មហាសាមគ្គីជនជាតិ ភូមិស្រុកផ្លាស់ថ្មី

18/10/2022 - 09:04

ដាំត្រសក់កូរ៉េ ក្នុងរោងសំណាញ់

បងហ្វិញសារី នៅភូមិហ្វាឡាក C ឃុំលឿងហ្វា A ស្រុកចូវថាញ់ ខេត្តត្រាវិញ គឺជាអ្នកឈានមុខដាំត្រសក់ផ្អែមក្នុងរោងសំណាញ់ អនុវត្តបច្ចេកវិទ្យាខ្ពស់។ ទម្រង់នេះបាននាំមកប្រសិទ្ធភាព ជួយដល់គ្រួសារគាត់អភិវឌ្ឍសេដ្ឋកិច្ចលំនឹង។

បងហ្វិញសារី លើកបង្ហាញផ្លែត្រសក់ផ្អែមពូជកូរ៉េ។

បងហ្វិញសារី ឱ្យដឹង៖ “រដូវនេះខ្ញុំសម្រេចចិត្តដាំត្រសក់ពូជថ្មីមកពីកូរ៉េ ប្រមូលផលបាន ២,៥ តោន/កុង ចំណេញបាន ៤៥ លានដុង។ ផ្លែត្រសក់មានពណ៌លឿងរលោង ក្នុងមួយទងប្រមូលផលបាន ៣ ផ្លែ ទោះបីផ្លែមានសណ្ឋានតូចជាងពូជត្រសក់ ២៣៨ និង TL៣ ដែលខ្ញុំដាំកាលពីរដូវមុននេះក្ដី ប៉ុន្តែពូជត្រសក់កូរ៉េមិនសូវមានជំងឺ លក់បានថ្លៃជាង អ្នកទិញសរសើរថាមានរសជាតិផ្អែមឆ្ងាញ់។ ខ្ញុំបានបំពាក់ឧបករណ៍វាស់បរិមាណស្ករ សម្រាប់ពិនិត្យមើលមុនពេលប្រមូលផល និងលកលៃក្នុងការស្រោចស្រពទឹក ដើម្បីត្រសក់មានគុណភាពល្អ ផ្អែមឆ្ងាញ់ សុវត្ថិភាពអនាម័យម្ហូបអាហារ។ រដូវខាងមុខ ខ្ញុំនឹងបន្តដាំពូជត្រសក់នេះទៀត”។

បងថាច់ចន្ធី ប្រធានសមាគមកសិករឃុំលឿងហ្វា ឱ្យដឹង៖ “ក្រុមសហការដាំដំណាំ អនុវត្តបច្ចេកវិទ្យាខ្ពស់នៅភូមិហ្វាឡាក C បានបង្កើតតាំងពីឆ្នាំ ២០១៩ មានសមាជិក ១៦ នាក់ (មានរោងសំណាញ់ចំនួន ១២ សរុបផ្ទៃដី ១២.០០០ម២) ។ ក្រុមទើបបានទទួលស្គាល់ស្លាកសញ្ញា OCOP ផ្កាយ ៣ សម្រាប់ផលិតផលត្រសក់ផ្អែម បង្កលក្ខណៈដល់ការផ្សព្វផ្សាយស្លាកសញ្ញាផលិតផលប្រកបដោយគុណភាព សុវត្ថិភាពអនាម័យម្ហូបអាហារ។ រដូវត្រសក់ផ្អែមលើកទី ២ ឆ្នាំ ២០២២ ទើបប្រមូលផលរួច ក្រុមកំពុងបន្តដាំរដូវទី ៣ ទោះបីមានភ្លៀងរលឹមក៏ដោយ ប៉ុន្តែដំណាំនៅតែលូតលាស់ល្អ ដោយសារប្រើប្រាស់រោងសំណាញ់។ ក្រុមតែងធ្វើការដោះដូរយោបល់ ជុំវិញខ្លឹមសារ ស្ដីពីបច្ចេកទេស សម្ភារៈ ពូជដំណាំ កាលបរិច្ឆេទផលិត និងខ្លឹមសារមួយចំនួនទៀតពាក់ព័ន្ធដល់សកម្មភាពរបស់ក្រុម តាមរយៈ Zalo របស់ក្រុម។ ក្រៅពីនោះ សមាជិកកសិករចូលរួមទម្រង់ ថែមទាំងបានគួបផ្សំកម្មវិធី គម្រោងរបស់ផ្នែកកសិកម្ម ដើម្បីផ្សព្វផ្សាយនូវបទពិសោធន៍ល្អៗ ទម្រង់ដាំដុះ ចិញ្ចឹមសត្វប្រកបដោយប្រសិទ្ធភាពជាដើម។ ផ្ដើមពីនោះ មុខមាត់ជនបទរបស់ភូមិភាគក៏មានការរីកចម្រើន មានទម្រង់ថ្មីៗជាច្រើនឆ្លើយតបបានតម្រូវការ ភារកិច្ចក្នុងការកសាងជនបទថ្មីកម្រិតខ្ពស់”។

ថ្វីដ្បិតប្រាក់ចំណាយសាងសង់រោងសំណាញ់ខ្ពស់បន្តិចមែន (រោងសំណាញមួយត្រូវការចំណាយជាង ៣៨០ លានដុង មិនទាន់គិតដល់ប្រព័ន្ធស្រោចស្រព) និងប្រាក់ចំណាយសម្រាប់រដូវផលិតនីមួយៗពី ៥០-៥៥ លានដុង ប៉ុន្តែសមាជិកក្នុងក្រុមត្រូវបានជំនួយបុលទុនរបស់មជ្ឈិមសមាគមកសិករវៀតណាម ក្នុងគ្រួសារម្នាក់ៗបានជិត ១០០ លានដុង៕

សឺនម៉ាល័យ - ថាច់ធី

ចែករំលែកអត្ថបទ

ពាក្យគន្លឹះ