មហាសាមគ្គីជនជាតិ គំរូក្នុងសហគមន៍

14/08/2026 - 06:13

អ្នកមានប្រិយភាព លះបង់អស់ពីចិត្តដើម្បីភូមិស្រុក

ដោយមានភាពជិតស្និទ្ធ យកចិត្តទុកដាក់និងតែងគិតគូរពីជីវភាពរស់នៅរបស់មាមីងខ្មែរ លោកថាច់វ៉ើង អាយុ ៧៣ ឆ្នាំ ជាអ្នកមានប្រិយភាពនៅភូមិវាល ឃុំត្រាកូង ខេត្តវិញឡុង អស់រយៈពេលជាច្រើនឆ្នាំ តែងរួមដំណើរជាមួយប្រជាជន។ ចាប់ពីការឃោសនា អប់រំ ផ្សព្វផ្សាយនិងចលនាប្រជាជន រហូតដល់ការកៀរគរធ្វើផ្លូវ ជួយសាងសង់លំនៅឋាន និងជំរុញការផលិត លោកបានរួមចំណែកធ្វើឱ្យភូមិស្រុកកាន់តែមានការរីកចម្រើន។

មុនពេលចូលនិវត្តន៍ លោកថាច់វ៉ើង ធ្លាប់បំពេញការងារនៅគណៈកម្មាធិការរណសិរ្សឃុំ។ បន្ទាប់មក លោកបានបន្តចូលរួមការងាររណសិរ្សនៅភូមិ ហើយបានទទួលស្គាល់ជាអ្នកមានប្រិយភាពចាប់តាំងពីឆ្នាំ ២០១៤ មក។ លោកតែងចុះទៅតាមផ្ទះប្រជាជន ដើម្បីជួបសំណេះសំណាល ស្វែងយល់ពីគោលបំណង ក្ដីប្រាថ្នារបស់ប្រជាជន ផ្សព្វផ្សាយពីគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ និងជំរុញឱ្យប្រជាជនសាមគ្គី គោរពនិងអនុវត្តតាមបទប្បញ្ញត្តិនានារបស់ភូមិភាគ។ តាមរយៈការងារទាំងនេះ លោកបានរួមចំណែកពង្រឹងជំនឿទុកចិត្តរបស់ប្រជាជន និងរក្សាសន្តិសុខ សណ្តាប់ធ្នាប់នៅក្នុងភូមិស្រុកឱ្យបានល្អប្រ សើរ។

លោកថាច់វ៉ើង ពិនិត្យសំណង់ដងផ្លូវ ៣,៥ ម៉ែត្រ ក្នុងភូមិដែលកំពុងដំណើរការ។

ក្នុងអំឡុងពេលដំបូងដែលលោកចូលរួមការងារ ភូមិវាលនៅមានការលំបាកច្រើន។ តំបន់នេះមានប្រព័ន្ធព្រែកប្រឡាយខ្វាត់ខ្វែង ប្រជាជនភាគច្រើនប្រកបរបរកសិកម្ម។ ផ្លូវបេតុងជាច្រើនខ្សែដែលកសាងតាមរយៈកម្មវិធី ១៣៥ បានខូចទ្រុឌទ្រោម ធ្វើឱ្យការធ្វើដំណើរនិងដឹកជញ្ជូនកសិផលជួបការលំបាក។ ស្នាដៃមួយដែលបង្ហាញឱ្យឃើញយ៉ាងច្បាស់ គឺការដែលលោកបានចលនាប្រជាជន ចូលរួមធ្វើផ្លូវតាមបណ្តោយមាត់ប្រឡាយប្រវែងជាង ២.០០០ ម៉ែត្រ។ ដើម្បីមានដីស្អាតសម្រាប់ធ្វើផ្លូវ លោកបានចុះទៅជួបម្ចាស់ដីតាមគ្រួសារនីមួយៗ ដើម្បីអំពាវនាវ ឱ្យបរិច្ចាគដី។ មានគ្រួសារមួយចំនួនមិនទាន់យល់ព្រម លោកបានអត់ធ្មត់ចុះទៅជួបជាច្រើនលើក ពន្យល់ពីផលប្រយោជន៍ដែលផ្លូវនេះនឹងផ្តល់ជូនប្រជាជន។ ទីបំផុត គ្រួសារទាំងនោះបានយល់ព្រម រួមចំណែកបរិច្ចាគដីនិងកម្លាំងពលកម្ម។

