ព្រឹត្តិការណ៍ - នយោបាយ ព្រឹត្តិការណ៍

15/11/2026 - 20:54

ភាពអ៊ូរអរថ្ងៃបោះឆ្នោតជ្រើសប្រធានគណៈប្រជាជនភូមិ ប្រធានគណៈប្រជាជនមណ្ឌលទីក្រុងកឹងធើ

នៅថ្ងៃទី១៥ ខែវិច្ឆិកា ម្ចាស់ឆ្នោតតំណាងគ្រួសារនៅឃុំ សង្កាត់ទាំង ១០៣ លើភូមិឋានទីក្រុងកឹងធើ បានអញ្ជើញមកព្រមៗគ្នាដើម្បីបោះឆ្នោតជ្រើសប្រធានគណៈប្រជាជនភូមិ ប្រធានគណៈប្រជាជនមណ្ឌល អាណត្តិកាល ២០២៦-២០៣១។ បរិយាកាសថ្ងៃបោះឆ្នោតប្រព្រឹត្តទៅយ៉ាងពុះពោរ បង្ហាញពីស្មារតីប្រជាធិបតេយ្យ ការទទួលខុសត្រូវនិងការឯកភាពរបស់ប្រជាជនក្នុងការកសាងរដ្ឋអំណាចនៅមូលដ្ឋាន។

ទិដ្ឋភាពម្ចាស់ឆ្នោតតំណាងគ្រួសារចូលរួមបោះឆ្នោតជ្រើសប្រធានគណៈប្រជាជនភូមិ ប្រធានគណៈប្រជាជនមណ្ឌល អាណត្តិកាល ២០២៦-២០៣១ នៅទីក្រុងកឹងធើ។

ចាប់តាំងពីព្រឹកព្រលឹម នៅតាមមណ្ឌលបោះឆ្នោតលើភូមិឋានទីក្រុងកឹងធើ ម្ចាស់ឆ្នោតតំណាងគ្រួសារបានអញ្ជើញមកយ៉ាងច្រើនកុះករ ដើម្បីអនុវត្តសិទ្ធិនិងកាតព្វកិច្ចរបស់ពលរដ្ឋ។ សន្លឹកឆ្នោតនីមួយៗបានម្ចាស់ឆ្នោតពិចារណាច្បាស់លាស់ មុននឹងបោះជ្រើសផ្ញើក្តីទំនុកចិត្តទៅលើអ្នកដែលមានគុណសម្បត្តិ មានសមត្ថភាព មានប្រិយភាពនិងមានស្មារតីទទួលខុសត្រូវបម្រើសហគមន៍ប្រជាជនដោយអស់ពីចិត្ត។ បរិយាកាសថ្ងៃបោះឆ្នោតបានប្រព្រឹត្តទៅយ៉ាងឱឡារិក រំភើបរីករាយ ក្លាយជាយុទ្ធនាការប្រជុំជីវភាពនយោបាយយ៉ាងទូលំទូលាយនៅតាមមណ្ឌលប្រជាជនតាំងទីលំនៅ។

