មហាសាមគ្គីជនជាតិ ភូមិស្រុកផ្លាស់ថ្មី

12/04/2019 - 08:28

ទទួលអំណរបុណ្យចូលឆ្នាំថ្មីដោយក្តីរីករាយថ្មី

ជិតដល់ថ្ងៃបុណ្យចូលឆ្នាំថ្មី មាមីងជនរួមជាតិខ្មែរនៅគ្រប់ទីកន្លែងក្នុងខេត្តសុកត្រាំង អ្នកណាក៏សប្បាយរីករាយត្រៀមទទួលអំណរបុណ្យចូលឆ្នាំថ្មីដែរ។ ចំពោះមាមីងខ្មែរនៅឃុំថាញ់ភូ ស្រុកមីស្វៀង រីករាយទ្វេដងដ្បិតឃុំត្រៀមទទួលកិត្តិនាមជាឃុំសម្រេចបទដ្ឋានជនបទថ្មី។

ផ្លូវគមនាគមន៍ជនបទឃុំថាញ់ភូ សុទ្ធតែបានក្រាលបេតុង។

មានឱកាសមកកាន់ភូមិរាច់សេន សុកបឹង កឹងដឿក មណ្ឌល២ ។ល។ របស់ឃុំថាញ់ភូ ទើបឃើញភាពផ្លាស់ថ្មីនៅតំបន់ជនបទ។ នៅសងខាងផ្លូវដាន ផ្ទះឥដ្ឋជាច្រើនបានសាងសង់ឡើងយ៉ាងសមរម្យ។ នៅលើដីស្រែ មាមីងកសិករកំពុងប្រមូលផលដំណាំឪឡឹក។ តាមភ្លឺប្រឡាយមាមីងដាំម្ទេស ស្ពៃផ្កា ខ្ទឹមស្លឹក កំពុងលូតលាស់ល្អ។ បងស្រី ដៀនធីគីមឡៀង នៅភូមិមណ្ឌល២ ឃុំថាញ់ភូ ឲ្យដឹង៖ “ពីមុន គ្រួសារខ្ញុំជាគ្រួសារក្រីក្រ បានរដ្ឋសង់ផ្ទះជូន ឲ្យបុលទុនអនុគ្រោះ ទើបមានលក្ខណសម្បត្តិរៀបចំដីដាំដំណាំរួមផ្សំ។ ប៉ុន្មានឆ្នាំនេះ អាស្រ័យដាំដំណាំបានផលច្រើន លក់បានថ្លៃ ម៉្លោះហើយ គ្រួសារខ្ញុំសន្សែសន្សំបន្តិចម្តងៗជួលដីធ្វើស្រែ។ ប្រាក់ចំណូលបានមកពីការធ្វើស្រែ លក់ដំណាំ ខ្ញុំសន្សែសន្សំរហូតមកទល់នឹងបច្ចុប្បន្ន ទិញបានដីស្រែបន្ថែម៦កុង។ ឥឡូវ គ្រួសារខ្ញុំសង់បានផ្ទះឥដ្ឋដើម្បីទទួលអំណរបុណ្យចូលឆ្នាំថ្មី។ បុណ្យចូលឆ្នាំថ្មីឆ្នាំនេះ គ្រួសារខ្ញុំទទួលឆ្នាំថ្មីក្នុងគេហដ្ឋានថ្មី ពិតជាសប្បាយរីករាយនិងសុភមង្គលណាស់”។ ពូកាវដូរ៉ា នៅភូមិសុកបឹង ឲ្យដឹង៖ “ឥឡូវ អគារសិក្សា ដំណាក់សុខាភិបាល ផ្លូវដាន អគ្គិសនី ទឹកស្អាត។ល។។ គ្រួសារក្រីក្របានរដ្ឋឧបត្ថម្ភសង់ផ្ទះ ដីសង់ផ្ទះ ដីផលិតកម្ម ដើមទុន ពូជដំណាំ សត្វចិញ្ចឹម។ល។ ម៉្លោះហើយមាមីង ខំប្រឹងធ្វើការរកស៊ី លើកស្ទួយជីវភាព ជាពិសេសនៅជនបទធ្វើដំណើរទៅដល់ទីណាក៏ឃើញតែផ្លូវបេតុង មានទាំងខ្លោងទ្វារសន្តិសុខ ពេលយប់អគ្គិសនីភ្លឺព្រោងព្រាត។ ស្ថានភាពចោរកម្មលែងកើតមាន មាមីងក៏ស្ងប់ចិត្តបង្កបង្កើនផលដើម្បីធ្វើមាន។ ឃុំបានទទួលស្គាល់សម្រេចបទដ្ឋានជនបទថ្មី ជាក្តីប្រាថ្នារបស់ប្រជាជនក្នុងឃុំ”។

