ដើម្បីអបអរសាទរខួបអនុស្សាវរីយ៍ ៤៤ ឆ្នាំ ទិវាគ្រូបង្រៀនវៀតណាម (២០/១១/១៩៨២ – ២០/១១/២០២៦) ផ្នែកអប់រំនិងបណ្តុះបណ្តាល ទីក្រុងកឹងធើ ព្រមទាំងសាលារៀននានា បានចាត់តាំងសកម្មភាពកីឡានិងពិធីជួបជុំថ្លែងអំណរគុណជាក់ស្តែង រួមចំណែកលើកតម្កើងប្រពៃណីគោរពគ្រូបាធ្យាយ។

កម្មាភិបាល គ្រូបង្រៀនសាលាអនុវិទ្យាល័យនិងវិទ្យាល័យជនជាតិអន្តេវាសិកថាញ់ភូ ចូលរួមការប្រកួតកីឡាអបអរសាទរទិវាគ្រូបង្រៀនវៀតណាម ២០វិច្ឆិកា។
សំដៅអបអរសាទរខួប ៤៤ ឆ្នាំ ទិវាគ្រូបង្រៀនវៀតណាម (២០/១១/១៩៨២ – ២០/១១/២០២៦) ទូទាំងផ្នែកបានបំផុសចលនាប្រឡងប្រណាំងយ៉ាងផុលផុស និងចាត់តាំងខ្សែសង្វាក់សកម្មភាពជាក់ស្តែង ដើម្បីលើកតម្កើងប្រពៃណីគោរពគ្រូបាធ្យាយ។ តាមរយៈនោះ បានលើកទឹកចិត្តទាន់ពេលដល់កម្មាភិបាលគ្រប់គ្រង គ្រូបង្រៀន និងបុគ្គលិក ឱ្យពង្រីកស្មារតីទទួលខុសត្រូវ និងអស់ពីចិត្តជាមួយអាជីព រួមចំណែកលើកកម្ពស់គុណភាពអប់រំ។
សកម្មភាពលេចធ្លោមួយក្នុងចំណោមនោះ គឺការប្រកួតកីឡាអបអរសាទរទិវាគ្រូបង្រៀនវៀតណាម ២០ វិច្ឆិកា ដែលរៀបចំដោយមន្ទីរអប់រំ និងបណ្តុះបណ្តាល ទីក្រុងកឹងធើ។ ការប្រកួតបានបង្កទីលានកម្សាន្តដ៏ល្អនិងមានប្រយោជន៍ ជួយដល់កងជួរកម្មាភិបាលគ្រប់គ្រង គ្រូបង្រៀន និងបុគ្គលិកនៅតាមអង្គភាពនានាមានឱកាសជួបប្រាស្រ័យ រៀនសូត្រ រឹតបន្ដឹងចំណងសាមគ្គីភាព ព្រមទាំងលត់ដំសុខភាព និងលើកកម្ពស់ជីវភាពស្មារតី។ ព្រឹត្តិការណ៍ទទួលបានការគាំទ្រយ៉ាងក្លៀវក្លាពីសាលារៀននានា ញ៉ាំងឱ្យសកម្មភាពកីឡាក្លាយជាស្ពានតភ្ជាប់ទំនាក់ទំនងរវាងអ្នកបម្រើការងារក្នុងវិស័យអប់រំ។
ចូលរួមអបអរក្នុងព្រឹត្តិការណ៍ប្រកួតនេះ សាលាអនុវិទ្យាល័យនិងវិទ្យាល័យជនជាតិអន្តេវាសិកថាញ់ភូ នៅឃុំញូយ៉ា បានបង្កើតក្រុមបាល់ទះបុរស និងនារី ចំនួន ២ ក្រុមចូលរួមប្រកួត។ ដោយស្មារតីជួបប្រាស្រ័យ សាមគ្គីភាព និងភាពស្វាហាប់ កីឡាករ-កីឡាការិនី បានបង្ហាញឱ្យឃើញយ៉ាងច្បាស់នូវរូបភាពគ្រូបង្រៀនដែលរហ័សរហួន និងយកចិត្តទុកដាក់ហាត់ប្រាណដើម្បីសុខភាព។ លោកគ្រូ លីថាញឌឿក ចាងហ្វាងរងសាលាអនុវិទ្យាល័យនិងវិទ្យាល័យជនជាតិអន្តេវាសិកថាញ់ភូ បានឱ្យដឹង៖ “ការចូលរួមសកម្មភាពអបអរសាទរទិវាគ្រូបង្រៀនវៀតណាម ២០វិច្ឆិកា គឺជាឱកាសដើម្បីកម្មាភិបាល គ្រូបង្រៀន និងបុគ្គលិកជួបប្រាស្រ័យ រឹតបន្ដឹងចំណងសាមគ្គីភាព លើកកម្ពស់ជីវភាពស្មារតី និងហាត់ប្រាណដើម្បីសុខភាព។ តាមរយៈនេះ ក៏ជួយជំរុញទឹកចិត្តលោកគ្រូ អ្នកគ្រូបន្តពង្រីកស្មារតីទទួលខុសត្រូវ និងទឹកចិត្តស្រឡាញ់អាជីព ខិតខំជម្នះការលំបាក សម្រេចបានល្អភារកិច្ចអប់រំ ជាពិសេសក្នុងការងារបង្រៀន គិតគូរដល់សិស្សានុសិស្សនៅតំបន់ជនជាតិភាគតិច រួមចំណែកលើកកម្ពស់កម្រិតប្រជាបញ្ញា និងបណ្តុះបណ្តាលធនធានមនុស្សនៅភូមិភាគ”។

