មហាសាមគ្គីជនជាតិ គំរូក្នុងសហគមន៍

25/11/2024 - 15:20

ដំណើរនៃការជំរុញទឹកចិត្តយុវតីខ្មែរ ហិ្វញគឹមលៀង

ហ្វិញគឹមលៀង ជាយុវតីកើតក្នុងគ្រួសារក្រលំបាកមួយនៅខេត្តកាម៉ាវ បានបង្ហាញឱ្យឃើញថា រូបនាងមិនត្រឹមតែជានិស្សិតឆ្នើមមួយរូបនោះទេ ថែមទាំងជាកម្មាភិបាលសម្ព័ន្ធយុវជន - សមាគមគំរូទៀតផង គឹមលៀងបានរួមចំណែកយ៉ាងសកម្មក្នុងសកម្មភាពសហគមន៍នៅសាកលវិទ្យាល័យថូវយ៉ូវម៉ូកនិងខេត្តប៊ិញយឿង។ ជាមួយនឹងស្មារតីជម្នះការលំបាក និងខិតខំប្រឹងប្រែងដោយឥតឈប់ឈរ ហ្វិញគឹមលៀង បានក្លាយជាប្រភពជំរុញទឹកចិត្តសម្រាប់យុវវ័យជាច្រើនឯទៀត។

យុវតីនិស្សិត ហ្វិញគឹមលៀង។

ហ្វិញគឹមលៀង តែងរក្សាខ្ជាប់លទ្ធផលសិក្សាឆ្នើមរបស់ខ្លួនជាមួយនឹងពិន្ទុខ្ពស់។ បានទទួលកិត្តិនាមជា “សមាជិកសម្ព័ន្ធយុវជនឆ្នើម” នៅឆ្នាំ ២០២៣ របស់គណៈអចិន្ត្រៃយ៍នៃសម្ព័ន្ធយុវជនខេត្ត ទន្ទឹមនឹងនោះ នាងទទួលបានរង្វាន់លេខ ២ ក្នុងការប្រឡង “គំនិតផ្តើមអាជីពច្នៃប្រតិដ្ឋ” សម្រាប់សមាជិកសម្ព័ន្ធយុវជននិងយុវជនខេត្តប៊ិញយឿង នៅឆ្នាំ២០២២។ ស្នាដៃទាំងនេះ មិនត្រឹមតែបញ្ជាក់ពីសមត្ថភាពខ្លួនឯងប៉ុណ្ណោះទេ នៅទាំងបង្ហាញច្បាស់ពីតួនាទីរបស់នាងនៅក្នុងចលនានិស្សិតនៅភូមិភាគទៀតផង។

ស្នាដៃមួយក្នុងចំណោមស្នាដៃលេចធ្លោបំផុតរបស់គឹមលៀង គឺគម្រោង “Brocvia - អាហារជំនួយបង្ការ ទប់ស្កាត់អ័ព្ទខួរ”។ គម្រោងនេះ មិនត្រឹមតែជួយដោះស្រាយតម្រូវការសុខភាពសហគមន៍ប៉ុណ្ណោះទេ ថែមទាំងជួយកែលម្អស្មារតីនិងការចងចាំដល់អ្នកប្រើប្រាស់ទៀតផង។ ត្រូវបានអភិវឌ្ឍន៍ក្នុងបរិការណ៍ក្រោយពីរោគឆ្លងដ៏កាចសាហាវ COVID-១៩, “Brocvia” បានទទួលផលជាច្រើននៅក្នុងការប្រឡងផ្តើមអាជីព បង្ហាញពីសមត្ថភាពច្នៃប្រតិដ្ឋ និងគំនិតធ្វើអាជីវកម្មរបស់គឹមលៀង។

ក្នុងនាមជាអនុប្រធានសមាគមនិស្សិតនៃសាកលវិទ្យាល័យថូវយ៉ូវម៉ូក គឹមលៀង តែងជំរុញសកម្មភាពស្ម័គ្រចិត្តនិងឧបត្ថម្ភនិស្សិតដោយឥតឈប់ឈរ។ នាងតែងទំនាក់ទំនងជាមួយនិស្សិតដើម្បីក្តោបក្តាប់មតិ បំណងប្រាថ្នារបស់ពួកគេ ផ្តើមពីនោះ ទើបរៀបចំនូវកម្មវិធីជាក់ស្តែងជាច្រើន ដើម្បីជួយមិត្តភក្តិជម្នះការលំបាកក្នុងការសិក្សា។ គឹមលៀង ឱ្យដឹង៖ “ចូលរួមការងារសមាគមនិស្សិត បាននាំមកនូវមេរៀនដ៏មានតម្លៃជាច្រើនសម្រាប់ខ្ញុំ ជួយឱ្យខ្ញុំអភិវឌ្ឍន៍ខ្លួននិងលត់ដំជំនាញទន់ចាំបាច់សម្រាប់អនាគត”។

ការដែលបានចូលក្នុងកងជួរបក្សកុម្មុយនិស្តវៀតណាម គឺជារបត់ដ៏សំខាន់មួយក្នុងដំណើរជីវិតរបស់គឹមលៀង។ គឹមលៀង ចាត់ទុកប្រការនេះជាកម្លាំងចលករ ដើម្បីបន្តឈានមុខក្នុងសកម្មភាពសង្គម ការរួមចំណែកសម្រាប់ស្រុកកំណើត និងជួយជំរុញលើកទឹកចិត្តដល់យុវជនជំនាន់ក្រោយ។ បង ឡេត្វឹងអាញ់ - អនុលេខា ប្រចាំការនៃសម្ព័ន្ធយុវជនខេត្តប៊ិញយឿង គូសបញ្ជាក់អំពីយុវតីគឹមលៀង៖ “នាងជាគំរូលេចធ្លោមួយរូប។ យើងខ្ញុំជឿជាក់ថា ជាមួយនឹងស្មារតីក្លៀវក្លា គឹមលៀង នឹងបន្តរួមចំណែកកសាងរូបភាពសម្ព័ន្ធយុវជនសកម្មក្នុងកិច្ចការផ្លាស់ថ្មីរបស់ប្រទេសជាតិ”។

ជាមួយនឹងការឧបត្ថម្ភពីមូលនិធិអាហារូបករណ៍ វឺអាយិញគឹមលៀង មិនត្រឹមតែអនុវត្តនូវក្តីស្រមៃអនាគតដ៏ភ្លឺស្វាងសម្រាប់ខ្លួនប៉ុណ្ណោះទេ ថែមទាំងគ្រោងទុកនូវផែនការធំជូនសហគមន៍ទៀតផង។ យុវតីខ្មែរចង់ក្លាយជាអ្នកនាំមុខ ជំរុញលើកទឹកចិត្តដល់យុវវ័យជំនាន់ក្រោយ ទន្ទឹមនឹងនោះ រួមចំណែកអភិវឌ្ឍន៍ស្រុកកំណើត។ ហ្វិញគឹមលៀង ជឿជាក់ថា ការតស៊ូនិងការតាំងចិត្ត នឹងជួយឱ្យនាងជម្នះរាល់ការលំបាកសាកល្បងនិងធ្វើឱ្យក្តីស្រមៃឱ្យក្លាយជាការពិត៕

យោង៖ tienphong.vn- ប្រែសម្រួល៖ វិមាន

ចែករំលែកអត្ថបទ

ពាក្យគន្លឹះ