តាមស្មារតីអ្នកមានប្រាក់ចូលរួមប្រាក់ អ្នកគ្មានប្រាក់ចូលរួមជាកម្លាំងពលកម្ម ក៏កៀរគរថវិកាបានជាង ៦០ លានដុងសម្រាប់ចាក់ក្រួសធ្វើផ្លូវ។ ក្នុងអំឡុងពេលធ្វើផ្លូវ ភរិយារបស់លោកបានចម្អិនអាហារជូនអ្នកភូមិជិត ៣០ នាក់ ដែលចូលរួមធ្វើផ្លូវរៀងរាល់សប្តាហ៍។ អាហារសាមញ្ញទាំងនេះ បានរួមចំណែកភ្ជាប់ស្មារតីសាមគ្គីរបស់ប្រជាជន និងជួយឱ្យការកសាងផ្លូវសម្រេចដោយជោគជ័យ។

មិនត្រឹមតែចលនាប្រជាជនធ្វើផ្លូវប៉ុណ្ណោះទេ លោកថាច់វ៉ើង ក៏យកចិត្តទុកដាក់ចំពោះគ្រួសារដែលជួបការលំបាកខាងលំនៅឋាន ដើមទុននិងជីវភាពរស់នៅ។ លោកមិនអាចចាំអស់ ថាមានប៉ុន្មានគ្រួសារដែលធ្លាប់ទទួលបានការជួយពីលោកនោះទេ ប៉ុន្តែរាល់ពេលមានគ្រួសារណាជួបការលំបាក លោកតែងតែព្យាយាមផ្តល់យោបល់ និងស្វែងរកការតភ្ជាប់ ដើម្បីឱ្យប្រជាជនអាចទទួលបានការឧបត្កម្ភតាមគោលនយោបាយសមស្រប។

ក្នុងឆ្នាំ ២០២៥ គ្រួសារបងស្រីថាច់ធីថា បានទទួលការឧបត្ថម្ភពីរដ្ឋសម្រាប់សាងសង់ផ្ទះ។ ផ្ទះចាស់មានភាពទ្រុឌទ្រោម ខណៈដែលពីរនាក់ប្តីប្រពន្ធបងប្រកបរបរធ្វើការឈ្នួល ប្រាក់ចំណូលបានត្រឹមគិតគូរជីវភាពប្រចាំថ្ងៃប៉ុណ្ណោះ។ បងស្រីថា ចែករំលែក៖ "ពេលទទួលបានការជួយសាងសង់ផ្ទះ ខ្ញុំសប្បាយចិត្តខ្លាំងណាស់។ លោកពូវ៉ើង តែងមកលើកទឹកចិត្តប្តីប្រពន្ធខ្ញុំឱ្យខិតខំប្រកបរបររកស៊ី និងចិញ្ចឹមសត្វ។ ដោយសារតែការលើកទឹកចិត្តនេះ ទើបគ្រួសារខ្ញុំចាកផុតពីភាពក្រីក្រ ហើយខ្ញុំសូមអរគុណបក្ស រដ្ឋយ៉ាងក្រៃលែងដែលជួយឱ្យខ្ញុំមានផ្ទះសម្បែងរឹងមាំដូច្នេះ"។ ចំណែកគ្រួសារបងថាច់ថាយ ក៏បានទទួលការឧបត្ថម្ភសង់លំនៅឋាន និងបានឧបត្ថម្ភបុលទុនសម្រាប់ដាំដំណាំនិងចិញ្ចឹមសត្វ។ ដោយមានការលើកទឹកចិត្តពីលោកថាច់វ៉ើង ទើបគ្រួសារគាត់បានលំនឹងក្នុងការផលិត ហើយឥឡូវនេះ ក៏បានចាកផុតពីភាពក្រីក្រដោយចីរភាព។

