ព្រឹត្តិការណ៍ - នយោបាយ ព្រឹត្តិការណ៍

15/08/2026 - 21:29

ប្រជាជនម្នាក់ៗគឺជាយុទ្ធជននៅលើសមរភូមិការពារសន្តិសុខមាតុភូមិ

(អ.ឡ.) - ផ្អែកលើលទ្ធផលលេចធ្លោជាច្រើន នគរបាលសង្កាត់ប៊ិញធ្វី មានកិត្តិយសបានក្រសួងនគរបាលទទួលស្គាល់សម្រេចកិត្តិនាមជា "នគរបាលសង្កាត់គំរូអំពីសន្តិសុខ សណ្ដាប់ធ្នាប់និងទីក្រុងអរ្យធម៌"។

ព្រឹកថ្ងៃទី ១៥ ខែសីហា លោកត្រឿងកាញ់ត្វៀង អនុលេខាគណៈកម្មាធិការបក្សទីក្រុង ប្រធានគណៈកម្មាធិការប្រជាជនទីក្រុងកឹងធើ បានអញ្ជើញចូលរួមទិវាទូទាំងប្រជាជនការពារសន្តិសុខមាតុភូមិ (ហៅកាត់ថា ទិវាបុណ្យ) នៅសង្កាត់ប៊ិញធ្វី។

លោកត្រឿងកាញ់ត្វៀង (អ្នកទី២ រាប់ពីស្តាំ) អនុលេខាគណៈកម្មាធិការបក្សទីក្រុង ប្រធានគណៈកម្មាធិការប្រជាជនទីក្រុងកឹងធើ និងលោកវរសេនីយ៍ឯក ប៉ុយឌឹកអាង នាយករងនគរបាលទីក្រុងកឹងធើ ជូនអំណោយដល់សង្កាត់ប៊ិញធ្វី។

ក្នុងបរិយាកាសស្និទ្ធស្នាល និងកក់ក្តៅ អ្នកតំណាងទាំងឡាយបានរំលឹកឡើងវិញនូវប្រពៃណីទិវាបុណ្យទូទាំងប្រជាជនការពារសន្តិសុខមាតុភូមិ។ ក្នុងប៉ុន្មានឆ្នាំកន្លង ចលនានៅសង្កាត់ប៊ិញធ្វី បានអភិវឌ្ឍយ៉ាងខ្លាំងក្លានិងមានការច្នៃប្រតិដ្ឋទាំងខ្លឹមសារនិងរូបភាព។ សង្កាត់មានទម្រង់ចលនាប៉ិនប្រសប់ជាច្រើនដែលសកម្មភាពប្រកបដោយប្រសិទ្ធភាព ដូចជា៖ "កាមេរ៉ាសន្តិសុខ" "ក្រុមគ្រួសារផ្សារភ្ជាប់សុវត្ថិភាពបង្ការ ពន្លត់អគ្គិភ័យ និងទីតាំងពន្លត់អគ្គិភ័យសាធារណៈ" "ឃោសនាច្បាប់លើអ៊ីនធឺណិត", "ច្រករបៀងស្រឡះស្រឡំ និងសោភណភាពទីក្រុង"។ល។ ក្នុងនោះ ទម្រង់ "ព្រួតដៃឧបត្ថម្ភអ្នកកែប្រែខ្លួនឡើងវិញ" បានជួយដល់ករណីជាច្រើនដែលមានអតីតកាលខុសឆ្គងឱ្យវិលមករួមរស់ក្នុងសហគមន៍ លំនឹងជីវភាព និងមិនប្រព្រឹត្តបទល្មើសសារជាថ្មី។

ក្នុងរយៈពេល ៦ ខែដើមឆ្នាំ ២០២៦ ប្រជាជនបានផ្តល់ប្រភពព័ត៌មានចំនួន ១១៥ ជួយឱ្យនគរបាលសង្កាត់ប៊ិញធ្វី ដោះស្រាយ ៣៦ ករណីពាក់ព័ន្ធនឹងសន្តិសុខ សណ្ដាប់ធ្នាប់។ ទំនាស់ជាច្រើនក្នុងប្រជាជនបានសម្រុះសម្រួល និងដោះស្រាយទាន់ពេលវេលាចាប់តាំងពីថ្នាក់មូលដ្ឋាន ដោយមិនឱ្យកើតមានភាពស្មុគស្មាញ។ ផ្ដើមពីការដឹកនាំយ៉ាងម៉ឺងម៉ាត់របស់គណៈកម្មាធិការបក្ស និងគណៈកម្មាធិការប្រជាជនសង្កាត់ ព្រមទាំងការចូលរួមយ៉ាងសកម្មរបស់ប្រជាជន ស្ថានភាពសន្តិសុខនយោបាយ និងសណ្ដាប់ធ្នាប់សុវត្ថិភាពសង្គមនៅលើភូមិឋាន បន្តបានរក្សាខ្ជាប់ខ្ជួន និងមានស្ថិរភាព ហើយបទល្មើសនិងអបាយមុខសង្គមត្រូវបានកាត់បន្ថយ។

លោកត្រឿងកាញ់ត្វៀង អនុលេខាគណៈកម្មាធិការបក្សទីក្រុង ប្រធានគណៈកម្មាធិការប្រជាជនទីក្រុងកឹងធើ ថ្លែងចង្អុលការក្នុងទិវាបុណ្យ។

