ជាង៨ទសវត្សរ៍កន្លងផុតទៅ ស្មារតីក្លាហាននៃបដិវត្តន៍ខែសីហានិងទិវាបុណ្យជាតិ ២ កញ្ញា គឺនៅពេញលេញដដែលក្នុងចិត្តរបស់កម្មាភិបាល បក្ខជននិងប្រជាជនកឹងធើគ្រប់រូប។ ក្តីមោទនភាពអំពីសរទៈរដូវប្រវត្តិសាស្ត្របន្តជាប្រភពកម្លាំងផ្ទៃក្នុងដ៏ធំធេង បំភ្លឺផ្លូវនៃដំណើរកសាងនិងការពារមាតុភូមិ។ ពង្រីកប្រវេណីដ៏រុងរឿង គណៈកម្មាធិការបក្ស រដ្ឋអំណាចនិងប្រជាជនទីក្រុងតែងរួមកម្លាំងកាយចិត្តឆ្លងកាត់ការលំបាក បេ្តជ្ញាចិត្តបង្កើតនូវស្នាមគំនូសដ៏ភ្លឺចែងចាំង កសាងកឹងធើឱ្យកាន់តែសម្បូរសប្បាយ ស្រស់ស្អាត អារ្យធម៌និងអភិវឌ្ឍប្រកបដោយចីរភាព។
ស្នាមគំនូសកឹងធើក្នុងបដិវត្តន៍ខែសីហា
តាមប្រវត្តិសាស្ត្របក្ខភាគខេត្តកឹងធើ ភាគ១ (១៩២៩-១៩៤៥) សេចក្តីព្រាងរបស់គណៈកម្មាធិការបក្សខេត្តកឹងធើ បោះពុម្ពផ្សាយឆ្នាំ១៩៩៥ អនុវត្តតាមការអំពាវនាវនៃកុបកម្មទូទៅរបស់លោកប្រធានហូជិមិញ នៅថ្ងៃទី១៧ ខែសីហា ឆ្នាំ១៩៤៥ គណៈកម្មាធិការបក្សខេត្តកឹងធើបានប្រជុំពិភាក្សាផែនការបះបោរនៅទូទាំងខេត្ត។ នៅថ្ងៃទី១៩ ខែសីហា ពេលទទួលបានដំណឹងប្រជាជនរដ្ឋធានីហាណូយបានបះបោរជោគជ័យ គណៈកម្មាធិការបក្សខេត្តបានប្រញាប់កោះហៅប្រជុំបង្កើត "គណៈកម្មាធិការជនជាតិរំដោះ" ដើម្បីដឹកនាំប្រជាជនត្រៀមខ្លួនដណ្តើមយករដ្ឋអំណាច។ ក្នុងកិច្ចប្រជុំ បានបោះឆ្នោតជ្រើសសមមិត្ត ត្រឹងង៉ុកហ្វេ ធ្វើជាប្រធាន សមមិត្ត ហិ្វញភូម៉ូវ (ហ្វាហាវ) ធ្វើជាអនុប្រធាន សមមិត្ត ត្រឹងវ៉ាំងខែវ ធ្វើជាអគ្គលេខាធិការនិងសមាជិកគណៈកម្មាធិការចំនួន៩នាក់ទៀត។
ទីក្រុងកឹងធើជាមួយទេសភាពព្រែកទន្លេប្រកបដោយភាពសុខដុមកំពុងបានកសាងកាន់តែស្រស់ស្អាត និងទំនើប។
នៅថ្ងៃទី២២ ខែសីហា គណៈកម្មាធិការបក្សខេត្តបានប្រជុំសិក្សាសេចក្តីសម្រេចចិត្តរបស់គណៈកម្មាធិការបក្សតំបន់ និងគូសផែនការដណ្តើមយករដ្ឋអំណាចនៅក្នុងខេត្ត។ កិច្ចប្រជុំសម្រេចចិត្តជ្រើសសមមិត្តចំនួន៤នាក់ចូលរួមដណ្តើមយករដ្ឋអំណាចនៅសាយហ្គង នៅថ្ងៃទី២៥ ខែសីហា ដើម្បីស្រង់បទពិសោធន៍ អនុវត្តជាក់ស្តែងសម្រាប់ខេត្តរបស់ខ្លួន។ ព្រមទាំងចាត់ "កងសកម្ម" ត្រឡប់មកទីរួមខេត្តកឹងធើត្រៀមខ្លួនរង់ចាំបញ្ជា។ បន្ទាប់ពីការបះបោរជោគជ័យនៅសាយហ្គង គណៈកម្មាធិការបក្សខេត្តកឹងធើបានកោះហៅប្រជុំបន្ទាន់ សម្រេចចិត្តជ្រើសរើសគណៈប្រតិភូមួយក្រុមទៅជួបមេខ្មាំងឈ្មោះ សាតូ - អ្នកបញ្ជាការការិយាល័យប៉ូលិសយោធាជប៉ុន និងជូនដំណឹងថានៅថ្ងៃទី២៦ ខែសីហានឹងមានពិធីមិទ្ទិញទ្រង់ទ្រាយធំមួយនៅទីរួមខេត្តកឹងធើ។ យើងយកពិធីមិទ្ទិញនេះដើម្បីបង្ហាញពីកងកម្លាំង ស៊ើបមើលឥរិយាបថរបស់ទាហានជប៉ុន។ ក្នុងករណីជប៉ុនចុះចាញ់ យើងនឹងដណ្តើមយករដ្ឋអំណាចភ្លាមៗ បង្ខំរដ្ឋអំណាចអាយ៉ង ប្រកាសរំសាយ ប្រគល់រដ្ឋអំណាចមកឱ្យប្រជាជនវិញ។ ការពារគ្រប់ហានិភ័យ គណៈកម្មាធិការបក្សខេត្តបានចាត់សមមិត្ត ហ្វិញផាងហូ បញ្ជាកម្លាំង "កងវាយលុក" ព័ទ្ធជុំវិញការិយាល័យប៉ូលិសយោធាជប៉ុនដោយសម្ងាត់ តាមដានឥរិយាបថនៃប្រធានខេត្ត លឺវវ៉ាំងតាវ ការពារសុវត្ថិភាពជូនគណៈប្រតិភូរបស់យើង។
ដូចការគ្រោងទុក ពួកជប៉ុនមិនហ៊ានតតាំងនិងព្រមទទួលសំណើររបស់គណៈប្រតិភូយើង។ មិនឱ្យបាត់បង់ឱកាស គណៈកម្មាធិការបក្សខេត្តសម្រេចចិត្តប្រើកម្លាំងមហាជន បំប្លែងពិធីមិទ្ទិញថ្ងៃទី២៦ ខែសីហា ឆ្នាំ១៩៤៥ ទៅជាការបះបោរដណ្តើមយករដ្ឋអំណាចនៅទីរួមខេត្តកឹងធើនិងភូមិភាគនានាក្នុងខេត្ត។ ព្រឹកព្រលឹមថ្ងៃទី២៦ ខែសីហា ឆ្នាំ១៩៤៥ ប្រជាជនជាង២០.០០០នាក់នៅទីរួមខេត្តនិងខណ្ឌអូរម៉ូង ចូវថាញ់ ផុងហេប...តម្រៀបជាជួរៗ លើកទង់ បដា ប្រមូលផ្តុំគ្នានៅកីឡាដ្ឋានបាល់ទាត់កឹងធើ (តំបន់សាលប្រជុំគណៈកម្មាធិការបក្សខេត្តនាពេលក្រោយ)។ នៅខាងមុខវេទិកាព្យួរផ្ទាំងបដាមួយធំ៖ "រដ្ឋអំណាចបានមកដៃប្រជាជន!"; "ប្រទេសវៀតណាមឯករាជ្យម៉ឺនឆ្នាំ!"។
នៅម៉ោង៦ព្រឹក នៅវេទិកា គណៈកម្មាធិការរំដោះជាតិខេត្តបានបង្ហាញមុខចំពោះប្រជាជន សមមិត្ត ហិ្វញផាងហូ តំណាងគណៈកម្មាធិការអានលិខិតអំពាវនាវនិងកោះហៅប្រជាជនសាមគ្គី ដណ្តើមយករដ្ឋអំណាច។ ចំពោះមុខកម្លាំងបះបោរប្រដាប់អាវុធរបស់មហាជន ប្រធានខេត្ត លឺវវ៉ាំងតាវ បង្ខំចិត្តប្រគល់រដ្ឋអំណាចដល់តំណាងគណៈកម្មាធិការរំដោះជាតិ និងប្រកាសរំសាយរដ្ឋអំណាចអាយ៉ងនៅទូទាំងខេត្ត។ សមមិត្ត ត្រឹងង៉ុកហ្វេ ប្រធានគណៈកម្មាធិការរំដោះជាតិខេត្ត បានប្រកាសយ៉ាងឱឡារិកថា រដ្ឋអំណាចបានមកដៃប្រជាជនហើយ។