តាមផែនការ ពេលវាលាបោះឆ្នោតចាប់ផ្តើមពីម៉ោង ៧ព្រឹក ដល់ម៉ោង១១ ថ្ងៃទី១៥ ខែវិច្ឆិកា។ ចំពោះភូមិឋានដែលមានប្រជាជនរស់នៅកុះករ ពេលវេលាបោះឆ្នោតអាចអូសបន្លាយរហូតដល់ម៉ោង ១៧រសៀល នៅថ្ងៃដដែល បង្កលក្ខណៈងាយស្រួយដើម្បីម្ចាស់ឆ្នោតបានចូលរួមបោះឆ្នោតគ្រប់គ្នា។ ទូទាំងទីក្រុងចាត់តាំងការបោះឆ្នោតជ្រើសប្រធានគណៈប្រជាជនភូមិ ប្រធានគណះប្រជាជនមណ្ឌល ចំនួន១.២២៧នាក់ នៅតាមឃុំ សង្កាត់ទាំង១០៣ អាណត្តិកាល ២០២៦-២០៣១។ ទន្ទឹមនឹងនោះ ឃុំ សង្កាត់មួយចំនួនក៏បានចាត់តាំងការបោះឆ្នោតជ្រើសសមាជិកគណៈអធិការកិច្ចប្រជាជន អាណត្តិកាលថ្មី។ ដើម្បីឱ្យថ្ងៃបោះឆ្នោតប្រព្រឹត្តទៅប្រកបដោយលក្ខណៈប្រជាធិបតេយ្យ ត្រឹមត្រូវតាមការកំណត់ ការងារត្រៀមបម្រុងបានគ្រប់ថ្នាក់ គ្រប់ផ្នែកនិងភូមិភាគនានាអនុវត្តព្រមៗគ្នាយ៉ាងហ្មត់ចត់។ ការពិនិត្យផ្ទៀងផ្ទាត់ ការបិទប្រកាសបញ្ជីឈ្មោះម្ចាស់ឆ្នោត ចាត់តាំងកិច្ចប្រជុំពិគ្រោះយោបល់ ឧទ្ទេសនាមបេក្ខជនឈរឆ្នោត ត្រៀមបម្រុងមូលដ្ឋានសម្ភារៈ គ្រឿងបរិក្ខារនិងរៀបចំមណ្ឌលបោះឆ្នោតបានអនុវត្តដោយការយកចិត្តទុកដាក់។ បេក្ខជនឈរឈ្មោះបោះឆ្នោតបានជ្រើសនិងឧទ្ទេសនាម សុទ្ធតែធានាសម្រេចបទដ្ឋាន គ្រប់លក្ខណៈ មានប្រិយភាពនិងសមត្ថភាព ឆ្លើយតបទៅនឹងតម្រូវការនៃការងារនៅសហគមន៍ប្រជាជនស្នាក់នៅ។ ការងារផ្សព្វផ្សាយក៏បានជំរុញដោយទម្រង់រូបភាពជាច្រើនសមស្របនឹងភូមិភាគនីមួយៗ ជួយប្រជាជនយល់ច្បាស់ពីគោលការណ៍ អត្ថន័យ សិទ្ធិនិងកាតព្វកិច្ចរបស់ខ្លួនក្នុងការបោះឆ្នោត។ បណ្តាវិធានការធានាសន្តិសុខសណ្តាប់ធ្នាប់ បង្ការពន្លត់អគ្គិភ័យនិងសុវត្ថិភាពចរាចរណ៍បានកសាងជាក់លាស់។ កងកម្លាំងនគរបាលរួមជាមួយអង្គភាពសមត្ថកិច្ចនានា សហការប្រចាំការនៅតាមមណ្ឌលបោះឆ្នោត រួមចំណែករក្សាសុវត្ថិភាពក្នុងអំឡុងពេលប្រព្រឹត្តិទៅនៃការបោះឆ្នោត។

ម្ចាស់ឆ្នោតរីករាយចូលរួមបោះឆ្នោតជ្រើសប្រធានគណៈប្រជាជនភូមិ អាណត្តិកាល ២០២៦-២០៣១។

សម្របនឹងបរិយាកាសរីករាយរបស់ទូទាំងទីក្រុង នៅឃុំឡាយហ្វា តាំងពីព្រឹកព្រលឹម ម្ចាស់ឆ្នោតតំណាងគ្រួសារនៅភូមិទាំង៩បានអញ្ជើញមកជួបជុំគ្នានៅតាមមណ្ឌលបោះឆ្នោត។ ការងារចាត់តាំងបានអនុវត្តយ៉ាងម៉ឺងម៉ាត់ បង្កលក្ខណៈងាយស្រួលដើម្បីប្រជាជនចូលរួមបោះឆ្នោតជ្រើសអ្នកតំណាងសហគមន៍ប្រជាជនក្នុងអាណត្តិកាលថ្មី។ លោកត្រឹងគឹមហ្វី លេខាគណៈកម្មាធិការបក្ស ប្រធានក្រុមប្រឹក្សាប្រជាជនឃុំឡាយហ្វា ឱ្យដឹង៖ “ទូទាំងឃុំមានម្ចាស់ឆ្នោត ៥.៩៨៨នាក់ តំណាងគ្រួសារចូលរួមបោះឆ្នោតជ្រើសប្រធានគណៈប្រជាជនភូមិ៩នាក់ អាណត្តិកាល ២០២៦-២០៣១។ មុនថ្ងៃបោះឆ្នោត ភូមិភាគបានម្ចាស់ការផ្សព្វផ្សាយព័ត៌មានទូលំទូលាយអំពីពេលវេលាបោះឆ្នោត តាមរយៈប្រព័ន្ធផ្សាយសំឡេងនៅមូលដ្ឋាន រួមជាមួយបណ្តាញព័ត៌មានសហគមន៍។ អាស្រ័យហេតុនោះ ប្រជាជនក្តាប់ព័ត៌មានច្បាស់លាស់ ម្ចាស់ការរៀបចំពេលវេលាចូលរួម បង្ហាញពីស្មារតីទទួលខុសត្រូវចំពោះការងាររួមរបស់ភូមិភាគ។

