មហាសាមគ្គីជនជាតិ គំរូក្នុងសហគមន៍

10/06/2019 - 17:02

ខ្នះខ្នែងគិតគូរដល់គ្រួសារគោលនយោបាយ

ខេត្តសុកត្រាំង បានអនុវត្តល្អការងារ “តបស្នងសងគុណ” និង “ផឹកទឹកនឹកប្រភព” ដោយមានសកម្មភាពជាក់ស្តែងជាច្រើន សំដៅឧបត្ថម្ភដល់គ្រួសារគោលនយោបាយ។ ផ្តើមពីនោះ គ្រួសារគោលនយោបាយជាច្រើន មានលំនៅឋានលំនឹង មានដើមទុនពង្រីកសេដ្ឋកិច្ច ឈានឡើងក្នុងជីវភាព។ល។

លោកផាងវ៉ាន់សៅ សមាជិកមជ្ឈិមបក្សលេខាគណៈកម្មាធិការបក្សខេត្តសុកត្រាំង ជូនអំណោយដល់គ្រួសារគោលនយោបាយនៅស្រុកត្រឹងដេ។

ដោយកំណត់ច្បាស់នូវការចលនា “តបស្នងសងគុណ” និង “ផឹកទឹកនឹកប្រភព” គឺជាភារកិច្ចដ៏ធំធេង និងជាមនោសញ្ចេតនាយ៉ាងជ្រាលជ្រៅចំពោះអ្នកដែលបានពលីជីវិត ដើម្បីឯករាជ្យជាតិ ម្ល៉ោះហើយភូមិភាគនានាក្នុងខេត្ត បានកៀរគរប្រភពធនធានពីធុរជន សប្បុរសជន គណៈ ផ្នែក និងអង្គការមហាជន រួមវិភាគទានជូនមូលនិធិ “តបស្នងសងគុណ” ។ តាមប្រសាសន៍លោកម៉ាជីថាញ់ នាយករងមន្ទីរការងារយុទ្ធជនពិការនិងសង្គមកិច្ច ឲ្យដឹង៖ ក្នុងខេត្ត មានអ្នកមានសគុណចំពោះបដិវត្តន៍ចំនួន៥០.១៨៤រូប។ ច្រើនឆ្នាំមកនេះ ផ្តើមពីមូលនិធិ “តបស្នងសងគុណ” ខេត្តបានសាងសង់ផ្ទះឧបការគុណជូនអ្នកទាំងនោះចំនួន១៧.២២៤ខ្នង គិតជាតម្លៃទឹកប្រាក់ជាង៤០៦ពាន់លានដុង។ ថ្វីត្បិតដូច្នោះ ក្តីក្នុងខេត្តនៅមានគ្រួសារអ្នកមានសគុណចំពោះបដិវត្តន៍ជាច្រើនទៀតនៅលំបាកពីលំនៅឋានផងដែរ។ ឆ្នាំនេះ មន្ទីរការងារយុទ្ធជនពិការនិងសង្គមកិច្ច ក៏បានស្នើគណៈកម្មាធិការប្រជាជនខេត្ត បន្តការសាងសង់ផ្ទះថ្មី១៥៤ខ្នង ពីថវិកាមូលនិធិ “តបស្នងសងគុណ” ផ្ទះមួយខ្នងៗគិតជាទឹកប្រាក់៤០លានដុង។

