ព្រឹត្តិការណ៍ - នយោបាយ ព្រឹត្តិការណ៍

23/02/2021 - 08:40

ផ្គត់ផ្គង់អគ្គិសនីដល់ប្រជាជននៅតំបន់ឆ្ងាយដាច់ស្រយាល តំបន់ព្រំដែន កោះសមុទ្រជាង ១៧ លានគ្រួសារ

នៅហាណូយ ក្រសួងឧស្សាហពាណិជ្ជកម្ម ទើបចាត់តាំងកិច្ចប្រជុំបូកសរុបកម្មវិធីទិសដៅ ចែកចាយអគ្គិសនីជនបទដល់តំបន់ភ្នំ និងតំបន់កោះសមុទ្រ ដំណាក់កាល ២០១៦- ២០២០។

អ្នកតំណាងចូលរួម ថ្លែងយោបល់ក្នុងកិច្ចប្រជុំ។

អគ្គិសនីនីយកម្មជនបទ គឺជាសមិទ្ធិផលមួយក្នុងចំណោមសមិទ្ធិផលសំខាន់ៗ លេចធ្លោបំផុតរបស់វៀតណាម ជាមួយនឹងអត្រាគ្រួសារមានអគ្គិសនីប្រើប្រាស់ កើនពី ២,៥% ក្នុងឆ្នាំ ១៩៧៥ ឡើងដល់ ៩៦% ក្នុងឆ្នាំ ២០០៩ លុះដល់ឆ្នាំ ២០១៩ ឡើង ៩៩,៥៣% (រួមទាំងទីក្រុង និងជនបទ)។ វៀតណាមសម្រេចជោគជ័យក្នុងការចែកចាយអគ្គិសនីដល់គ្រួសារប្រជាជនជាង ១៧ លានគ្រួសារ នៅតំបន់ជនបទ តំបន់ឆ្ងាយដាច់ស្រយាល តំបន់ព្រំដែនកោះ សមុទ្រ។ នៅតំបន់ជនបទ អត្រាគ្រួសារប្រជាជនមានអគ្គិសនីប្រើប្រាស់គិតមកទល់នឹងថ្ងៃ ៣១/១២/២០១៩ សម្រេច ៩៩,២៦% នៅសល់ប្រមាណ ០,៧៤% គ្រួសារ ប្រជាជនតំបន់ជនបទដែលពុំទាន់បានតភ្ជាប់អគ្គិសនី។

សេចក្តីសម្រេចចិត្តលេខ ១៧៤០/QĐ-TTg ឆ្នាំ ២០១៨ របស់នាយករដ្ឋមន្រ្តីនៃរដ្ឋាភិបាល ផ្តល់សច្ចានុមតិកម្មវិធីទិសដៅចែកចាយអគ្គិសនីជនបទដល់តំបន់ភ្នំ និងតំបន់កោះ សមុទ្រ ដំណាក់កាល ២០១៦-២០២០ ព្រមទាំងដាក់ចេញទិសដៅចែកចាយបណ្ដាញអគ្គិសនីជាតិ ដល់ឃុំដែលមិនទាន់មានអគ្គិសនីចំនួន ១៧ មានប្រមាណ ១.០៧៦.០០០ គ្រួសារក្នុងភូមិចំនួន ៩.៨៩០។ បច្ចុប្បន្ន ឃុំទាំង ១៧ នោះ បានតភ្ជាប់អគ្គិសនីសម្រេច ១០០% តែចំនួនគ្រួសារថ្មីសម្រេច ២០៤.៧៣៧ គ្រួសារ (ស្រូបអត្រា ១៩%)។ ក្រៅពីនោះ បានតភ្ជាប់អគ្គិសនីដល់កោះចំនួន ៥ (កោះលីសើុង បាត់ឡុងវី ញើុងចូវ កូវឡៅចាម កោះត្រឹង និងកៃចៀង)។