នៅតាមមណ្ឌលបោះឆ្នោត បញ្ជីឈ្មោះម្ចាស់ឆ្នោត ជីវប្រវត្តិសង្ខេបរបស់បេក្ខជនឈរឆ្នោតបានបិទប្រកាសជាសាធារណៈ រៀបចំបន្ទប់មានភាពសមរម្យ ត្រឹមត្រូវតាមបទប្បញ្ញត្តិ។ សមាជិកក្រុមបោះឆ្នោតបានជួយណែនាំម្ចាស់ឆ្នោតអនុវត្តពីមួយជំហានទៅមួយជំហានអំពីបែបបទបោះឆ្នោត ចាប់ពីការពិនិត្យព័ត៌មាន ការទទួលស្លឹកឆ្នោត រហូតដល់ការជ្រើសនិងការដាក់ស្លឹកឆ្នោតក្នុងហិបឆ្នោត។ រាល់សកម្មភាពបានដំណើរការបើកចំហ ធានាបាននូវគោលការណ៍ប្រជាធិបតេយ្យ ត្រឹមត្រូវតាមបែបបទរដ្ឋបាល។ កិច្ចសហការជិតស្និទ្ធរវាងកងកម្លាំងនានា រួមចំណែកជួយឱ្យសកម្មភាពបោះឆ្នោតប្រព្រឹត្តទៅរលូននិងសុវត្ថិភាព។ មានវត្តមានតាំងពីព្រឹកនៅមណ្ឌលបោះឆ្នោត អ្នកមីងតាំងធីឡែ ម្ចាស់ឆ្នោតនៅភូមិឈូងធំB ឃុំឡាយហ្វា រីករាយពេលបានបោះឆ្នោតជ្រើសអ្នកតំណាងដោយផ្ទាល់។អ្នកមីងរំពឹងថា ប្រធានគណៈប្រជាជនភូមិអាណត្តិកាលថ្មីនឹងពង្រីកស្មារតីទទួលខុសត្រូវ ជិតដិតប្រជាជន ស្តាប់ប្រជាជននិងឆ្លុះបញ្ចាំងទាន់ពេលពីមតិគោលបំណងរបស់ប្រជាជន ចលនាមាមីងសាមគ្គី អភិវឌ្ឍសេដ្ឋកិច្ច កសាងភូមិស្រុកកាន់តែរីកចម្រើននិងស្រស់បំព្រង។

ជាមួយនឹងការត្រៀមបម្រុងយ៉ាងហ្មត់ចត់និងស្មារតីទទួលខុសត្រូវរបស់ម្ចាស់ឆ្នោត ទិវាបោះឆ្នោតជ្រើសប្រធានគណៈប្រជាជនភូមិ ប្រធានគណៈប្រជាជនមណ្ឌលនៅទីក្រុងកឹងធើបានប្រព្រឹត្តទៅក្នុងបរិយាកាសប្រជាធិបតេយ្យ រីករាយនិងសុវត្ថិភាព។ អ្នកដែលទទួលបានការទំនុកចិត្ត នឹងរួមចំណែកពង្រីកកម្លាំងសាមគ្គីសហគមន៍ កសាងប្រព័ន្ធនយោបាយនៅមូលដ្ឋានឱ្យកាន់តែរឹងមាំ៕

ហុងទើ-មុនី

ចែករំលែកអត្ថបទ

ពាក្យគន្លឹះ