ជាឃុំលំបាកពិសេស មានជនរួមជាតិខ្មែររស់នៅជាង៥៣%នៃចំនួនប្រជាជន ពីមុនផ្លូវគមនាគមន៍ជនបទ ប្រព័ន្ធធារាសាស្រ្តនៅឃុំថាញ់ភូនៅជួបលំបាក ផលិតកសិកម្មពុំសូវមានប្រសិទ្ធភាព ម៉្លោះហើយអត្រាគ្រួសារក្រីក្រក្នុងឃុំស្រូបអត្រាជាង៣៤%។ ជាច្រើនឆ្នាំកន្លង បានរដ្ឋវិនិយោគ កម្មវិធី គម្រោងជាច្រើនឲ្យតំបន់ជនរួមជាតិខ្មែរ ពិសេសគឺកម្មវិធី១៣៥ និងកសាងជនបទថ្មី ម៉្លោះហើយប្រព័ន្ធគមនាគមន៍ជនបទ ធារាសាស្រ្តរបស់ឃុំ ត្រូវបានកសាងសម្រេចរួចរាល់។ ផ្តើមពីនោះ ឆ្លើយតបទៅនឹងតម្រូវការផលិត ដឹកជញ្ជូនរបស់ប្រជាជន។ លោកសើុងអ៊ុយ ប្រធានភូមិរាច់សេន ឲ្យដឹង៖ “ពីមុន រាច់សេនជាភូមិក្របំផុតក្នុងឃុំ។ ប៉ុន្តែឥឡូវក្លាយជាភូមិមានបំផុតក្នុងឃុំវិញ នោះគឺអាស្រ័យការវិនិយោគរបស់រដ្ឋ ឧបត្ថម្ភគ្រួសារក្រីក្រ កសាងហេដ្ឋារចនាសម្ព័ន្ធសម្រេចរួចរាល់។ល។ មិនត្រឹមតែប៉ុណ្ណោះ ប្រជាជនក៏ម្ចាស់ការស្វែងរកការងារធ្វើ អនុវត្តវិទ្យាសាស្រ្តបច្ចេកទេសក្នុងការបង្កបង្កើនផលសម្រេចទិន្នផលនិងគុណភាពខ្ពស់ ម៉្លោះហើយរកបានប្រាក់ចំណូលលំនឹង ជីវភាពប្រជាជនត្រូវបានលើកកម្ពស់ពីមួយថ្ងៃទៅមួយថ្ងៃ”។

លោកម៉ាយថាញ់កូវ លេខាគណៈកម្មាធិការបក្ស ប្រធានគណៈកម្មាធិការប្រជាជនឃុំថាញ់ភូ ឲ្យដឹង៖ “មកទល់នឹងបច្ចុប្បន្ន ជាមូលដ្ឋាន ឃុំ អនុវត្តសម្រេច១៩/១៩លក្ខឋានអំពីការកសាងជនបទថ្មី។ លទ្ធផលទាំងនោះ អាស្រ័យការខិតខំប្រឹងប្រែងឈានឡើងចាកផុតពីភាពក្រីក្រ និង ការព្រួតដៃរួមចំណែករបស់ប្រជាជនក្នុងការកសាងជនបទថ្មី ពិសេសគឺមាមីងខ្មែរ ការរួមចំណែកយ៉ាងសកម្មក្នុងការផ្សព្វផ្សាយរបស់ កម្មាភិបាល បក្ខជន អង្គការមហាជនអំពីការកសាងជនបទថ្មី។ ពិសេសគឺចលនាប្រកបដោយប្រសិទ្ធភាពពីប្រភពទុនឧបត្ថម្ភ ដូច៖ គោលនយោបាយឧបត្ថម្ភសម្រាប់ឃុំក្រ កសាងជនបទថ្មី កម្មវិធីទិសដៅជាតិបំបាត់ភាពអត់ឃ្លាន កាត់បន្ថយភាពក្រីក្រប្រកបដោយចីរភាព។ល។ តាមការគ្រោងទុក នៅខែកញ្ញា ឆ្នាំ២០១៩ ឃុំថាញ់ភូនឹងទទួលកិត្តិនាមឃុំសម្រេចបទដ្ឋានជនបទថ្មី”៕

លីធាន-មុនី

ចែករំលែកអត្ថបទ

ពាក្យគន្លឹះ