ដំណាក់កាល ២០២១-២០២៥ កម្មវិធីនឹងផ្សព្វផ្សាយចែកចាយអគ្គិសនីដល់គ្រួសារប្រជាជនប្រមាណ ៨៧១.២៦៣ គ្រួសារ (ក្នុងនោះ គ្រួសារដែលពុំទាន់មានអគ្គិសនីប្រមាណ ១៥៣.៩១១ គ្រួសារ ស្រូបអត្រា ០,៧៤%។ គ្រួសារដែលបានចែកចាយអគ្គិសនី៧១៧.៣៥២ គ្រួសារ ប៉ុន្តែអគ្គិសនីមិនទាន់លំនឹងប្រក្រតី) នៅភូមិចំនួន ៦.៨១១ លើភូមិសាស្រ្តឃុំចំនួន ២.១៩៧។ ការផ្គត់ផ្គង់អគ្គិសនីដល់ស្ថានីយ៍ បូមទឹកខ្នាតល្មមនិងតូចចំនួន ២.៦៣៨ នៅខេត្តទាំង ១៣ តំបន់វាលរាបទន្លេគឺវឡុង សហការចែកចាយអគ្គិសនីជូនប្រជាជន ព្រមទាំងស្នើបំពេញបន្ថែមចែកចាយអគ្គិសនីជាតិ ឬប្រភពថាមពលអគ្គិសនីកែច្នៃដល់កោះឯទៀត រួមមាន៖ កោះកោង-ក ខេត្តក្វាងទ្រី កោះថោជូ អាងសើុង និងណាមយូខេត្តគៀងយ៉ាង និងភូមិនានានៅតំបន់កោះ រួមមាន៖ និញតឹង និញដាវ ឌែបសើុងប៊ិតដឹម ខេត្តខាញ់ហ្វា តភ្ជាប់អគ្គិសនីជាតិដល់កោះកោងដាវខេត្តបារ៉ៀ-វ៉ុង តាវ។

ថ្លែងយោបល់ក្នុងកិច្ចប្រជុំ លោកឌាំងហ្វាងអាង អនុរដ្ឋមន្រ្តីក្រសួងឧស្សាហពាណិជ្ជកម្ម ឱ្យដឹង៖ កម្មវិធីចែកចាយអគ្គិសនីជនបទ តំបន់ភ្នំ និងកោះសមុទ្ររបស់វៀតណាម បានជួយប្រជាជនបង្វែររចនាសម្ព័ន្ធពូជដំណាំ មានទ្រង់ទ្រាយ និងផ្លាស់ប្តូរទម្លាប់ផលិត ដាំដុះ និងចិញ្ចឹមសត្វ ។ល។ រួមចំណែកបង្កើនទិន្នផលដាំដុះនិងកែច្នៃកសិផលនិងរុក្ខផល បង្កើនប្រាក់ចំណូលដល់គ្រួសារប្រជាជននៅតំបន់ជនបទ។ ទន្ទឹមនឹងនោះ មធ្យោបាយស្តាប់ មើលត្រូវបានប្រើប្រាស់ទូទៅកាន់តែច្រើនគ្រប់គ្រួសារ ផ្តើមពីនោះ ជួយលើកស្ទួយជីវភាពវប្បធម៌ បង្កើនកម្រិតប្រជាបញ្ញា នាំមកប្រយោជន៍ជាមូលដ្ឋាននិងយូរអង្វែងដល់ភូមិភាគ ជាមូលដ្ឋានគ្រឹះសម្រាប់កសាងជនបទថ្មីក្នុងសម័យឧស្សាហូបនីយកម្ម និងសមាហរណកម្មសេដ្ឋកិច្ចអន្តរជាតិ៕

យោង៖ កាសែតជនជាតិនិងអភិវឌ្ឍន៍- ប្រែសម្រួល៖ មុនី

ចែករំលែកអត្ថបទ

ពាក្យគន្លឹះ