ប្រគល់ផ្ទះឧបការគុណដល់គ្រួសារគោលនយោបាយនៅស្រុកត្រឹងដេ។

លោកឡេវ៉ាន់ប៊ិញ យុទ្ធជនពិការ៤/៤ នៅសង្កាត់ទី៥ ក្រុងសុកត្រាំង ទើបទទួលបានផ្ទះឧបការគុណ ឲ្យដឹង៖ “ខ្ញុំមានការត្រេកអរណាស់ ពេលបានបក្សរដ្ឋសង់ផ្ទះជូនគ្រួសារខ្ញុំ។ ម្យ៉ាងទៀត ប្តីប្រពន្ធខ្ញុំចាស់ជរា ប្រពន្ធលក់ឆ្នោត ចំណែកខ្ញុំនៅផ្ទះចិញ្ចឹមសត្វបន្តិចបន្តួច គ្រប់តែគិតគូរជីវភាពប្រចាំថ្ងៃប៉ុណ្ណោះ។ ដោយបានរដ្ឋឧបត្ថម្ភទឹកប្រាក់៤០លានដុង គួបផ្សំនឹងប្រាក់ប្រិតសំចៃបានខ្លះៗ ខ្ញុំក៏សង់បានផ្ទះឥដ្ឋមួយខ្នង។ រដូវភ្លៀងឆ្នាំនេះ ខ្ញុំមិនបារម្ភផ្ទះលេចទឹកទេ”។ ក៏ដូចជាគ្រួសារលោកប៊ិញដែរ នោះគឺលោកវ៉ថាញ់ក្វឹង នៅភូមិព្រែកគយ ទីប្រជុំជនត្រឹងដេ ឲ្យដឹង៖ “ខ្ញុំវ័យចាស់ រស់នៅពឹងលើកូនចៅ ម្ល៉ោះហើយ ខណៈពេលដឹងថា រដ្ឋអំណាចភូមិភាគឧបត្ថម្ភសង់ផ្ទះឧបការគុណ ខ្ញុំត្រេកអរណាស់ គ្រួសារខ្ញុំចូលរួមប្រាក់បន្ថែមដើម្បីសង់បានផ្ទះត្រឹមត្រូវ។ ប៉ុន្មានឆ្នាំមកនេះ រដ្ឋតែងផ្តោតការយកចិត្តទុកដាក់ និងអនុវត្តសព្វគ្រប់នូវគោលនយោបាយអ្នកមានសគុណចំពោះបដិវត្តន៍។ រៀងរាល់ថ្ងៃ ខ្ញុំតែងដាស់តឿនកូនចៅឲ្យខិតខំធ្វើកិច្ចការដែលមានប្រយោជន៍ដល់សង្គម ការងារណាចម្រើនដល់ភូមិស្រុក និងចៀសវាងរាល់បាបគ្រោះសង្គម”។

តាមប្រសាសន៍លោកផាងវ៉ាន់សៅ សមាជិកមជ្ឈិមបក្ស លេខាគណៈកម្មាធិការបក្សខេត្តសុកត្រាំង ឲ្យដឹង៖ គណៈកម្មាធិការបក្សខេត្ត តែងចាប់អារម្មណ៍ពិសេស និងចង្អុលការភូមិភាគនានា អនុវត្តយ៉ាងត្រឹមត្រូវនូវគោលនយោបាយចំពោះអ្នកដែលមានសគុណ។ ជាពិសេស ឆ្នាំកន្លង នៅសន្និបាតជំរុញដំណើរការវិនិយោគ ខេត្តបានចលនាទឹកប្រាក់ពីធុរជនបាន១៧,៨ពាន់លានដុង ចូលជាមូលនិធិ “តបស្នងសងគុណ” និងធុរជនឯទៀតចែកតាមដំណាក់កាលដើម្បីឧបត្ថម្ភ។ មកទល់ពេលនេះ ឃើញថាធុរជនបានរួមវិភាគទានទឹកប្រាក់ក្នុងមូលនិធិបាន៦ពាន់លានដុង។ ខេត្តសង្ឃឹមថា ធុរជនគ្រប់រូបនឹងបន្តការរួមវិភាគទានចូលជាមូលនិធិ “តបស្នងសងគុណ” ដើម្បីបន្តការឧបត្ថម្ភដល់អ្នកមានសគុណចំពោះបដិវត្តន៍កំពុងមានការលំបាកពីលំនៅឋាន៕

យ្វីអាញ់-លីសៀ

ចែករំលែកអត្ថបទ

ពាក្យគន្លឹះ