សុខភាព - អប់រំ អប់រំ

04/10/2021 - 07:20

សើុងង៉ុកហាយ ឆ្លងកាត់ការលំបាករៀនពូកែ

ទោះបីស្ថានភាពគ្រួសារជួបការលំបាកក៏ដោយ ប៉ុន្តែសើុងង៉ុកហាយ នៅអនុសង្កាត់ ៤ សង្កាត់ ៨ ក្រុងត្រាវិញ ខេត្តត្រាវិញ តែងខិតខំរៀនសូត្រ ក្លាយជាសិស្សរៀនពូកែតាំងពីថ្នាក់ទី ១ ដល់ថ្នាក់ទី ១២។

ប្អូនសើុងង៉ុកហាយ។

សើុងង៉ុកហាយ កើតនិងធំឡើងក្នុងគ្រួសារក្រីក្រមួយនៅអនុសង្កាត់ ៤ សង្កាត់ ៨ ក្រុងត្រាវិញ ខេត្តត្រាវិញ។ អាស្រ័យស្ថានភាពគ្រួសារ ប្អូនហាយរស់នៅជាមួយនឹងជីដូនខាងម្តាយ និងអ្នកមីងបង្កើត។ ទោះបីជីដូនមានវ័យចាស់ក៏ដោយ ប៉ុន្តែគាត់តែងទៅលក់ឆ្នោតរកប្រាក់ចិញ្ចឹមប្អូនហាយរៀនសូត្រ។ មិនឱ្យជីដូនខកបំណង ហាយតែងខិតខំរៀនសូត្រឱ្យបានពូកែ និងក្លាយជានិស្សិតផ្នែកគរុកោសល្យជីវវិទ្យានៃមហាវិទ្យាល័យគរុកោសល្យក្រុងហូជីមិញ ក្នុងឆ្នាំសិក្សា២០២១-២០២២នេះ។

សើុងង៉ុកហាយ សំណេះសំណាល៖ “ទោះបីជីវភាពលំបាក ប៉ុន្តែគ្រួសារតែងបង្កលក្ខណៈឱ្យប្អូនបានទៅរៀនដូចមិត្តភកិ្តដែរ។ ហេតុនោះ ប្អូនតែងឧស្សាហ៍ព្យាយាមរៀនសូត្រ ដើម្បីសម្រេចបានលទ្ធផលល្អ ទុកជាអំណោយជូនគ្រួសារ”។ ដោយឃើញជីដូននិងអ្នកមីងនឿយហត់ ម្ល៉ោះហើយ ឱ្យតែដល់រដូវវិស្សមកាល ង៉ុកហាយតែងទៅធ្វើកម្មករសំណង់ ឬរត់តុនៅហាងកាហ្វេ។ល។ រកបានប្រាក់ខ្លះៗជួយគ្រួសារ។ ង៉ុកហាយ បង្ហើបឱ្យដឹង៖ “ជីដូនគាត់ប្រាប់ថា ឪពុកប្អូនទៅចោលពេលម្តាយពពោះ។ ចំណែកម្តាយវិញ ក្រោយពីសម្រាលប្អូនមក គាត់ក៏ផ្ញើប្អូនឱ្យនៅជាមួយនឹងជីដូន រួចគាត់ក៏មានគ្រួសារថ្មីទៅរស់នៅស្រុកឆ្ងាយ។ រហូតមកដល់ពេលនេះ ប្អូនមិនស្គាល់មុខមាត់ឪពុក និងចាំមិនច្បាស់ពីមុខមាត់ រូបរាងម្តាយរបស់ប្អូននោះទេ។ ក៏ប៉ុន្តែប្អូនបានជីដូននិងអ្នកមីងស្រឡាញ់ ចិញ្ចឹមឱ្យរៀនសូត្រ។ មានពេលខ្លះប្អូនតូចចិត្តណាស់ដែរ ប៉ុន្តែប្អូនបានយកប្រការនោះ ធ្វើជាកម្លាំងចលករសម្រាប់ជំរុញខ្លួនឯងរៀនឱ្យពូកែ ដើម្បីពេលអនាគតមានការងារធ្វើ ចិញ្ចឹមជីដូននិងអ្នកមីងវិញ។ ពិសេស គឺធ្វើជាគំរូដល់មិត្តភ័ក្តិដែលមានស្ថានភាពលំបាកដូចប្អូន ដើម្បីពេលខាងមុខមានអនាគតភ្លឺស្វាង”។

អ្នកគ្រូថាច់ធីសារ៉ាវី នាយកសាលាវិទ្យាល័យជនជាតិអន្តេវាសិកខេត្តត្រាវិញ ឱ្យដឹង៖ “ប្អូនហាយ តែងគោរពលោកគ្រូអ្នកគ្រូ ស្និទ្ធស្នាលជាមួយនឹងមិត្តភ័ក្តិ ហើយតែងជួយដល់មិត្តរៀនខ្សោយនិងសកម្មចូលរួមរាល់ការចលនារបស់សាលា។ មិនត្រឹមតែស្លូតបូត រៀនពូកែប៉ុណ្ណោះទេ ប្អូនហាយ នៅទាំងជាចៅម្នាក់លុះក្នុងដំបូន្មាន។ រដូវវិស្សមកាល ប្អូនង៉ុកហាយ តែងឆ្លៀតរកការងារធ្វើដើម្បីរកប្រាក់ជួយទំនុកបម្រុងគ្រួសារ។ ប្អូនគឺជាគំរូសិស្សក្រីក្រ ឆ្លងកាត់ការលំបាក រៀនពូកែរបស់សាលា”៕

សើុងម៉ាល័យ-វិមាន

ចែករំលែកអត្ថបទ

ពាក្យគន្លឹះ