លោកថាច់វ៉ើង សួរសុខទុក្ខនិងលើកទឹកចិត្តគ្រួសារបងស្រីថាច់ធីថា។

លោកវ៉ថាញ់ចៀង លេខាសាខាបក្សភូមិវាល បានឱ្យដឹង លោកថាច់វ៉ើង តែងបានប្រជាជនគោរពស្រឡាញ់ ជឿទុកចិត្ត និងស្តាប់យោបល់។ នៅពេលជួបការលំបាក មាមីងតែងមករគាត់ ដើម្បីសុំការណែនាំនិងការជំនួយ។ ទោះបីមានវ័យចាស់ក៏ដោយ លោកនៅតែសកម្មក្នុងការសិក្សារៀនសូត្រ និងចេះប្រើប្រាស់កុំព្យូទ័រយ៉ាងជំនាញដើម្បីបម្រើការងារ។ លោកវ៉ថាញ់ចៀង មានប្រសាសន៍៖ "ប្រជាជនគោរពស្រឡាញ់ និងជឿទុកចិត្តលោកថាច់វ៉ើងខ្លាំងណាស់។ ចំពោះគ្រួសារដែលជួបការលំបាកគាត់តែងរិះរកវិធីជួយ ដើម្បីឱ្យប្រជាជនមានលក្ខណៈឈានឡើងចាកផុតពីភាពក្រីក្រ"។

តាមប្រសាសន៍លោកវ៉ថាញ់ចៀង គ្រួសាររបស់លោកថាច់វ៉ើង ជាគ្រួសារគំរូមួយក្នុងការចិញ្ចឹមកូនចៅរៀនសូត្រ។ កូនទាំង ៣ នាក់របស់គាត់ សុទ្ធតែបានរៀនសូត្របានចប់ចុងចប់ដើម ហើយបច្ចុប្បន្នកំពុងបម្រើការងារនៅតាមស្ថាប័នរដ្ឋ។ គ្រួសារលោកបានទទួលស្គាល់ជាគ្រួសារសង្វាតរៀនសូត្រ និងទទួលបានប័ណ្ណសរសើររបស់មជ្ឈិមស្តីពីគ្រួសារវប្បធម៌គំរូឆ្នើម ព្រមទាំងប័ណ្ណសរសើរនិងលិខិតសរសើរជាច្រើនពីខេត្តនិងស្រុក។

លោកថាច់វ៉ើង ចែករំលែក៖ "ក្នុងនាមជាអ្នកមានប្រិយភាព គឺត្រូវតែជិតដិតនឹងប្រជាជន ជ្រាបច្បាស់ថាប្រជាជនត្រូវការអ្វី។ ឃើញប្រជាជននៅលំបាក យើងត្រូវរិះរកវិធីចលនា និងស្នើសុំការឧបត្ថម្ភដើម្បីជួយដល់ពួកគាត់។ នៅពេលប្រជាជនមានជីវភាពធូរធារ ភូមិស្រុកមានការរីកចម្រើន យើងក៏រីករាយសប្បាយចិត្តដែរ"។ បច្ចុប្បន្ន នៅភូមិវាលមិននៅមានផ្ទះបណ្តោះអាសន្នទៀតហើយ នៅសល់តែ៥គ្រួសារក្រីក្រនិង៤៣គ្រួសារក្បែរក្រីក្រ; សន្តិសុខសណ្តាប់ធ្នាប់ក្នុងភូមិបានរក្សាលំនឹង។

បច្ចុប្បន្ន ផ្លូវមានទទឹង ៣,៥ ម៉ែត្រ និងប្រវែងប្រមាណ ៤.០០០ ម៉ែត្រ កំពុងបានរដ្ឋនិងប្រជាជនរួមគ្នាធ្វើ។ ទោះមានវ័យ ៧០ ឆ្នាំប្លាយក៏ដោយ លោកថាច់វ៉ើង តែងចុះទៅកាន់សំណង់ជាប្រចាំដើម្បីពិនិត្យការងារ និងលើកទឹកចិត្តប្រជាជន។ សម្រាប់លោក ប្រិយភាពមិនត្រឹមឋិតនៅលើលិខិតទទួលស្គាល់នោះទេ នៅទាំងឋិតលើសកម្មភាពជាក់ស្តែងក្នុងជីវិតប្រចាំថ្ងៃ។ ចាប់ពីផ្ទះសម្បែង ផ្លូវថ្នល់ រហូតដល់ជីវភាពនិងការប្រកបរបររកស៊ីរបស់ប្រជាជន លោកតែងរួមចំណែកយ៉ាងស្ងៀមស្ងាត់ ដើម្បីធ្វើឱ្យភូមិស្រុកកាន់តែមានភាពរីកចម្រើន៕

ពេជ្រ សឿន

ចែករំលែកអត្ថបទ

ពាក្យគន្លឹះ