មោទនភាពប្រវេណី បោះជំហានរឹងមាំឆ្ពោះទៅអនាគត
ស្មារតីក្លាហាននៃបដិវត្តន៍ខែសីហានិងទិវាបុណ្យជាតិ ២ កញ្ញា បន្តបំភ្លឺផ្លូវក្នុងដំណើរកសាងនិងការពារមាតុភូមិ ស្រុកកំណើត។ ស្នងបន្តនិងពង្រីកប្រវេណីដ៏រុងរឿង បក្ខភាគ រដ្ឋអំណាចនិងប្រជាជនទីក្រុងកឹងធើតែងសាមគ្គី បេ្តជ្ញាចិត្តកសាងនិងអភិវឌ្ឍសេដ្ឋកិច្ច-សង្គមសម្រេចបានសមិទ្ធផលសំខាន់ៗជាច្រើន។
ហេដ្ឋារចនាសម្ព័ន្ធទីក្រុងកឹងធើ បានវិនិយោគកសាងព្រមៗគ្នានិងទំនើប។ ក្នុងរូប៖ ស្ពានត្រឹងហ្វាងណា កសាងដោយចំណាយថវិកា៧៩១ពាន់លានដុង បានសម្ពោធនិងដាក់ឱ្យប្រើប្រាស់នៅខែមេសា ឆ្នាំ២០២៤។
តាមសៀវភៅប្រវត្តិសាស្ត្រប្រវេណីបដិវត្តន៍ឃុំដាយងាយ ភាគ១ ដំណាក់កាល ១៩៣០-១៩៧៥ បោះពុម្ពផ្សាយឆ្នាំ២០១៤ "ព្រឹកថ្ងៃទី២៦ ខែសីហា ឆ្នាំ១៩៤៥ ប្រជាជនដាយងាយរួមជាមួយកងកម្លាំងប្រដាប់អាវុធក្នុងតំបន់ ចេញដំណើរពីផ្លូវនានាក្នុងភូមិឃុំមកជួបជុំគ្នានៅមុខផ្សារវ៉ាមតឹង ជាមួយទង់ បដានិងអាវុធកាន់ក្នុងដៃ បង្ហាញពីកម្លាំងបដិវត្តន៍។ សមមិត្ត ជីនលឺ និងផាងវ៉ាំងឡែង ដឹកនាំកងកម្លាំងប្រដាប់អាវុធព័ទ្ធជុំវិញការិយាល័យក្រុមប្រឹក្សាតែឡាំង (ស្ថាប័នរដ្ឋអំណាចអាយ៉ងនៅភូមិឃុំសម័យបារាំង)។ ចំពោះមុខទឹកចិត្តនិងកម្លាំងរបស់ប្រជាជន រដ្ឋអំណាចអាយ៉ងដាយងាយនិងទាហានបម្រើភ័យស្លន់ស្លោរកផ្លូវរត់គេចខ្លួន..."។
ឃុំដាយងាយសព្វថ្ងៃបានបង្កើតឡើងចាប់ពីថ្ងៃទី១ ខែកក្កដា ឆ្នាំ២០២៥ លើមូលដ្ឋាននៃការរួមបញ្ចូលរវាងទីប្រជុំជនដាយងាយនិងឃុំឡុងឌឹក។ ៨១ឆ្នាំកន្លងផុតទៅចាប់ពីបដិវត្តន៍ខែសីហាទទួលបានជោគជ័យ គណៈកម្មាធិការបក្ស រដ្ឋអំណាចនិងប្រជាជនឃុំដាយងាយតែងតែខិតខំពលកម្មផលិត កសាងភូមិស្រុកកាន់តែអភិវឌ្ឍ។ ការខិតខំនោះបានបង្ហាញតាមរយៈការទទួលស្គាល់ឃុំឡុងឌឹក (ចាស់) សម្រេចបទដ្ឋានជនបទថ្មីកម្រិតខ្ពស់ និងទីប្រជុំជនដាយងាយ (ចាស់) សម្រេចបទដ្ឋានក្រុងអារ្យធម៌។ បច្ចុប្បន្ន ផ្លូវគមនាគមន៍ភាគច្រើននៅលើភូមិឋានឃុំបានក្រាលកៅស៊ូ ក្រាលបេតុង; ប្រព័ន្ធសាលារៀន ដំណាក់សុខាភិបាល ការិយាល័យធ្វើការ ផ្ទះប្រជាជនបានសាងសង់ស្អាតបាត។ ឃុំនៅគ្រួសារក្រ ១,០៤% និងគ្រួសារក្បែរក្រ ៣%។
