មហាសាមគ្គីជនជាតិ គំរូក្នុងសហគមន៍

15/04/2024 - 13:49

ធ្វើមានពីផលិតស្រូវ

ដោយសារចេះគិតគូរ ស៊ូទ្រាំលំបាកប្រឹងប្រែងប្រកបការងាររកស៊ី និងហ៊ានវិនិយោគក្នុងការផលិត ទើបលោកលីវើង នៅភូមិដាយសូ ឃុំថាញ់ក្វើយ ស្រុកមីស្វៀង ខេត្តសុកត្រាំង ឆាប់ធ្វើមានផ្ដើមពីផលិតស្រូវ ក្នុងមួយឆ្នាំៗរកបានប្រាក់ចំណូលរាប់ពាន់លានដុង។

លោកលីវើង ទទួលប័ណ្ណសរសើររបស់គណៈកម្មាធិការប្រជាជនខេត្តសុកត្រាំង ពីព្រោះមានស្នាដៃឆ្នើមក្នុងចលនាកសិករផលិតនិងធ្វើអាជីវកម្មពូកែ។

ទទួលអំណរបុណ្យចូលឆ្នាំថ្មីក្នុងផ្ទះឥដ្ឋ ដែលទើបសង់ថ្មីធំទូលាយ មានតម្លៃជិត៤ពាន់លានដុង លោកលីវើង មានទឹកមុខញញឹមស្រស់ស្រាយចំពោះសមិទ្ធផលដែលសម្រេចបាន។ ក្រៅពីផ្ទះដ៏មានតម្លៃ លោក លីវើង ថែមទាំងជាម្ចាស់កម្មសិទ្ធិផ្ទៃដីជាង៤០ ហិកតា ត្រាក់ទ័រ៣គ្រឿង និងម៉ាស៊ីនបូមទឹក ១០គ្រឿងទៀតផង។ ពិសេស លោកលីវើង បានវិនិយោគទិញ “ដ្រូនកសិកម្ម” (បាញ់ថ្នាំ ព្រោះស្រូវនិងបាច់ជី) ២គ្រឿង មានតម្លៃជិត១ ពាន់លានដុងដើម្បីឆ្លើយតបតម្រូវការផលិតនិង ធ្វើសេវាកម្ម។ តាមសម្ដីលោកលីវើង មធ្យមភាគ “ដ្រូនកសិកម្ម” អាចដំណើរការបានជាង ១០០កុងក្នុងមួយថ្ងៃ អាចប្រិតសំចៃប្រាក់ចំណាយទិញពូជជីនិងថ្នាំកម្ចាត់ដង្កូវ ប៉ុន្តែទិន្នផលស្រូវនៅតែខ្ពស់ និងបង្កើនប្រាក់ចំណូលពីការធ្វើសេវាកម្មជាដើម។ លោកវើង គិតប៉ាន់ស្មាន ការចំណេញផ្ដើមពីការផលិតស្រូវនិងធ្វើសេវាកម្មក្នុងមួយឆ្នាំបានពី៣-៥ពាន់លានដុង។ ដោយឡែកស្រូវរដូវប្រាំងកន្លងហើយ លោកលីវើង រកបានប្រាក់ចំណេញជាង៣,៥ពាន់លានដុង។

ដើម្បីមានប្រភពចំណូលដូចសព្វថ្ងៃ លោក លីវើង ក៏បានឆ្លងកាត់ដំណាក់កាលតស៊ូពោរពេញដោយក្ដីលំបាកផងដែរ ដោយមានការប្តេជ្ញាចិត្តខ្ពស់ក្នុងការអនុវត្តវិទ្យាសាស្រ្តបច្ចេកទេសក្នុងការផលិតស្រូវ និងហ៊ានវិនិយោគសម្ភារៈបម្រើការផលិត ក៏ដូចជាចងសម្ព័ន្ធលក់ផលិតផល។ លោកលីវើង បានរៀបរាប់ ក្រោយពីរៀបការឪពុកម្ដាយទាំងសងខាងបានចែកដីស្រែ៥កុងនិងដីចម្ការ១កុងកន្លះសម្រាប់ធ្វើការរកស៊ី។ ខួបឆ្នាំប្ដីប្រពន្ធគាត់តែងសស្រាក់សស្រាំនឹងការងារស្រែចម្ការ លុះដល់រដូវប្រាំងក៏ប្រើប្រាស់ចំបើងងជញ្ជ្រាំងសម្រាប់បណ្ដុះផ្សិតចំបើងរកប្រាក់ចំណូលបន្ថែម។ ក្រោយពីប្រមូលផលស្រូវដំណាំរួច គឺទិញជីទិញថ្នាំកម្ចាត់ដង្កូវទុកសម្រាប់រដូវផលិតបន្ទាប់ សេសសល់ក្រៅពីនោះគឺទិញដីស្រែ។ ក្នុងអំឡុងឆ្នាំ១៩៩០ ដីស្រែមានតម្លៃថោក ម្ល៉ោះហើយគាត់ចេះតែសន្សែសន្សំទិញបានដីស្រែ ពី១-៥កុងជាលំដាប់។ ជាពិសេស គឺខណៈពេលទិញបានម៉ាស៊ីនភ្ជួររាស់ដីខ្នាតតូច ក្រោយពីភ្ជួរស្រែផ្ទះរួចរាល់ គាត់ក៏ដើរភ្ជួរដីស៊ីឈ្នួល មាមីង; ដល់រដូវប្រាំងដឹកដីយកឈ្នួល រក ក់ចំណូលបន្ថែម។ គាត់គិតថា នៅជនបទត្រូវតែមានដីស្រែច្រើនទើបអាចក្លាយជាអ្នកមាន ម្ល៉ោះហើយ ខួបឆ្នាំគាត់ខំប្រឹងប្រែងធ្វើការងាររកស៊ីឥតក្រែងនឿយហត់ ប្រាក់សន្សែសន្សំបានមកគឺទិញដីស្រែ។ ពេលមានដីស្រែច្រើនគ្រាន់បើ គាត់ក៏ទិញម៉ាស៊ីនត្រាក់ទ័របន្ថែមសម្រាប់ធ្វើដីស្រែផ្ទះនិងធ្វើសេវាកម្ម ប្រាក់ដែលសន្សែសន្សំបានគឺទិញដីជាបន្ត។ ចំណែកប្រពន្ធរបស់លោកវើង គឺដាំបន្លែបង្ការ បិតស្រានិងចិញ្ចឹមជ្រូកលក់រកប្រាក់ចំណូលបន្ថែម។

