មហាសាមគ្គីជនជាតិ ភូមិស្រុកផ្លាស់ថ្មី

21/03/2022 - 14:20

ធ្វើមានផ្តើមពីតំបន់ដីលំបាក

មិននឹកស្មានថា នៅតំបន់ដីដែលជ្រាបជាតិជូរប្រៃ ភក់ល្បាប់ពីមុននោះ ប្តីប្រពន្ធគាត់បង្កបង្កើតបានមូលដ្ឋានរកស៊ី ក្លាយទៅជាអ្នកមានបាន ដោយរកបានប្រាក់ចំណូលរាប់ពាន់លានដុងក្នុងមួយឆ្នាំ…។

ប្តីប្រពន្ធលោកផាក ជាមួយស្រែរបស់គ្រួសារ សន្យាថាឆ្នាំនេះនឹងបានផលកាក់កប់។

លោក ង្វៀងង៉ុកផាក កសិករផលិតធ្វើអាជីវកម្មពូកែនៅភូមិកីម៉ែ ឃុំចូវឡាំង ស្រុកទ្រីតូង ខេត្តអាងយ៉ាង។ លោកផាកបានឱ្យដឹង៖ “ពីមុនគ្រួសារខ្ញុំរស់នៅឃុំហោយអាង(ស្រុកចើមើយ)។ កាលនោះ ជីវភាពជួបលំបាកខ្លាំងណាស់ដោយសារធ្វើស្រែមិនមានប្រសិទ្ធភាព។ រៀងរាល់ថ្ងៃខ្ញុំតែងទៅរាវខ្យង ចាប់ក្តាមនិងទៅធ្វើការឈ្នួល ។ល។ ឆ្នាំ ១៩៩២ ដោយបានការណែនាំ គ្រួសារខ្ញុំបានសម្រេចចិត្តផ្លាស់មកនៅទីនេះដើម្បីរកស៊ីចិញ្ចឹមជីវិត។ សំណាងល្អបានគ្រួសារខាងប្រពន្ធឱ្យខ្ចីដើមទុនរកស៊ី ខ្ញុំក៏មិនញញើតទិញដីស្រែចំនួន ២ ហិកតាដើម្បីបង្កបង្កើនផល”។

ពេលទើបតែមកភូមិកីម៉ែបង្កើតអាជីព ប្តីប្រពន្ធខ្ញុំសង់បានត្រឹមតែខ្ទមស្លឹកតែលតោលនៅកណ្តាលវាល។ ដីស្រែនៅទីនេះទាបណាស់ហើយសុទ្ធតែភក់ល្បាប់ ស្មៅដុះខ្ពស់ជាងមនុស្ស។ ដាំដុះមិនមានប្រសិទ្ធភាព ម្លោះហើយ អ្នកស្រុកចោលដី ចោលស្រុកទៅជិតអស់ ។ “ពេលឃើញខ្ញុំជម្រះស្មៅ ឬព្រោះស្រូវ ភក់ល្បាប់កប់ផុតចង្កេះខោ ប្រពន្ធខ្ញុំរន្ធត់ចិត្តរហូតស្រក់ទឹកភ្នែក។ ពេលនោះខ្ញុំតែងលើកទឹកចិត្ត លួងលោមនិងប្ដេជ្ញាចិត្តពីរនាក់ប្ដីប្រពន្ធមិនចុះចាញ់ ត្រូវតែបង្កើតអាជីពឱ្យទាល់តែបាន! “ លោកផាក រំលឹក។ ហើយរដូវស្រូវលើកដំបូង ទិន្នផលស្រូវសម្រេចបាន ៣០ ថាំងក្នុងមួយកុង។ នេះជាលទ្ធផល “មិនទាន់នរណាមាន ” នៅតំបន់ដីដ៏លំបាកនេះ!” ...ស្រូវត្រូវ “បែកដៃ”! ការលំបាកហត់នឿយទាំងប៉ុន្មាននាពេលនេះ ហាក់ដូចជារលាយបាត់តែម្តង។ ចាប់តាំងពីពេលនោះ ខ្ញុំមានក្តីជឿជាក់និងកម្លាំងចិត្តបន្ថែម ដើម្បីប្តីប្រពន្ធខ្ញុំច្បាមតំបន់ដីនេះ”លោកផាកចែករំលែក។

