- លេខាគណៈកម្មាធិការបក្សទីក្រុង លោកឡេក្វាងទុង មានបំណងឱ្យកាសែតនិងវិទ្យុទូរ​ទស្សន៍ក្រុងកឹងធើ បន្តការផ្លាស់ថ្មីច្នៃប្រតិដ្ឋ និងលើកកម្ពស់គុណភាពខ្លឹមសារ កម្មវិធីនិងផលិតផលសារព័ត៌មាន; លើកកម្ពស់គុណភាពការងារផ្សព្វផ្សាយ; ជំរុញការអនុវត្តបច្ចេក​វិទ្យា​ព័ត៌មាន និងផ្លាស់ប្ដូរឌីជីថល។

នៅរសៀលថ្ងៃទី១០ ខែកុម្ភៈ លោកឡេក្វាងទុង សមាជិកគណៈប្រតិបត្តិការមជ្ឈិមបក្ស លេខា​គណៈកម្មាធិការបក្សទីក្រុង បានអញ្ជើញទៅប្រសិទ្ធពរឆ្នាំថ្មីដល់ថ្នាក់ដឹកនាំ កម្មា​ភិ​បាល គណៈរៀបរៀង អ្នកយកព័ត៌មាន និងបុគ្គលិកកាសែតនិងវិទ្យុទូរទស្សន៍កឹងធើ។

លេខាគណៈកម្មាធិការបក្សទីក្រុង ប្រសិទ្ធពរឆ្នាំថ្មីនិងជូនអំណោយដល់កាសែត
និងវិទ្យុទូរ​ទស្សន៍កឹងធើ។

មានប្រសាសន៍ក្នុងឱកាសប្រសិទ្ធពរឆ្នាំថ្មី លេខាគណៈកម្មាធិការបក្សទីក្រុង លោកឡេក្វាង​ទុង បានកត់សម្គាល់និងវាយតម្លៃខ្ពស់ចំពោះតួនាទីរបស់កាសែតនិងវិទ្យុទូរទស្សន៍កឹងធើ ក្នុងការផ្សព្វផ្សាយទាន់ពេលវេលានូវគោលការណ៍ គោលមាគ៌ារបស់បក្ស និងគោលនយោ​បាយ ច្បាប់របស់រដ្ឋ សកម្មភាពរបស់គណៈកម្មាធិការបក្ស រដ្ឋអំណាចរណសិរ្សមាតុភូមិ និង​អង្គ​ការនយោ​បាយសង្គមនានារបស់ទីក្រុងទៅកាន់ប្រជាជន; ឆ្លុះបញ្ចាំងពីបំណងប្រាថ្នារបស់ប្រ​ជា​ជន​ទៅកាន់បក្ស រដ្ឋ និងគណៈកម្មាធិការបក្ស រដ្ឋអំណាចភូមិភាគ។ល។ ឆ្លងតាមរយៈនោះ កាសែតនិងវិទ្យុទូរទស្សន៍កឹងធើ បានចូលរួមយ៉ាងសកម្មក្នុងការកសាងទី​ក្រុង​កឹងធើឱ្យរីក​ចម្រើន។

លេខាគណៈកម្មាធិការបក្សទីក្រុង លោកឡេក្វាងទុង ថតរូបអនុស្សាវរីយ៍ជាមួយថ្នាក់ដឹក​នាំនិងកម្មាភិបាលកាសែតនិងវិទ្យុទូរទស្សន៍កឹងធើ។

លេខាគណៈកម្មាធិការបក្សទីក្រុង លោកឡេក្វាងទុង ប្រសិទ្ធពរកាសែតនិងវិទ្យុទូរ​ទស្សន៍​កឹង​ធើ បន្តទទួលបានជោគជ័យជាច្រើនទៀតក្នុងឆ្នាំថ្មី។ ជាមួយគ្នានេះ លេខាគណៈ​កម្មា​ធិការបក្សទីក្រុង សង្ឃឹមថា កាសែតនិងវិទ្យុទូរទស្សន៍កឹងធើនឹងបន្តផ្លាស់ថ្មីច្នៃប្រតិដ្ឋ និង​លើកកម្ពស់គុណភាពខ្លឹមសារ កម្មវិធី និងផលិតផលសារព័ត៌មាន; លើកកម្ពស់គុណភាពការងារផ្សព្វ​ផ្សាយ; ជំរុញការអនុវត្តបច្ចេកវិទ្យាព័ត៌មាននិងផ្លាស់ប្ដូរឌីជីថល។ កាសែតនិងវិទ្យុទូរ​ទស្សន៍​កឹងធើ បន្តអនុវត្តល្អការងារផ្សព្វផ្សាយ ដើម្បីនាំយកសេចក្ដីសម្រេចមហា​សន្និ​បាតលើក​ទី១៤ របស់បក្ស និងសេចក្ដីសម្រេចមហាសន្និបាតបក្ខភាគទីក្រុងកឹងធើ លើកទី១ អាណត្តិកាល ២០២៥-២០៣០ ទៅក្នុងជីវភាពជាក់ស្ដែង; ព្រមទាំងជំរុញការផ្សព្វ​ផ្សាយ​អំពីការបោះឆ្នោតជ្រើសតាំងតំណាងរដ្ឋសភា នីតិកាលទី១៦ និងតំណាងក្រុមប្រឹក្សាប្រជាជនគ្រប់លំ​ដាប់ថ្នាក់ អាណត្តិកាល ២០២៦ - ២០៣១៕ 

ប្រភព÷ Theo baocantho.com.vn - ពេជ្រសឿន