ដោយចេះគិតគូរក្នុងរកទទួលទាន និងប្រើប្រាស់ប្រិតសំចៃ ខណៈពេលមានដីស្រែច្រើន លោកវើង ចាប់ផ្ដើមអនុវត្តវិទ្យាសាស្រ្តបច្ចេកទេសក្នុងការផលិតស្រូវគុណភាពខ្ពស់ ជាពិសេស គឺពូជស្រូវ ST និងអនុវត្តបច្ចេកទេស “បន្ថយ៣ បង្កើន៣” “ត្រូវ១ បន្ថយ៥” IPM ។ល។ និងចងសម្ព័ន្ធជាមួយអាជីវកម្មចុះកិច្ចសន្យាប្រមូលទិញស្រូវ។ លោកលីវើង បានចែករំលែក៖ “ដើម្បីបង្កការទំនុកចិត្តឱ្យអាជីវកម្មចុះកិច្ចសន្យាសហការ ខ្ញុំបានបង្កើតក្រុមសហការផលិត អាស្រ័យខ្ញុំធ្វើជាប្រធានក្រុម ម្ល៉ោះហើយផ្ទៃដីត្រូវបានធានា និងមានកិត្យានុភាពគ្រប់គ្រាន់សម្រាប់អាជីវកម្មលំនឹងចិត្តសហការ ផ្គត់ផ្គង់ពូជស្រូវគុណភាពខ្ពស់។ ការផលិតស្រូវត្រូវតាមបទដ្ឋានរបស់អាជីវកម្ម ក្នុងមួយកុងពង្រោះពូជចាប់ពី១០-១៥គីឡូក្រាម; បាច់ជីត្រូវពេលត្រូវតាមរដូវកាល ព្យាបាលត្រូវជំងឺ ម្ល៉ោះហើយធានាបានទិន្នផល គុណភាព និងបានចំណេញខ្ពស់បង្គួរ។ រយៈពេលប៉ុន្មាន ឆ្នាំមកនេះ ខ្ញុំផលិតពូជស្រូវប្រណីត សំខាន់គឺពូជស្រូវ ST ទិន្នផលមធ្យមភាគពី៦-៧តោន/ហិកតា/រដូវ។ ក្រៅពីនោះ ខ្ញុំនៅទាំងរកបានចំណូលពីការលក់ចំបើងក្នុងតម្លៃពី២០០.០០០ -៣៥០.០០០ដុង/កុង; ចំណែកដីតាមភ្លឺប្រឡាយ ខ្ញុំដាំបន្លែបង្ការ ដោយរកបានប្រាក់ចំណូលពី ២០០.០០០ - ៥០០.០០០ដុង/ថ្ងៃ សម្រាប់ប្រើប្រាស់ប្រចាំថ្ងៃ។ អាស្រ័យហេតុនោះ ចំណូល ពីការផលិតស្រូវ ធ្វើសេវាកម្មបានប៉ុន្មាន ខ្ញុំតែងសន្សែសន្សំសម្រាប់ទិញដី”។

ជាមួយនឹងផ្ទៃដីផលិតស្រូវនិងធ្វើសេវាកម្ម លោកលីវើង បានដោះស្រាយការងារធ្វើជូនពលករជនបទចំនួន១០នាក់។ លោកង្វៀង វ៉ាន់ង៉ាង អនុប្រធានគណៈកម្មាធិការប្រជាជន ឃុំថាញ់ក្វើយ ឱ្យដឹង៖ “លោកលីវើង ជាកសិករជម្នះការលំបាកខិតខំធ្វើការរកទទួលទាន ហ៊ានអនុវត្តវិទ្យាសាស្រ្តបច្ចេកទេសក្នុងការផលិតស្រូវ និងវិនិយោគទិញ “ដ្រូនកសិកម្ម” សម្រាប់ធ្វើស្រែផង និងធើ្វសេវាកម្មផង។ មិនត្រឹមពូកែធ្វើការរកទទួលទានប៉ុណ្ណោះទេ លោក លីវើង នៅទាំងសកម្មចូលរួមការងារសុខុមាលភាពសង្គម ចូលរួមកសាងសំណង់ជនបទនៅភូមិភាគទៀតផង។ ឆ្នាំ២០២៣ លោកលីវើង បានគណៈកម្មាធិការប្រជាជនខេត្តជូនប័ណ្ណសរសើរ ពីព្រោះមានស្នាដៃឆ្នើមក្នុងចលនាកសិករផលិតនិងធ្វើអាជីវកម្មពូកែ”៕

យ្វីអាញ-ថាច់ធី

ចែករំលែកអត្ថបទ

ពាក្យគន្លឹះ