មហាសាមគ្គីជនជាតិ គំរូក្នុងសហគមន៍

04/03/2024 - 16:43

អស់ពីចិត្តដើម្បីនារីខ្មែរ

បងស្រី ឡឹមធីនឿង ប្រធានសាខាសមាគមនារីភូមិផ្នោរកំបុត ឃុំថាមដូង ស្រុកមីស្វៀង ខេត្តសុកត្រាំង តែងបានសមាជិកក្នុងសមាគមគោរពរាប់អាន។ ពីព្រោះ បងស្រីជាគរូក្នុងការអភិវឌ្ឍសេដ្ឋកិច្ច អស់ពីចិត្តជួយសមាជិកនារីខ្មែរក្នុងការកសាងគ្រួសារសុភមង្គល ជឿនលឿន។

បងស្រី ឡឹមធីនឿង ពិនិត្យបញ្ជីបុលទុនរបស់សមាជិកក្នុងសមាគម។

ឆ្នាំ២០១០ ពេលចូលរួមក្នុងសាខាសមាគមនារីភូមិ បងស្រីនឿងត្រូវបានសមាគមសហព័ន្ធនារីឃុំថាមដូង ឧបត្ថម្ភបុលទុន២០ លានដុងសម្រាប់ទិញគោចិញ្ចឹម។ តាំងពីពេលនោះមក រំលងមួយឆ្នាំគឺគោមេកើតបានកូនមួយក្បាល ប្រសិនបើកូនឈ្មោលគឺចិញ្ចឹមរហូតដល់ធំលក់ ចំណែកកូនញីគឺបងស្រីទុកចិញ្ចឹមបន្ត។ ក្រៅពីនោះ បងនឿងថែមទាំងធ្វើស្រែ៥ កុង ពេលទំនេរគឺទៅធ្វើការឈ្នួលឆ្នូកស្រូវ ដកស្មៅ ឬត្បាញកំប្លោក ដើម្បីរកប្រាក់ចំណូលបន្ថែម។ ចំណែកប្តីបងនឿងទៅធ្វើជាងសំណង់ដើម្បីជួយគ្នារកប្រាក់គិតគូរជីវភាព។ សន្សែសន្សំបន្តិចម្តងៗ រហូតដល់ឆ្នាំ ២០២២ បងស្រីសង់បានផ្ទះមួយខ្នងមានតម្លៃជាង៤០០លានដុង និងពង្រីកទម្រង់ចិញ្ចឹមគោ។ បងស្រីនឿង ឱ្យដឹង៖ “អាស្រ័យចូលរួមសកម្មភាពក្នុងសមាគម ទើបខ្ញុំកៀកជិតបានទុន បច្ចេកទេសក្នុងផលិតកម្ម ចិញ្ចឹមសត្វ ដើម្បីបង្កើនប្រាក់ចំណូល ហើយជីវភាពកាន់តែធូរធារឡើង។ ចូលរួមក្នុងសកម្មភាព សមាគម ខ្ញុំបានបងប្អូននារីចែករំលែកនូវបទពិសោធន៍ របៀបប្រិតសំចៃ របៀបរកស៊ីធ្វើមាន ទម្រង់រកស៊ីប្រកបដោយប្រសិទ្ធភាព កសាងគ្រួសារសុភមង្គល សម្បូរសប្បាយ។ល។ ដើម្បីនារីរួមគ្នាជឿនលឿន”។ ក្រៅពីធ្វើសេដ្ឋកិច្ចពូកែ បងស្រីនឿងនៅទាំងជាគំរូក្នុងការកសាងគ្រួសារ “៥គ្មាន ៣ជ្រះ” ហើយត្រូវបានសមាគមសហព័ន្ធនារីខេត្តជូនប័ណ្ណសរសើរទៀតផង។

