មហាសាមគ្គីជនជាតិ គំរូក្នុងសហគមន៍

26/07/2021 - 08:41

ទឹកព្រះទ័យរបស់ព្រះតេជព្រះគុណ ត្រឹងយ៉ឹង

ព្រះតេជព្រះគុណ ធម្មសុវណ្ណិកោ ត្រឹងយ៉ឹង ព្រះចៅអធិការវត្តនាគវនារាម (ខ្ទឹង) អនុសង្កាត់ ១០ សង្កាត់ ៧ ក្រុងត្រាវិញ ខេត្តត្រាវិញ រយៈកាលជាង ៣១ ព្រះវស្សានៃការសាងផ្នួសព្រះអង្គបានរួមចំណែកយ៉ាងច្រើនក្នុងបុព្វហេតុអប់រំ។ ក្រៅពីនោះ ព្រះអង្គនៅទាំងបានជួយគ្រួសារក្រីក្រជាច្រើន ជម្នះលំបាកក្នុងជីវភាព។

ព្រះតេជព្រះគុណ ត្រឹងយ៉ឹង ប្រគល់អាហារូបករណ៍ ១០ ចំណែកដល់អ្នកយកព័ត៌មានកាសែតកឹងធើ ដើម្បីកាសែតកឹងធើ ចាត់តាំងជ្រើសរើសនិងប្រគល់ឱ្យសិស្ស និស្សិតខ្មែរក្រីក្រ សង្វាតរៀនសូត្រកំពុងរៀននៅក្រុងកឹងធើ។

ឆ្នាំ ១៩៩០ យុវជនត្រឹងយ៉ឹង បានចូលសាងផ្នួសនៅវត្តនាគវនារាមខ្ទឹង ដើម្បីតបស្នងសងគុណឪពុកម្តាយ។ ក្នុងរយៈពេលសិក្សារៀនសូត្រ ព្រះតេជព្រះគុណ ត្រឹងយ៉ឹង តែងឧស្សាហ៍ព្យាយាមសិក្សារៀនសូត្រធម៌ វិន័យ អក្សរសាស្រ្តជាតិ។ ឆ្នាំ២០០៤ ព្រះអង្គបានព្រះសង្ឃ និងគណៈកម្មការ ពុទ្ធបរិស័ទ ជឿទុកចិត្តតែងតាំងជាព្រះចៅអធិការវត្ត រហូតមកដល់សព្វថ្ងៃ។

ទទួលតួនាទីជាព្រះចៅអធិការវត្ត ព្រះតេជព្រះគុណធម្មសុវណ្ណិកោ ត្រឹងយ៉ឹង តែងយកព្រះទ័យគិតគូរការងារកសាងវត្តអារាម ជាក់ស្ដែងព្រះអង្គបានចលនាពុទ្ធបរិស័ទកសាងខ្លោងទ្វារ ជួសជុលព្រះវិហារ សមណកុដិ សាលា ឈាបនដ្ឋាន របងវត្ត និងសមិទ្ធិផលជាច្រើនទៀត។ ក្រៅពីនោះ ព្រះអង្គនៅទាំងចលនាពុទ្ធបរិស័ទនិងសប្បុរសជនទាំងក្នុងនិងក្រៅខេត្ត ជូនអំណោយដល់អ្នកក្រ សិស្សក្រីក្រ សង្វាតរៀនសូត្រនៅភូមិភាគ ព្រមទាំងបានជូនអាហារូបករណ៍ចំនួន ១០ ចំណែកដល់និស្សិតក្រីក្រកំពុងរៀននៅក្រុងកឹងធើផងដែរ (អំណោយមួយចំណែកតម្លៃ ១ លានដុង)។ កាលពីឆ្នាំ ២០២០ ព្រះអង្គចលនាសប្បុរសជនប្រគេនម៉ាស់ អាល់កុលដល់ព្រះសង្ឃខ្មែរនៅក្នុងខេត្ត ១៤៣ វត្ត ដើម្បីបង្ការប្រឆាំងជំងឺ COVID-១៩។ ព្រះតេជព្រះគុណ ធម្មសុវណ្ណិកោ ត្រឹងយ៉ឹង មានថេរដីកា៖ "ចំពោះទង្វើជាក់ស្តែងទាំងអស់នេះ គឺអាត្មាប្រតិបត្តិតាមធម៌វិន័យរបស់ព្រះសម្មាសម្ពុទ្ធ និងរៀនសូត្រតាមសីលធម៌ ឥរិយាបថរបស់អ៊ំហូ។ ដើម្បីឱ្យពុទ្ធបរិស័ទជ្រួតជ្រាបអំពីឧត្តមគតិរបស់អ៊ំ ពេលទៅទេសនាម្តងៗ អាត្មាភាពតែងលើកយកនូវមេរៀនជីវិតជាក់ស្តែង ដើម្បីពន្យល់ដល់ពុទ្ធបរិស័ទធ្វើតាម"។

លោកគឹមសាល ប្រធានគណៈកម្មការវត្ត បញ្ជាក់ឱ្យដឹង៖ "ជាមួយនឹងតួនាទីជាព្រះសង្ឃមានប្រជាប្រិយ អនុប្រធានសមាគមព្រះសង្ឃសាមគ្គីស្នេហាជាតិក្រុងត្រាវិញ ប្រធានគណៈកម្មការវប្បធម៌ក្រុងត្រាវិញ ប្រធានគណៈកម្មការអប់រំព្រះសង្ឃ ដូនជីក្រុងត្រាវិញ ព្រះតេជព្រះគុណ ត្រឹងយ៉ឹង នៅទាំងរួមជាមួយនឹងរដ្ឋអំណាចភូមិភាគឃោសនា ចលនាមាមីងពុទ្ធបរិស័ទអនុវត្តល្អនូវគោលការណ៍របស់បក្ស គោលនយោបាយ ច្បាប់របស់រដ្ឋ។ ព្រះអង្គតែងចូលរួមនូវសកម្មភាពសប្បុរសធម៌សង្គម ដើម្បីជួយឱ្យជីវភាពជនរួមជាតិខ្មែរកាន់តែល្អប្រសើរពីមួយថ្ងៃទៅមួយថ្ងៃ។ ក្រៅពីនោះ ព្រះអង្គនៅទាំងបង្កើតបានវង់ភ្លេងឆៃយុាំ បើកថ្នាក់បង្រៀនអក្សរខ្មែរក្នុងរដូវវិស្សមកាលដល់កូនចៅខ្មែរទៀតផង ម្ល៉ោះហើយមាមីងខ្មែរអ្នកណាក៏គោរពរាប់អានព្រះអង្គ"៕

សើុងម៉ាល័យ-វិមាន

ចែករំលែកអត្ថបទ

ពាក្យគន្លឹះ