មហាសាមគ្គីជនជាតិ គំរូក្នុងសហគមន៍

29/07/2024 - 14:39

ណាមសម្ព័ន្ធយុវជន

នោះគឺរហស្សនាមដែលសម្ព័ន្ធយុវជនឃុំ ទ្រុងថាញ់ ដាក់ឱ្យបងសើុងថាញ់ណាម អនុលេខាសម្ព័ន្ធយុវជនឃុំទ្រុងថាញ់ ស្រុកវុងលីម ខេត្តវិញឡុង។

សើុងថាញ់ណាម (អ្នកទី៣) រាប់ពីឆ្វេង។

សើុងថាញ់ណាម រៀបរាប់៖ “ផ្ទះខ្ញុំនៅភូមិទ្រុងត្រាច់ ឃុំទ្រុងថាញ់ ក្បែរវត្តសង្ឃមង្គល ហេតុនេះខ្ញុំតែងមកវត្តសឹងរាល់ឱកាសបុណ្យទាន បុណ្យប្រពៃណីរបស់ជនរួមជាតិខ្មែរ។ អាស្រ័យដូច្នោះ ទើបខ្ញុំបានស្គាល់បងសើុងកុងវិញ លេខាសម្ព័ន្ធយុវជនឃុំទ្រុងថាញ់ នៅពេលគាត់រៀបចំសកម្មភាពកីឡានិងសិល្បៈក្នុងវត្ត។ នៅពេលនោះ ខ្ញុំមិនត្រឹមតែចូលរួមប៉ុណ្ណោះទេ នៅថែមទាំងគាំទ្រអស់ពីចិត្តពីថ្លើមទៀតផង”។

សើុងថាញ់ណាម (អ្នកទី៦ជួរមុខ) រាប់ពីស្ដាំ។

កាន់តែចូលរួម បងសើុងថាញ់ណាម កាន់តែយល់ឃើញថា សកម្មភាពសម្ព័ន្ធយុវជនមានអត្ថន័យខ្លាំងណាស់ ពិសេសគឺយុទ្ធនាការរដូវវិស្សមកាលបៃតង មានការរៀបចំសម្អាតបរិស្ថានតាមដងផ្លូវ ដើម្បីរួមចំណែកកសាងផ្លូវជនបទថ្មីទៀតផង។ ហេតុនោះ នៅពេលសម្ព័ន្ធយុវជនឃុំទ្រុងថាញ់ ត្រូវការជ្រើសរើសបុគ្គលិកបន្ថែម បងណាម បានពិភាក្សាជាមួយគ្រួសារឈប់ធ្វើការងារនៅខេត្តប៊ិញយឿង ដើម្បីចូលរួមសម្ព័ន្ធយុវជននៅភូមិភាគ។

តាំងពីចូលរួមសកម្មភាពសម្ព័ន្ធយុវជនមក បងណាម តែងខ្នះខ្នែងនិងមិនរួញរាការលំបាក បងសើុងថាញ់ណាម ឱ្យដឹងបន្ថែម៖ “រយៈពេលកំពុងរៀនមហាវិទ្យាល័យភាសាវប្បធម៌ខ្មែរណាមបូ នៅខេត្តត្រាវិញ ខ្ញុំក៏បានចូលរួមសកម្មភាពសម្ព័ន្ធយុវជន ម្ល៉ោះហើយនៅពេលចូលរួមបំពេញការងារសម្ព័ន្ធយុវជនឃុំ ខ្ញុំគ្មានការទើសទាល់នោះទេ ថែមទាំងមានការរំភើបរីករាយទៀតផង។ ពិសេស ក្នុងរយៈពេលបំពេញការងារ ខ្ញុំទទួលបានការគាំទ្រពីបងវិញ និងមាមីងជាថ្នាក់ដឹកនាំឃុំបង្កលក្ខណៈឱ្យខ្ញុំអភិវឌ្ឍខ្លួន”។

បងសើុងកុងវិញ លេខាសម្ព័ន្ធយុវជនឃុំទ្រុងថាញ់ បញ្ជាក់៖ “សើុងថាញ់ណាម គឺអ្នកអស់ពីចិត្តពីថ្លើម ម្ល៉ោះហើយសក្ដិសមនឹងការងារសម្ព័ន្ធយុវជន។ ដោយសារថាញ់ណាម បានរៀនផ្នែកវប្បធម៌ខ្មែរ ទើបសម្ព័ន្ធយុវជនស្រុកទំនុកចិត្តប្រគល់ឱ្យគាត់ទទួលបន្ទុកក្លិបវប្បធម៌ខ្មែររបស់ស្រុក។ បច្ចុប្បន្ន ក្លិបមានសមាជិកជិត២០នាក់ ភាគច្រើនគឺសិស្សានុសិស្សជនជាតិខ្មែរ។ សមាជិកក្នុងក្លិបតែងអស់ពីចិត្តក្នុងការហាត់ពត់ ហើយបង្កើតបានឈុតសម្ដែងមួយចំនួនសម្រាប់សម្ដែងបម្រើក្នុងឱកាសបុណ្យទាន ឬបុណ្យប្រពៃណីជាដើម”។

សើុងថាញ់ណាម រ៉ាយរ៉ាប់៖ “ជាអ្នករស់នៅក្នុងភូមិភាគ ទើបខ្ញុំយល់ច្បាស់ពីការលំបាក ក៏ដូចជាតម្រូវការទទួលផលវប្បធម៌របស់សិស្សជនជាតិខ្មែរ។ ព្រោះហេតុនោះ ខណៈពេលបានប្រគល់ភារកិច្ចគ្រប់គ្រងក្លិប ខ្ញុំមានសេចក្ដីត្រេកអរខ្លាំងណាស់ ហើយខិតខំប្រឹងប្រែងដើម្បីយុវជនជនជាតិខ្មែរមានកន្លែងលេងកម្សាន្តមានប្រយោជន៍ ពង្រីកសមត្ថភាពវប្បធម៌សិល្បៈរបស់ខ្លួន និងរួមចំណែកអភិរក្សវប្បធម៌ខ្មែរណាមបូ”។

មុនពេលចែករំលែកបន្ថែមអំពីគំនិតផ្ទាល់ខ្លួន បងថាញ់ណាម រីករាយអំនួត៖ “រយៈពេលជាង ១ ឆ្នាំបំពេញការងារសម្ព័នយុវជន ខ្ញុំបានចូលកងជួរបក្សនៅឆ្នាំ២០២៣។ ខ្ញុំកំពុងខិតខំប្រឹងប្រែងដើម្បីក្លាយជាបក្ខជនពេញសិទ្ធិ។ ក្នុងតួនាទីជាបក្ខជន បានធ្វើឱ្យខ្ញុំកាន់តែទទួលខុសត្រូវច្រើនថែមទៀតជាមួយនឹងការងារសម្ព័ន្ធយុវជនឃុំ”៕

ហាថាញ់ - ថាច់ធី

ចែករំលែកអត្ថបទ

ពាក្យគន្លឹះ