ព្រឹត្តិការណ៍ - នយោបាយ ព្រឹត្តិការណ៍

01/04/2020 - 14:40

ផ្អាកសកម្មភាពប្រមូលផ្ដុំពុទ្ធបរិស័ទកុះករក្នុងឱកាសបុណ្យចូលឆ្នាំថ្មី

(កឹងធើ) -ប្រចាំការសមាគមព្រះសង្ឃសាមគ្គីស្នេហាជាតិក្រុងកឹងធើ ទើបមានលិខិតមួយច្បាប់ផ្ញើប្រគេននិងជូនព្រះចៅអធិការតាមវត្តពុទ្ធសាសនាខ្មែរ វិជ្ជាស្ថានពុទ្ធសាសនាទក្ខិណានិកាយខ្មែរ អាចារ្យ គណៈកម្មការវត្តនិងពុទ្ធបរិស័ទនៅតាមចំណុះជើងវត្ត ស្ដីពីការអនុវត្តយ៉ាងមុឺងម៉ាត់នូវបទបញ្ជា១៥/CT-TTg និងបទបញ្ជា១៦/CT-TTg របស់នាយករដ្ឋមន្រ្តីនៃរដ្ឋាភិបាល ស្ដីពីវិធានការចាំបាច់ក្នុងការបង្ការ ទប់ស្កាត់ជំងឺឆ្លង COVID-១៩ ចាប់ពីពេលនេះរហូតដល់ថ្ងៃ១៥ ខែមេសាឆ្នាំ ២០២០។

វត្តពិទូឃោសរង្សី បិទទ្វារបណ្តោះអាសន្ន ផ្អាកទទួលភ្ញៀវនិងពុទ្ធបរិស័ទមកកាន់វត្ត។

យោងតាមនោះ បុណ្យចូលឆ្នាំថ្មីប្រពៃណីជាតិរបស់ជនរួមជាតិខ្មែរ ដែលប្រព្រឹត្តឡើងចាប់ពីថ្ងៃ១៣-១៦ ខែមេសា ឆ្នាំ២០២០ ប្រចាំការសមាគមព្រះសង្ឃសាមគ្គីស្នេហាជាតិក្រុងកឹងធើ សំណូមពរ៖ ផ្អាកការប្រមូលផ្ដុំពុទ្ធបរិស័ទកុះករនៅតាមវត្តអារាមមានពិធីទទួលទេវតាឆ្នាំថ្មីនៅវេលាម៉ោង២០និង៤៨នាទី ថ្ងៃ១៣/៤/២០២០។ ផ្អាកពិធីពូនភ្នំខ្សាច់ដោយការប្រមូលផ្ដុំពុទ្ធបរិស័ទច្រើនកុះករនៅតាមវត្ត (ត្រឹមតែពូនភ្នំខ្សាច់ជានិមិត្តរូប)។ ផ្អាកបុណ្យឆាកមហាបង្សុកូលដោយទ្រង់ទ្រាយប្រមូលផ្ដុំពុទ្ធបរិស័ទច្រើនកុះករក្នុងព្រះវិហារ; ត្រឹមតែបង្សុកូលនៅតាមចេតិយជុំវិញវត្ត ប៉ុន្តែការចូលរួមមិនលើសពី២នាក់ សូត្រធម៌ដោយសង្ខេប។ ផ្អាកពិធីស្រង់ព្រះដែលប្រមូលផ្ដុំពុទ្ធបរិស័ទច្រើនកុះករ; ដោយមានត្រឹមតំណាងព្រះសង្ឃ គណៈកម្មការ អាចារ្យវត្ត (ថ្ងៃ១៦ ខែមេសា ឆ្នាំ២០២០)។ ផ្អាករាល់សកម្មភាពវប្បធម៌ សិល្បៈ កីឡា ច្រៀងរាំ លេងល្បែងកម្សាន្តតាមទីវត្ត។ ចំណែកនៅតាមភូមិស្រុក ប្រចាំការសមាគមព្រះសង្ឃសាមគ្គីស្នេហាជាតិក្រុងកឹងធើ សំណូមពរ៖ ផ្អាកដាច់ខាត់នូវបុណ្យកម្សាន្តភូមិ - នៅតាមភូមិស្រុកនានា ពិធីរៀបអាពាហ៍ពិពាហ៍ បុណ្យសព ។ល។ (ប្រសិនបើចាត់តាំងគឺចាត់តាំងដោយទ្រង់ទ្រាយតូច មិនត្រូវលើសពី២០នាក់តាមសេចក្ដីកំណត់)។ កាត់បន្ថយទៅវត្តប្រមូលផ្ដុំគ្នាច្រើន គ្រួសារនីមួយៗតំណាងម្នាក់យកចង្ហាន់ ឬទេយ្យវត្ថុផ្សេងៗប្រគេនព្រះសង្ឃ រួចហើយវិលមកផ្ទះ; កន្លែងមានមនុស្សម្នាកុះករត្រូវពាក់ម៉ាស់តាមកំណត់។ ផ្អាកការចាត់តាំងជប់លៀងតាមគ្រួសារនិងភូមិស្រុក; ចំពោះការផ្ងូតទឹកសម្តែងការតបស្នងសងគុណចំពោះអ្នកមានគុណក្នុងឱកាសបុណ្យចូលឆ្នាំថ្មី គប្បីប្រារព្ធជាលក្ខណៈគ្រួសារ។

ព្រះចៅអធិការគ្រប់វត្តមានភារកិច្ចផ្សព្វផ្សាយស្មារតីតាមបទបញ្ជា១៥/CT-TTg បទបញ្ជា១៦/CT-TTg ចាប់ពីថ្ងៃនេះរហូតដល់ថ្ងៃ១៥ ខែមេសា ឆ្នាំ២០២០។ ព្រមជាមួយនោះ សហការជាមួយសុខាភិបាលភូមិភាគ ដើម្បីធ្វើការវាស់កម្ដៅខ្លួននិងថែទាំសុខភាពដល់ព្រះសង្ឃ ពុទ្ធបរិស័ទ រាយការណ៍សុខាភិបាលតាមសេចក្ដីកំណត់។ ផ្អាករាល់សកម្មភាពបុណ្យប្រវេណីរបស់ជនរួមជាតិខ្មែរនិងបុណ្យប្រវេណីសាសនាដែលមានលក្ខណៈទ្រង់ទ្រាយធំ។

តាមថេរដីកាព្រះតេជព្រះគុណ លីហ៊ុង អនុប្រធានប្រចាំការនៃសមាគមព្រះសង្ឃសាមគ្គីស្នេហាជាតិក្រុងកឹងធើ៖ អនុវត្តបទបញ្ជា១៥/CT-TTg បទបញ្ជា១៦/CT-TTg របស់នាយករដ្ឋមន្រ្តីនៃរដ្ឋាភិបាល គាំទ្រការអំពាវនាវរបស់សមាគមព្រះសង្ឃសាមគ្គីស្នេហាជាតិក្រុងកឹងធើ មានវត្តខ្មែរជាច្រើនលើភូមិសាស្រ្តក្រុងកឹងធើ បានបិទទ្វារជាបណ្តោះអាសន្ន កាត់បន្ថយទទួលភ្ញៀវនិងពុទ្ធបរិស័ទមកកាន់វត្តរហូតដល់មានសេចក្ដីប្រកាសថ្មី៕

ថាញ់ឡុង - ថាច់ធី

ចែករំលែកអត្ថបទ

ពាក្យគន្លឹះ