មហាសាមគ្គីជនជាតិ គំរូក្នុងសហគមន៍

03/04/2023 - 14:41

ទឹកចិត្តលោកយ័ញផល ជាមួយនឹងភូមិស្រុក

ការរួមចំណែកធ្វើផ្លូវ ជួសជុលផ្លូវជនបទ និងជួយអ្នកក្រខ្សត់ គឺជាទង្វើជាប្រចាំរបស់លោកយ័ញផល នៅភូមិទ្រុងញ៉ឹក ឃុំឡឹមតឹង ស្រុកថាញ់ទ្រី ខេត្តសុកត្រាំង។

ទោះជាមានវ័យចាស់ ប៉ុន្តែលោកយ័ញផល នៅតែជួយរៀបចំកិច្ចការផ្ទះ។

ទោះបីមានអាយុ ៦៨ ឆ្នាំហើយក្តី ប៉ុន្តែពេលដឹងថាផ្លូវជនបទបែកក្រហេងក្រហូង គឺលោកយ័ញផល តែងរួមវិភាគទានថវិកាទិញក្រួស ស៊ីម៉ងត៍ រួមជាមួយនឹងកម្មាភិបាលភូមិទៅជួសជុលផ្លូវ។ លោកយ័ញផល ឱ្យដឹង៖ “ផ្លូវជនបទធ្វើយូរហើយ ម៉ូតូ រថយន្តបើកបរច្រើន ហេតុនោះមានភាពទ្រុឌទ្រោមខ្លាំង បំផុតគឺដងផ្លូវនៅមុខផ្ទះតភ្ជាប់ឃុំថាញ់ទ្រី ត្វឹងតឹក និងថាញ់ភូ។ល។ ម៉ូតូ រថយន្តចេញចូលជារឿយៗ មានកន្លែងខ្លះរងការខូចខាត ដោយបែកក្រហេងក្រហូងតម្លុកតូចធំជាច្រើន ម្ល៉ោះហើយ ពេលមាមីងបើកបរម៉ូតូបើមិនប្រយ័ត្នងាយនឹងគ្រោះថ្នាក់ណាស់។ ព្រោះហេតុនោះ ខ្ញុំនិងកម្មាភិបាលភូមិរួមគ្នាធ្វើការជួសជុល ដើម្បីមាមីងធ្វើដំណើរនិងបើកបរបានងាយស្រួល ទាំងកាត់បន្ថយគ្រោះថ្នាក់ចរាចរណ៍”។ ការជួសជុលផ្លូវរបស់គាត់បានអនុវត្តជាហូរហែ ក្នុងអំឡុងជាច្រើនឆ្នាំមកនេះ ហើយប្រការនោះ ក៏ជាក្តីរីករាយជាទង្វើមានអត្ថន័យជាក់ស្តែង រួមចំណែកដល់ភូមិភាគ។ ទន្ទឹមនឹងនោះ គាត់ចលនាមាមីងខ្មែរនៅភូមិទ្រុងញ៉ឹក រួមវិភាគទានទឹកប្រាក់ដើម្បីដំឡើងអំពូលភ្លើងបំភ្លឺផ្លូវ កសាងបង្គោលទង់ ដាំផ្កាតាមសងខាងផ្លូវ មានប្រវែងជាង ១ គីឡូម៉ែត្រ និងរក្សាអនាម័យស្អាតបាត រួមចំណែកកសាងផ្លូវគំរូ ភ្លឺ បៃតង ជ្រះ ស្អាត បានសម្រេចជាស្ថាពរ។ ក្រៅពីនោះ គាត់នៅទាំងឧបត្ថម្ភដល់អ្នកដែលមានជីវភាពក្រីក្រនៅភូមិភាគ ដើម្បីពួកគាត់ឆ្លងកាត់ការលំបាកក្នុងជីវភាពទៀតផង។ លោកលីសុខា នៅភូមិទ្រុងញ៉ឹក ឱ្យដឹង៖ “ទឹកចិត្តជួយឧបត្ថម្ភគាំពាររបស់លោកយ័ញផលចំពោះគ្រួសារខ្ញុំ ខ្ញុំមិនអាចបំភ្លេចបានឡើយ។ ជាច្រើនឆ្នាំកន្លង ប្រពន្ធខ្ញុំឈឺ ចំណែកខ្ញុំមានវ័យចាស់មិនអាចទៅធ្វើការងារអីបាន ដោយសារបានលោកយ័ញផល ជូនជាអង្ករ សាច់ បន្លែបង្ការ មី ទឹកស៊ីអ៊ីវ។ល។ និងប្រាក់សម្រាប់ទិញថ្នាំពេទ្យថែមទៀត។ ប្រពន្ធខ្ញុំស្លាប់ទៅ ខ្ញុំគ្មានកូនចៅ ហេតុនោះខែណាក៏គាត់មកដល់ផ្ទះផ្ដល់ជូនអង្ករ និងគ្រឿបឧបភោគបរិភោគផ្សេងៗទៀត។ ក្រុមគ្រួសារលោកយ័ញផល ជាអ្នកមានចិត្តធម៌ ស្លូតបូតនិងប្រកបដោយមនុស្សធម៌ ហេតុនោះមាមីងក្នុងភូមិស្រុកអ្នកណាក៏គោរពស្រឡាញ់រាប់អាន”។

លោកយ័ញផល (ខាងស្តាំ) តែងមកដល់ផ្ទះចលនាមាមីងខ្មែរឱ្យខ្នះខ្នែងធ្វើការ
រកស៊ីដើម្បីជីវភាពបានធូរធារ។

លោកស្រីតាធីហុងមី អនុប្រធានគណៈកម្មាធិការប្រជាជនឃុំឡឹមតឹង ឱ្យដឹង៖ “លោកយ័ញផល ជាអ្នកមានប្រជាប្រិយនៅភូមិភាគ តែងត្រៀមលក្ខណៈជួយអ្នកក្រខ្សត់នៅក្នុងភូមិស្រុក និងរួមវិភាគទានយ៉ាងសកម្មដល់ភូមិភាគ។ ពេលភូមិភាគចលនាទឹកប្រាក់ អំណោយ ឬអង្ករ ដើម្បីឧបត្ថម្ភដល់អ្នកក្រខ្សត់ក្នុងឱកាសបុណ្យទានម្តងៗ លោកយ័ញផល តែងត្រៀមលក្ខណៈរួមវិភាគទានជានិច្ច។ ក្រៅពីនោះ គាត់នៅទាំងសកម្មឃោសនា ចលនាមាមីងខ្មែរគោរពបានល្អនូវគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ។ រាល់ការសម្រុះសម្រួលទំនាស់ក្នុងគ្រួសារ ឬវិវាទដីធ្លីនៅក្នុងភូមិ ពេលដែលគាត់ចូលរួមតែងទទួលបានជោគជ័យជានិច្ច”៕

យ្វីអាញ-វិមាន

ចែករំលែកអត្ថបទ

ពាក្យគន្លឹះ