មហាសាមគ្គីជនជាតិ គំរូក្នុងសហគមន៍

26/12/2022 - 15:41

គ្រួសារគំរូក្នុងការចិញ្ចឹមកូនរៀនសូត្រ

ប្តីប្រពន្ធបង លីសុីយ៉ែន នៅភូមិត្រាមាឃ ឃុំថាមដូង ស្រុកមីស្វៀង ខេត្តសុកត្រាំង បានខិតខំប្រឹងប្រែងចិញ្ចឹមកូនបីនាក់ឱ្យរៀនសូត្រក្លាយជាគ្រូបង្រៀននិងវេជ្ជបណ្ឌិត។

កូនៗរៀនសូត្របានជោគជ័យអស់ហើយ ប៉ុន្តែបងយ៉ែន នៅតែសកម្ម
ខ្នះខ្នែងក្នុងការបង្កបង្កើនផល។

បើតាមប្រសាសន៍បង លីស៊ីយ៉ែន ប្តីប្រពន្ធបងមានបំណងប្រាថ្នាតែមួយ គឺចិញ្ចឹមកូនរៀនសូត្រឱ្យក្លាយជាវេជ្ជបណ្ឌិត។ ដូច្នេះ ពេលដែលចេញនៅដោយឡែក បងមានគម្រោងរកស៊ីដើម្បីសន្សំប្រាក់ គិតគូរឱ្យកូនៗរៀនសូត្រ។ បងយ៉ែន ឱ្យដឹង៖ “ខ្ញុំរៀនបានថ្នាក់ទី ១០ ដូច្នេះ ខ្ញុំក៏ដាក់ពាក្យទៅបង្រៀនសាលាបឋមសិក្សាថាមដូង ប៉ុន្តែប្រាក់បៀវត្សរ៍គ្រូបង្រៀនកាលនោះគ្មានបានប៉ុន្មាននោះទេ។ ម៉្លោះហើយ ក្រៅពីការបង្រៀនប្តីប្រពន្ធខ្ញុំនៅឆ្លៀតធ្វើស្រែ ១,៥ កុង បិតស្រា ចិញ្ចឹមជ្រូក សន្សែសន្សំប្រាក់ដើម្បីទិញដីស្រែ”។ ក្រៅពីនោះ បងនៅទាំងជួលដីភ្លឺព្រែកដាំដំណាំរកចំណូលបន្ថែម។ រហូតដល់ឆ្នាំ ២០០៣ គ្រួសារបងមានដីស្រែដល់ទៅ ៥ ហិកតា។

ចម្ការដំណាំនេះបានជួយឱ្យ បងយ៉ែន រកបានប្រាក់ចំណូលបន្ថែម។

តាំងពីពេលនោះមក ប្ដីប្រពន្ធបងតែងខិតខំធ្វើស្រែចម្ការ ដាំដំណាំ ចិញ្ចឹមជ្រូក និងបិតស្រាខួបឆ្នាំ។ ភូមិត្រាមាឃ ជាភូមិដាច់ស្រយាលក្នុងឃុំ កាលពីមុនផ្លូវពិបាកធ្វើដំណើរណាស់ បងត្រូវចែវទូកជូនកូនដល់ផ្លូវជាតិលេខ ១A រួចហើយឱ្យកូនជិះកង់ទៅរៀនអនុវិទ្យាល័យនិងវិទ្យាល័យវ៉ាន់ង៉ុកជិញ ឃុំថាញ់ភូ និងវិទ្យាល័យហ្វាងយីវ ក្រុងសុកត្រាំង។ ដោយយល់ពីទឹកចិត្តឪពុកម្ដាយ កូនៗរបស់គាត់ក៏ខិតខំរៀនបានក្លាយជាសិស្សពូកែរបស់សាលា។ ឆ្នាំ ២០០៣ នៅពេលដែលកូនប្រុសច្បងចូលរៀនមហាវិទ្យាល័យគរុកោសល្យ ប្តីប្រពន្ធបងសប្បាយចិត្តណាស់។ ហើយរៀងរាល់ពីរឆ្នាំម្តង កូនពីរនាក់ទៀតក៏បានបន្តគ្នាចូលមហាវិទ្យាល័យឱសថសាស្រ្តនៅទីក្រុងហូជីមិញ។ បងយ៉ែន ឱ្យដឹងបន្ថែម៖ “អាស្រ័យដោយកូនៗខំរៀននិងមានផែនការអភិវឌ្ឍសេដ្ឋកិច្ចជាមុន ទើបខ្ញុំមានគ្រប់លក្ខណៈដើម្បីគិតគូរឱ្យកូនៗ។ កាលនោះ ក្នុងមួយខែខ្ញុំផ្ញើប្រាក់ឱ្យកូនម្នាក់ជាង ៥ លានដុង ដូច្នេះកូនៗស្ងប់ចិត្តរៀនសូត្របានល្អ ឱ្យតែគ្រប់ឆ្នាំគឺចេញសាលា។ បច្ចុប្បន្នកូនប្រុសរបស់ខ្ញុំទាំង ៣ នាក់ សុទ្ធតែមានការងារធ្វើ មានប្រាក់ចំណូលលំនឹង ជីវភាពធូរធារ ដូច្នេះខ្ញុំសប្បាយចិត្តនិងមានសុភមង្គលណាស់”។

កូនច្បងរបស់បងយ៉ែន គឺលីហឺវហៀង បច្ចុប្បន្ន បង្រៀននៅសាលាបឋមសិក្សាថាមដូង ២; លីហ្វាងខាយ និងលីហ្វាងដាយ ជាវេជ្ជបណ្ឌិត កំពុងបម្រើការងារនៅមន្ទីរពេទ្យឱសថសាស្ត្រក្រុងហូជីមិញ។ “គ្រួសារបងលីស៊ីយ៉ែន មិនត្រឹមតែចិញ្ចឹមកូនរៀនសូត្របានល្អប៉ុណ្ណោះទេ ថែមទាំងពូកែក្នុងការធ្វើសេដ្ឋកិច្ច ក្លាយជាគ្រួសារធូរធារនៅក្នុងភូមិស្រុកទៀតផង។ គ្រួសារបងក៏ជាគ្រួសារគំរូលេចធ្លោគួរឱ្យស្ងើចសរសើរ” – លោកតាំងទ្រុងបាវ លេខាគណៈកម្មាធិការបក្សឃុំថាមដូង បានឱ្យដឹងដូច្នេះ៕

លីធាន-លេងមី

ចែករំលែកអត្ថបទ

ពាក្យគន្លឹះ