ដងផ្លូវក្រាលក្រួសល្អិតប្រវែង៥គីឡូម៉ែត្រ អាស្រ័យលោកផាកនិងមាមីងបងប្អូនរួមគ្នាកសាង បានបង្កលក្ខណៈងាយស្រួលសម្រាប់ការធ្វើដំណើរទៅមក និងការជួញដូរមុខទំនិញ។

ដោយយល់ថា ចំណេះដឹងក្នុងការធ្វើស្រែនៅឱនថយនៅឡើយ ដូច្នេះហើយ លោកផាកក៏សកម្មចូលរួមរាល់វគ្គហ្វឹកហ្វឺន និងសិក្ខាសាលាអំពីការអនុវត្តវិទ្យាសាស្ត្រ និងបច្ចេកទេស ក្នុងការផលិត ។ល។ ក្រៅពីនោះ លោកថែមទាំងសកម្មទៅទស្សនកិច្ចសិក្សានូវទម្រង់ផលិត អាជីវកម្មល្អៗនៅក្នុងនិងក្រៅខេត្ត ដើម្បីរៀនសូត្របទពិសោធន៍បន្ថែម។ ជាពិសេស ក្នុងប៉ុន្មានឆ្នាំជិតៗនេះ លោកក៏បានជួលយន្តហោះ គ្មានមនុស្សបើក (Drone) ដើម្បីបម្រើក្នុងការបង្កបង្កើនផលស្រូវ។ អាស្រ័យតុនេះ ការបង្កបង្កើនផលស្រូវរបស់គាត់ កាត់បន្ថយបានការចំណាយ ប្រសិទ្ធភាពសេដ្ឋកិច្ចក៏កើនឡើង។ ខិតខំពលកម្មផង ប្តីប្រពន្ធលោកប្រិតសំចៃក្នុងការចាយវាយផង ។ល។ ប្រាក់ដែលសន្សំសំចៃបានលោកក៏យកទៅទិញដីស្រែទាំងអស់។ ផ្តើមពី ២ ហិកតាដំបូង ឥឡូវប្តីប្រពន្ធលោកមានដីស្រែដល់ទៅ ២០ ហិកតា។ ផ្តើមពីជីវភាពលំបាក គ្រួសារលោកពេលនេះអាចនិយាយបានថា “សល់ហូប សល់ប្រើ” ដោយរកប្រាក់ចំណូលរាប់ពាន់លានដុងក្នុងមួយឆ្នាំ។

ប្រធានសមាគមកសិករឃុំចូវឡាំង អ្នកស្រី ង្វៀងធីមីហាញ់ បានឱ្យតម្លៃ៖ លោកផាកគឺជាកសិករឆ្នើមក្នុងការផលិតនិងអាជីវកម្មជាច្រើនឆ្នាំមកហើយ។ ក្រៅពីនោះ លោកនិងក្រុមគ្រួសារនៅទាំងបានរួមចំណែកជាច្រើនសម្រាប់ភូមិភាគ ដូច៖ ចូលរួមមូលនិធិគាំទ្រកសិករ; មូលនិធិសម្រាប់ជនក្រីក្រ; ឧបត្ថម្ភថ្ងៃពលកម្មនិងប្រាក់ធ្វើផ្លូវជនបទ ស្ពានជនបទ៕

ថាញ់ឡុង-សាហ្វៀង

ចែករំលែកអត្ថបទ

ពាក្យគន្លឹះ