាប្រភេទទម្រង់សកម្មភាពនៃសមាសភាគសេដ្ឋកិច្ចសមូហភាព។ សហករណ៍បានបង្កើតឡើងជាមួយទិសដៅអភិវឌ្ឍទេសចរណ៍អេកូឡូស៊ីផ្សារភ្ជាប់នឹងការអភិរក្សនិងពង្រីកតម្លៃវប្បធម៌ប្រវេណីរបស់ភូមិភាគ។ តាមរយៈនោះ ប្រមូលផ្តុំធនធាន ជាជំហានៗធ្វើឱ្យសុក្រឹតផលិតផល សេវាកម្មទេសចរណ៍ លើកកម្ពស់តម្លៃផលិតផលប្រវេណី បង្កការងារធ្វើនិងមុខរបរចិញ្ចឹមជីវិតប្រកបដោយចីរភាពសម្រាប់ប្រជាជន។ សហករណ៍បានរំពឹងទុកថា នឹងបើកទិសដៅអភិវឌ្ឍថ្មីសម្រាប់ទេសចរណ៍សហគមន៍នៅឃុំធ្វឹងហ្វា រួមចំណែកទាញយកផលប្រកបដោយប្រសិទ្ធភាពនូវសក្ដានុភាព ឧត្តមភាពរបស់ភូមិភាគ ព្រមទាំងរក្សានិងពង្រីកអត្តសញ្ញាណវប្បធម៌ជាតិក្នុងដំណើរការអភិវឌ្ឍសេដ្ឋកិច្ច-សង្គម។

នាយកនិងសមាជិកត្រួតពិនិត្យសហករណ៍បង្ហាញមុខក្នុងកិច្ចប្រជុំ។

ថ្លែងការណ៍ក្នុងកិច្ចប្រជុំ លោកត្រឹងមិញ អនុប្រធានគណៈកម្មាធិការប្រជាជនឃុំធ្វឹងហ្វា បញ្ជាក់៖ ចំណុចលេចធ្លោនៃសហករណ៍វប្បធម៌ - សិល្បៈ - ទេសចរណ៍យៀងតៀង គឺយកអត្តសញ្ញាណវប្បធម៌ធ្វើជាធនធាន យកសេវាកម្មសិល្បៈនិងទេសចរណ៍ធ្វើជាផលិតផលចម្បង។ សហករណ៍មិនត្រឹមតែផ្គត់ផ្គង់សេវាកម្មប៉ុណ្ណោះទេ ថែមទាំងជាកន្លែងរក្សាតម្លៃវប្បធម៌ផ្លូវចិត្ត ចាប់ពីស្ថាបត្យកម្ម ពិធីបុណ្យ រហូតដល់ការចម្រុះគ្នានៃម្ហូបអាហារកិញ-ខ្មែរ-ហ្វា។ នេះជាទម្រង់រួមផ្សំយ៉ាងជិតស្និទ្ធរវាងការអភិរក្សបេតិកភណ្ឌវប្បធម៌ជាមួយការអភិវឌ្ឍសេដ្ឋកិច្ចទេសចរណ៍សហគមន៍ រួមចំណែកបង្កការងារធ្វើនិងលើកកម្ពស់ប្រាក់ចំណូលចីរភាពសម្រាប់ប្រជាជននៅភូមិភាគ៕

យ៉ីអាញ - សុផន

ចែករំលែកអត្ថបទ

ពាក្យគន្លឹះ