ព្រឹត្តិការណ៍ - នយោបាយ ព្រឹត្តិការណ៍

17/08/2026 - 06:02

ក្រសួងមហាផ្ទៃតបស្នងចំពោះអ្នកមានសគុណនឹងបដិវត្តន៍ ជូនកង់ដល់សិស្សានុសិស្សដែលមានស្ថានភាពក្រលំបាកនៅទីក្រុងកឹងធើ

ក្រសួងមហាផ្ទៃ ចាត់តាំងកម្មវិធីសួរសុខទុក្ខ និងជូនអំណោយអ្នកម្តាយវៀតណាមវីរភាព អ្នកដែលមានសគុណចំពោះបដិវត្តន៍ និងកុមារក្រីក្រពុះពារការលំបាក នៅទីក្រុងកឹងធើ។

លោក វ៉ូវជៀងថាំង អនុរដ្ឋមន្ត្រីក្រសួងមហាផ្ទៃ; លោកស្រី ហូធីកឹមដាវ អនុលេខាគណៈកម្មាធិការបក្សក្រុង ប្រធានគណៈកម្មាធិការរណសិរ្សមាតុភូមិវៀត ណាមទីក្រុងកឹងធើ; លោក ង្វៀងវ៉ាំងខើយ អនុប្រធានគណៈកម្មាធិការប្រជាជនទីក្រុងកឹងធើ រួមជាមួយថ្នាក់ដឹកនាំ ស្ថាប័ន អង្គភាពនានាអញ្ជើញចូលរួម។

ក្រុមប្រតិភូអញ្ជើញមកសួរសុខទុក្ខ ជូនអំណោយនិងថតរូបអនុស្សាវរីយ៍ជាមួយអ្នកម្តាយវៀតណាមវីរភាព ឡេធីប៊ិញ នៅសង្កាត់និញកេវ។

ថ្លែងក្នុងកម្មវិធីនេះ លោកអនុរដ្ឋមន្ត្រីក្រសួងមហាផ្ទៃ វ៉ូវជៀងថាំង បានសង្កត់ធ្ងន់៖ ការយកចិត្តទុកដាក់ដល់អ្នកមានសគុណ គ្រួសារគោលនយោបាយ គឺជាក្រមសីលធម៌ ប្រពៃណីដ៏ល្អរបស់ប្រជាជាតិ ទន្ទឹមនឹងនោះ ក៏ជាភារកិច្ចរបស់យុវជនជំនាន់បច្ចុប្បន្នចំពោះអ្នកដែលបានពលី លះបង់ដើម្បីឯករាជ្យ សេរីភាពរបស់មាតុភូមិ។

លោកអនុរដ្ឋមន្ត្រីកត់សម្គាល់ ទីក្រុងកឹងធើយកចិត្តទុកដាក់អនុវត្តល្អនូវគោលនយោបាយចំពោះអ្នកដែលមានសគុណ សកម្មផ្សព្វផ្សាយការងារស្វែងរកកំណត់ អត្តសញ្ញាណអដ្ឋិធាតុយុទ្ធជនពលី; ទន្ទឹមនឹងនោះ បានឱ្យដឹង៖ ក្រសួងមហាផ្ទៃបន្តធ្វើសេនាធិការនូវគោលនយោបាយឱ្យបានសុក្រឹតនិងបង្កើនកម្រិតជំនួយឧបត្ថម្ភ រួមចំណែកថែទាំជីវភាពរបស់អ្នកមានសគុណ និងសាច់ញាតិឱ្យកាន់តែល្អប្រសើរពីមួយថ្ងៃទៅមួយថ្ងៃ។ អំណោយដែលបានប្រគល់ជូននាឱកាសនេះ បង្ហាញពីទឹកចិត្តការទទួលខុសត្រូវ និងការដឹងគុណយ៉ាងជ្រាលជ្រៅរបស់ផ្នែកមហាផ្ទៃ; តាមរយៈនោះ លើកទឹកចិត្តដល់គ្រួសារគោលនយោបាយបន្តពង្រីកប្រពៃណីបដិវត្តន៍ អប់រំយុវជនជំនាន់ក្រោយ ជំរុញទឹកចិត្តដល់សិស្សានុសិស្សដែលមានស្ថានភាពក្រលំបាកឱ្យខិតខំរៀនសូត្រ និងលត់ដំ។

ថ្នាក់ដឹកនាំក្រសួងមហាផ្ទៃ និងទីក្រុងកឹងធើ ជូនអំណោយដល់អ្នកដែលមានសគុណចំពោះបដិវត្តន៍នៅនាកម្មវិធី។

នៅក្នុងកម្មវិធី ថ្នាក់ដឹកនាំក្រសួងមហាផ្ទៃ និងទីក្រុងកឹងធើ បានសួរសុខទុក្ខយ៉ាងកក់ក្ដៅ ជូនអំណោយដល់អ្នកម្តាយវៀតណាមវីរភាពចំនួន ២ រូប និងអ្នកដែលមានសគុណចំពោះបដិវត្តន៍ចំនួន ៨០ រូប; ជូនកង់ចំនួន ៥០ គ្រឿងដល់សិស្សានុសិស្សដែលមានស្ថានភាពក្រលំបាក ខិតខំឈានឡើងក្នុងការសិក្សា។

ស្របក្នុងឱកាសនេះ ក្រុមប្រតិភូបានអញ្ជើញមកសួរសុខទុក្ខ ជូនអំណោយដល់អ្នកម្តាយវៀតណាមវីរភាព ឡេធីប៊ិញ នៅសង្កាត់និញកេវ។ សមមិត្តទាំងអស់ក្នុងក្រុម បានសួរសុខទុក្ខយ៉ាងកក់ក្ដៅពីសុខភាព ការរស់នៅនិងសម្តែងនូវការដឹងគុណយ៉ាងជ្រាលជ្រៅចំពោះការពលី លះបង់របស់អ្នកម្តាយនិងគ្រួសារ ក្នុងបុព្វហេតុតស៊ូរំដោះជាតិ កសាងនិងការពារមាតុភូមិ៕

គៀងក្វឹក-មេងលី

ចែករំលែកអត្ថបទ

ពាក្យគន្លឹះ