ទីក្រុងកឹងធើបានកសាងកាន់តែស្រស់ស្អាតនិងទំនើប។ ក្នុងរូប៖ ជ្រុងមួយនៃសង្កាត់និញកេវនិងសង្កាត់តឹងអាង។
លោកង្វៀងមិញលីម អនុលេខាគណៈកម្មាធិការបក្ស ប្រធានគណៈកម្មាធិការប្រជាជនឃុំដាយងាយ ឱ្យដឹង៖ "នៅលើភូមិឋានឃុំកំពុងចាត់តាំងកសាងគម្រោងធំៗជាច្រើន៖ រោងចក្រអគ្គិសនីឡុងភូ១ ស្ពានដាយងាយ២ មណ្ឌលឧស្សាហកម្មដាយងាយ...។ ទន្ទឹមនឹងនោះ បានរៀបគម្រោងប្លង់កសាងមណ្ឌលក្រុងចំនួន២គឺ មណ្ឌលក្រុងដាយងាយនិងមណ្ឌលក្រុងថ្មីបែរមុខទៅទន្លេហូវ។ ពេលគម្រោង សំណង់ទាំងនេះសម្រេចរួចរាល់ នឹងជំរុញឱ្យសេដ្ឋកិច្ច-សង្គមឃុំអភិវឌ្ឍលឿននិងប្រកបដោយចីរភាពជាងមុន"។
ការធ្វើកុបកម្មទូទៅឆ្នាំ១៩៤៥ កងទ័ពនិងប្រជាជនឃុំទ្រឿងថាញ់ (ពេលនោះចំណុះខណ្ឌអូរម៉ូង) រួមជាមួយប្រជាជនខណ្ឌចូវថាញ់ ផុងហេបនិងទីរួមខេត្តកឹងធើ ក្លាយជាចរន្តមហាជនជាង២០.០០០នាក់ធ្វើដំណើរឆ្ពោះទៅកីឡាដ្ឋានបាល់ទាត់កឹងធើតស៊ូ ដណ្តើមយករដ្ឋអំណាច។ ប្រវេណីប្រវត្តិសាស្ត្រដ៏ក្លាហាននោះជាទីបង្អែកដ៏រឹងមាំសម្រាប់កូនចៅជំនាន់ក្រោយនៅទ្រឿងថាញ់រួមកម្លាំងកាយចិត្តកសាងភូមិស្រុកឱ្យកាន់តែអភិវឌ្ឍ។
តាមលោកស្រី ត្រឹងធីធៀងធឺ លេខាគណៈកម្មាធិការបក្ស ប្រធានក្រុមប្រឹក្សាប្រជាជនឃុំទ្រឿងថាញ់ ឃុំបានបង្កើតឡើងលើមូលដ្ឋាននៃការរួមបញ្ចូលរវាងឃុំទ្រឿងថាញ់ ឃុំឌិញមូងនិងឃុំតឹងថាញ់ ចាប់ពីថ្ងៃទី១ ខែកក្កដា ឆ្នាំ២០២៥។ ក្នុងនោះ ឆ្នាំ២០២៣ ឃុំឌិញមូងសម្រេចបទដ្ឋានជនបទថ្មីខ្នាត់គំរូ ឃុំតឹងថាញ់សម្រេចបទដ្ឋានជនបទថ្មីកម្រិតខ្ពស់ និងឆ្នាំ២០២៤ ឃុំទ្រឿងថាញ់សម្រេចបទដ្ឋានជនបទថ្មីខ្នាត់គំរូ។ បច្ចុប្បន្ន សាលារៀននិងដំណាក់សុខាភិបាលទាំងអស់សម្រេចបទដ្ឋានជាតិ; ប្រមាណ ៩៧% ផ្លូវគមនាគមន៍បានចាក់ក្រួសរឹងមាំ; ផ្លូវតភ្ជាប់ភូមិទាំងអស់បានពង្រីកទទឹង៤ម៉ែត្រ ការធ្វើដំណើរទៅមកងាយស្រួល; គ្រួសារទាំង១០០% បានប្រើប្រាស់អគ្គិសនីសុវត្ថិភាពនិងទឹកស្អាតស្របអនាម័យ។ ឃុំគ្មាននៅគ្រួសារក្រ នៅសល់តែ១៣២គ្រួសារក្បែរក្រ។