ថ្លែងចង្អុលការក្នុងទិវាបុណ្យ លោកត្រឿងកាញ់ត្វៀង បានអះអាងថា ទិវាបុណ្យទូទាំងប្រជាជនការពារសន្តិសុខមាតុភូមិ បានក្លាយជាសកម្មភាពប្រចាំឆ្នាំ មានអត្ថន័យយ៉ាងធំធេង បានចាត់តាំងឡើងមានរបៀបរៀបរយ និងជាក់ស្តែងនៅតាមមណ្ឌលប្រជាជនតាំងទីលំនៅ ស្ថាប័ន អាជីវកម្ម និងសាលារៀន។ នេះជាឱកាសដើម្បីស្ងើចសរសើរ ជូនរង្វាន់និងពង្រីកគំរូមនុស្សល្អ ការងារល្អ និងវិធីធ្វើល្អៗ។ តាមរយៈនោះ រួមចំណែកធ្វើឱ្យសម្បូរបែបថែមទៀតនូវប្រពៃណីស្នេហាជាតិ លើកតម្កើងកម្លាំងមហាសាមគ្គីក្នុងសហគមន៍ និងពង្រឹងទំនាក់ទំនងជិតស្និទ្ធរវាងកងកម្លាំងនគរបាលជាមួយប្រជាជនក្នុងកិច្ចការការពារសន្តិសុខ សណ្ដាប់ធ្នាប់។

លោកត្រឿងកាញ់ត្វៀង អនុលេខាគណៈកម្មាធិការបក្សទីក្រុង ប្រធានគណៈកម្មាធិការប្រជាជនទីក្រុងកឹងធើជូនប័ណ្ណសរសើរដល់កម្មាភិបាល និងប្រជាជនសង្កាត់ប៊ិញធ្វី ក្នុងចលនាទូទាំងប្រជាជនការពារសន្តិសុខមាតុភូមិ។

ប្រធានគណៈកម្មាធិការប្រជាជនទីក្រុង បានវាយតម្លៃខ្ពស់ចំពោះការអភិវឌ្ឍយ៉ាងខ្លាំងក្លានៃចលនាទូទាំងប្រជាជនការពារសន្តិសុខមាតុភូមិនៅសង្កាត់ប៊ិញធ្វី។ ព្រមជាមួយគ្នានោះ លោកបានសំណូមពរឱ្យគណៈកម្មាធិការបក្ស រដ្ឋអំណាចភូមិភាគបន្តលើកកម្ពស់គុណភាព ផ្សារភ្ជាប់ចលនានេះទៅនឹងចលនាប្រឡងប្រណាំងស្នេហាជាតិ ដើមី្បបង្កការរីកសាយភាយជាវិជ្ជមាន ទូលំទូលាយនិងជ្រាលជ្រៅក្នុងជីវភាពរស់នៅ។ នគរបាលសង្កាត់អនុវត្តបានល្អនូវកិច្ចការក្តាប់សភាពការណ៍ គ្រប់គ្រងយ៉ាងហ្មត់ចត់ភូមិឋាន និងមុខសញ្ញា បង្កើនការឃោសនា ពង្រីកកម្លាំងរបស់ប្រជាជនក្នុងការការពារសន្តិសុខ សណ្ដាប់ធ្នាប់ ព្រមទាំងស្ងើចសរសើរនិងពង្រីកគំរូឆ្នើមបានទាន់ពេលវេលា ដើម្បីប្រជាជនម្នាក់ៗក្លាយជាយុទ្ធជននៅលើសមរភូមិការពារសន្តិសុខមាតុភូមិ ធានាសន្តិសុខ និងសណ្ដាប់ធ្នាប់ចាប់តាំងពីគ្រួសារនីមួយៗ បណ្ដុំប្រជាជនតាំងទីលំនៅនីមួយៗ និងក្រុមប្រជាជនទីក្រុងនីមួយៗ។

ថ្នាក់ដឹកនាំគណៈកម្មាធិការប្រជាជនសង្កាត់ប៊ិញធ្វី ជូនរង្វាន់ដល់អង្គភាពនិងបុគ្គលដែលមានស្នាដៃឆ្នើមក្នុងការកសាងចលនាទូទាំងប្រជាជនការពារសន្តិសុខមាតុភូមិ។

នៅក្នុងទិវាបុណ្យនេះ កម្មាភិបាលនិងប្រជាជនសង្កាត់ប៊ិញធ្វី បានទទួលប័ណ្ណសរសើរពីប្រធានគណៈកម្មាធិការប្រជាជនទីក្រុងកឹងធើក្នុងចលនាទូទាំងប្រជាជនការពារសន្តិសុខមាតុភូមិ ហើយអង្គភាព និងបុគ្គលជាច្រើនទៀតបានប្រធានគណៈកម្មាធិការប្រជាជនសង្កាត់ជូនរង្វាន់ផងដែរ។ ថ្នាក់ដឹកនាំទីក្រុងនិងគណៈកម្មាធិការប្រជាជនសង្កាត់ប៊ិញធ្វីក៏បានជូនអំណោយដល់អង្គភាព និងបុគ្គលទាំងឡាយនៅក្នុងសង្កាត់ ដែលមានស្នាដៃជាច្រើនក្នុងសកម្មភាពកសាងចលនានិងប្រជាជនដែលមានជីវភាពលំបាក៕

កេវជិញ - ថាច់ធី

ចែករំលែកអត្ថបទ

ពាក្យគន្លឹះ