បងស្រីឡឹមធីនឿង បានធូរធារផ្ដើមពីទម្រង់ចិញ្ចឹមគោសាច់។

ឆ្នាំ២០១៦ បងស្រីនឿងត្រូវបានបោះឆ្នោតជ្រើសរើសធ្វើជាប្រធានសាខាសាខាសមាគមនារីភូមិផ្នោរកំបុតរហូតមកទល់សព្វថ្ងៃ។ ផ្ដើមពីនោះ បងស្រីនឿងតែងខ្នះខ្នែងកៀរគរបងប្អូននារីខ្មែរចូលរួមក្នុងសមាគមដើម្បីកៀកជិតក្នុងការកសាងគ្រួសារសម្បូរសប្បាយ សុភមង្គល; រៀនសូត្រពីវិទ្យាសាស្រ្តបច្ចេកទេសក្នុងការផលិតកម្ម ចិញ្ចឹមសត្វ; ឧបត្ថម្ភទុនបុលអាទិភាព ជ្រើសរើសទម្រង់ធ្វើការរកស៊ីសមស្របជាមួយនឹងលក្ខណៈសេដ្ឋកិច្ចដើម្បីធ្វើមាន។ ជាមួយនឹងការអស់ពីចិត្ត ព្យាយាមក្នុងការកៀរគរ បងស្រីនឿងបានកៀរគរមនុស្សចូលរួមក្នុងក្រុមក្លឹប សរុបជាង ២០០ នាក់។ ទន្ទឹមនឹងនោះ ឧទ្ទេសនាមឱ្យសមាជិកបុលទុនអាទិភាពពីធនាគារគោលនយោបាយសង្គម ចាប់ពី ២០-៥០ លានដុង ដើម្បីអភិវឌ្ឍសេដ្ឋកិច្ច។ បងស្រីនឿង ក៏ជាប្រធានក្រុមបុលទុន ហើយត្រួតពិនិត្យសមាជិកក្នុងក្រុមដោយផ្ទាល់ក្នុងការប្រើប្រាស់ប្រភពទុន ទើបសមាជិកក្នុងសមាគមភាគច្រើនប្រើប្រាស់ ប្រភពទុនត្រូវចំគោលដៅប្រសិទ្ធភាពនិងសងដើមទុនត្រូវពេលកំណត់។ បងថាច់ធីវឿង ឱ្យដឹង៖ “អាស្រ័យបងស្រីនឿង កៀរគរចូលសមាគមនារីភូមិ ទើបខ្ញុំបុលទុនបាន ៣០ លានដុង ដើម្បីចិញ្ចឹមគោនិងជួលដី ៣ កុងដាំដំណាំរួមផ្សំ។ បច្ចុប្បន្ន ការចិញ្ចឹមគោសាច់ក៏ចម្រុងចម្រើន ការដាំបន្លែបង្ការប្រមូលផលខួបឆ្នាំ ម្ល៉ោះហើយសន្សំបានប្រាក់បង្គួរ សង់បានផ្ទះឥដ្ឋសមរម្យ ជីវភាពក៏ធូរធារជាបណ្ដើរៗ”។

បងស្រី ថាច់ធីផាឡាយ អនុប្រធានសមាគមសហព័ន្ធនារីឃុំថាមដូង ឱ្យដឹង៖ “បងស្រីឡឹមធីនឿង រស់នៅជិតស្និទ្ធ ស្រុះស្រួលនិងជួយសមាជិកអស់ពីចិត្តពីថ្លើម។ បងស្រីជាគំរូក្នុងការអភិវឌ្ឍសេដ្ឋកិច្ច ស្រឡាញ់មុខរបរ អស់ពីចិត្តដើម្បីភាពជឿនលឿនរបស់នារីខ្មែរនៅតំបន់ជនបទភូមិផ្នោរកំបុត”៕

យ្វីអាញ់ - ថាច់ធី

ចែករំលែកអត្ថបទ

ពាក្យគន្លឹះ