ប្រវត្តិសាស្ត្រដ៏ក្លាហានបានក្លាយជាកម្លាំងផ្ទៃក្នុងជួយឱ្យបក្ខភាគ រដ្ឋអំណាច កងទ័ពនិងប្រជាជនទីក្រុងកឹងធើឆ្លងកាត់ការលំបាក ឈានឡើងកសាងភូមិស្រុកឱ្យកាន់តែសម្បូរសប្បាយ ស្រស់ស្អាត និងអារ្យធម៌។ រហូតដល់ថ្ងៃនេះ សំណង់ផ្លូវគមនាគមន៍ជាច្រើន ព្រលានយន្តហោះកឹងធើ កំពង់ផែកឹងធើ មណ្ឌលឧស្សាហកម្មនានា ប្រព័ន្ធមន្ទីរពេទ្យនិងវិទ្យាស្ថាន សាលារៀនបានវិនិយោគកសាងស្រស់ស្អាត ញ៉ាំងទីក្រុងកឹងធើក្លាយជាមជ្ឈមណ្ឌលនៃវិស័យចរាចរណ៍ សុខាភិបាល អប់រំនិងវិទ្យាសាស្ត្របច្ចេកវិទ្យានៃតំបន់វាលរាបទន្លេគឺវឡុង។ តាមរបាយការណ៍របស់គណៈកម្មាធិការបក្សទីក្រុងកឹងធើ ឆ្នាំ២០២៥ GRDP ជាមធ្យមលើមនុស្សម្នាក់ប៉ាន់ស្មានសម្រេចជាង ៩៤,៩៤ លានដុង; ៥៩/៧២ ឃុំសម្រេចបទដ្ឋានជនបទថ្មី; មាន ៧៤៣ សាលារៀនសម្រេចបទដ្ឋានជាតិ; អត្រាគ្រួសារក្រថយចុះនៅសល់ ០,៥៩%...។
ដើម្បីលោតផ្លោះអភិវឌ្ឍ ទីក្រុងកឹងធើបន្តផ្តោតលើការអនុវត្តគម្រោង សំណង់សំខាន់ៗចំនួន២៨។ ក្នុងនោះ លេចធ្លោគឺគម្រោងហេដ្ឋារចនាសម្ព័ន្ធសំខាន់ៗ៖ កំពង់ផែត្រឹងដេ ផ្លូវល្បឿនលឿនចូវដុក-កឹងធើ-សុកត្រាំង (ដំណាក់កាលទី១) បង្កើនកម្រិតនិងពង្រីកផ្លូវជាតិលេខ៩១ (ចាប់ពីគីឡូម៉ែត្រទី០-៧) ផ្លូវក្រវាត់ខាងលិចទីក្រុងកឹងធើ...។ ទន្ទឹមនឹងនោះ ទីក្រុងកំពុងប្រញាប់បង្ហើយមន្ទីរពេទ្យមហារីកទីក្រុងកឹងធើ ចាត់តាំងកសាងមណ្ឌលរដ្ឋបាលប្រមូលផ្តុំនិងគម្រោងមណ្ឌលក្រុង ហេដ្ឋារចនាសម្ព័ន្ធមណ្ឌលឧស្សាហកម្ម មណ្ឌលបច្ចេកវិទ្យាព័ត៌មាន រោងចក្រអគ្គិសនី...។ នេះត្រូវបានចាត់ទុកជាគំនាស់យុទ្ធសាស្ត្រ បង្កបុព្វបទដ៏សំខាន់ដើម្បីទីក្រុងអភិវឌ្ឍសក្ដានុភាពជាអតិបរមា នាំឱ្យសេដ្ឋកិច្ច-សង្គមអភិវឌ្ឍឡើងកម្រិតកម្ពស់ថ្មី៕
អាញយ៉ុង - សុផន
ពាក្យគន្លឹះ
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