សកម្មភាពជួបជុំ ថ្លែងអំណរគុណ រួមចំណែកលើកតម្កើងការរួមចំណែករបស់ក្រុមគ្រូបង្រៀនចំពោះបុព្វហេតុបណ្តុះបណ្តាលធនធានមនុស្ស។
ក្រៅពីសកម្មភាពកីឡា សាលារៀននានានៅទូទាំងទីក្រុងក៏បានចាត់តាំងពិធីជួបជុំ ដើម្បីសម្តែងការដឹងគុណចំពោះលោកគ្រូ អ្នកគ្រូ ក្នុងឱកាសទិវា ២០ វិច្ឆិកា ផងដែរ។ នៅសាលាបឋមសិក្សាត្រឹងដេ ឃុំត្រឹងដេ កម្មវិធីជួបជុំអបអរខួបអនុស្សាវរីយ៍ ៤៤ ឆ្នាំ ទិវាគ្រូបង្រៀនវៀតណាម បានប្រព្រឹត្តទៅយ៉ាងឱឡារិកនៅព្រឹកថ្ងៃ ២០/១១/២០២៦ ដោយមានការចូលរួមពីកម្មាភិបាល គ្រូបង្រៀន បុគ្គលិក សិស្សានុសិស្ស និងភ្ញៀវកិត្តិយសជាច្រើនរូប។ កម្មវិធីមានខ្លឹមសារប្រកបដោយអត្ថន័យជាច្រើនដូចជា សិល្បៈអបអរសាទរ រំលឹកប្រពៃណីទិវាគ្រូបង្រៀនវៀតណាម អានលិខិតជូនពររបស់គណៈកម្មាធិការបក្សទីក្រុងកឹងធើ ថ្លែងចំណាប់អារម្មណ៍របស់គ្រូបង្រៀន និងសិស្សានុសិស្ស ពិធីសិស្សបំពាក់កម្រងផ្កាថ្លែងអំណរគុណគ្រូបង្រៀន រួមជាមួយសកម្មភាពស្ងើចសរសើរលើកទឹកចិត្តគ្រូបង្រៀន និងសិស្សានុសិស្សដែលសម្រេចបានសមិទ្ធផលលេចធ្លោ។
រួមជាមួយនឹងកិច្ចខិតខំប្រឹងប្រែងរបស់ផ្នែកអប់រំ ការរួមដំណើរពីសំណាក់គណៈកម្មាធិការបក្ស និងរដ្ឋអំណាចភូមិភាគ បានបង្កនូវជំនឿចិត្ត និងកម្លាំងចលករបន្ថែមទៀតជូនដល់កងជួរគ្រូបង្រៀន។ តាមលោកស្រី ង្វៀងធីយៀង អនុលេខាប្រចាំការនៃគណៈកម្មាធិការបក្សឃុំត្រឹងដេ ក្នុងឱកាសរំលឹកខួប ៤៤ ឆ្នាំ ទិវាគ្រូបង្រៀនវៀតណាម ភូមិភាគបានចាត់តាំងក្រុមប្រតិភូចុះសួរសុខទុក្ខ ជូនពរ និងថ្លែងអំណរគុណដល់ក្រុមគ្រូបង្រៀននៅតាមគ្រឹះស្ថានអប់រំលើភូមិឋាន។ សកម្មភាពទាំងនេះបង្ហាញពីការយកចិត្តទុកដាក់យ៉ាងជ្រាលជ្រៅរបស់គណៈកម្មាធិការបក្ស និងរដ្ឋអំណាចភូមិភាគចំពោះបុព្វហេតុអប់រំ ទទួលស្គាល់ការខិតខំប្រឹងប្រែង និងការរួមចំណែករបស់គ្រូបង្រៀនក្នុងការងារបង្រៀន គិតគូរដល់សិស្សានុសិស្ស។ ទន្ទឹមនឹងនោះ សង្ឃឹមថា ក្រុមគ្រូបង្រៀនបន្តពង្រីកស្មារតីទទួលខុសត្រូវ ទឹកចិត្តស្រឡាញ់អាជីព សាមគ្គី ផ្លាស់ថ្មីវិធីសាស្ត្របង្រៀន រួមចំណែកលើកកម្ពស់គុណភាពអប់រំនៅភូមិភាគ និងអប់រំប្រពៃណីគោរពគ្រូបាធ្យាយដល់ជំនាន់យុវជន។
សកម្មភាពអបអរសាទរទិវាគ្រូបង្រៀនវៀតណាម រួមចំណែកថ្លែងអំណរគុណចំពោះក្រុមគ្រូបង្រៀន ធ្វើឱ្យរីកសាយភាយប្រពៃណីគោរពគ្រូបាធ្យាយ បំផុសស្មារតីស្រឡាញ់អាជីព ស្មារតីទទួលខុសត្រូវ បង្កកម្លាំងជំរុញលើកកម្ពស់គុណភាពអប់រំ កសាងបរិយាកាសសិក្សាស្និទ្ធស្នាល វិជ្ជមានលើភូមិឋានទីក្រុងកឹងធើ៕
ហុងទើ - ថាច់ធី