មហាសាមគ្គីជនជាតិ គំរូក្នុងសហគមន៍

22/04/2024 - 16:21

ស្ពានតភ្ជាប់ "ឆន្ទៈបក្សនិងទឹកចិត្តប្រជាជន"

អត្ថបទទី៤៖ លោក “ឃោសនិក” នៅភូមិកឺយ៥ A

លោកយ័ញហ៊ីប។

លោក “ឃោសនិក” គឺឈ្មោះដែលជនរួមជាតិខ្មែរនៅភូមិកឺយ៥ A ឃុំខាញ់ប៊ិញតៃ ស្រុកត្រឹងវ៉ាន់ថើយ ខេត្តកាម៉ាវ ដាក់ឱ្យលោកយ័ញហ៊ីប។ ដ្បិតថា តាំងពីនៅបម្រើការងារជានគរបាលឃុំ លុះចូលនិវត្តន៍ក៏ជាប់ឆ្នោតជាអ្នកមានប្រជាប្រិយរយៈពេលជាង៧ឆ្នាំ គាត់តែងអនុវត្តល្អភារកិច្ចផ្សព្វផ្សាយ ចលនាជនរួមជាតិខ្មែរអនុវត្តល្អនូវគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ និងសេចក្ដីកំណត់របស់ភូមិភាគ។ល។

ភូមិកឺយ៥ A ជាភូមិមួយក្នុងចំណោមភូមិចំនួនបួននៅឃុំខាញ់ប៊ិញតៃ ដែលមានជនរួមជាតិខ្មែររស់នៅកុះករបំផុត។ ជីវភាពរបស់ជនរួមជាតិនៅទីនេះ ពឹងលើរបរកសិកម្មជាចម្បង ម្ល៉ោះហើយនៅជួបការលំបាកច្រើន។ លោកយ័ញហ៊ីប បានរ៉ាយរ៉ាប់៖ កន្លងមកមានយុវជនជាច្រើនគ្មានការងារធ្វើ ក្នុងនោះ មានយុវជនខ្មែរតែងជុំគ្នាស៊ីផឹក បង្កឱ្យខូចសន្តិសុខសណ្ដាប់ធ្នាប់ក្នុងភូមិក្នុងឃុំ។ ទោះបីបានគណៈ ផ្នែក អង្គការមហាជនក្រើនរំលឹកច្រើនលើកច្រើនសាក្ដី ប៉ុន្តែភាគច្រើនពួកក្មេងៗទាំងនេះ “មិនព្រមស្ដាប់”។ ឃើញដូច្នោះ អ្នកទាំងឡាយបានពឹងគាត់ “ជួយអន្តរាគមន៍”។ “បន្ទាប់ពីខ្ញុំជួបសំណេះសំណាលនិងណែនាំជាច្រើនសា មានយុវជនខ្មែរជាច្រើន ចាប់ផ្ដើមស្វែងរកការងារធ្វើ។ មិនតែប៉ុណ្ណោះ មានអ្នកខ្លះក៏ទៅដល់ក្រុងហូជីមិញ ខេត្តប៊ិញយឿង ដើម្បីរកការងារធ្វើ។ ប៉ុន្មានឆ្នាំមកនេះ នៅភូមិកឺយ៥ A ឬក្នុងទូទាំងឃុំខាញ់ប៊ិញតី ស្ថានភាពស៊ីផឹកបង្កអុកឡុក ធ្វើឱ្យខូចសណ្ដាប់ធ្នាប់ ហាក់ដូចជាគ្មានទៀតទេ។ តាមនរណាក៏ខិតខំធ្វើការងាររកស៊ី គិតគូរដល់ជីវភាពនោះដែរ។ល។” លោកយ័ញហ៊ីប បានចែករំលែកដូច្នេះ។

លោកយ័ញហ៊ីប (ខាងឆ្វេង) ថតរូបអនុស្សាវរីយ៍ជាមួយលោកស្រី អនុរដ្ឋមន្រ្តី អនុប្រធានគណៈកម្មាធិការជនជាតិ ណុងធីហា និងតំណាងអ្នកមានប្រជាប្រិយក្នុងដំណើរទៅទស្សនកិច្ចនៅរដ្ឋធានីហាណូយ។ (រូបថតៈ តួអង្គជាអ្នកផ្ដល់ជូន)

មានករណីបងយ័ញថាញ់ប៊ិញ ជាតួយ៉ាង។ បងប៊ិញ បានរ៉ាយរ៉ាប់៖ គ្មានដីសម្រាប់បង្កបង្កើនផល ពីរនាក់ប្ដីប្រពន្ធដើរធ្វើការស៊ីឈ្នួលដើម្បីផ្គត់ផ្គង់ជីវភាពប្រចាំថ្ងៃ។ នៅជនបទថ្ងៃខ្លះមាន ការងារធ្វើថ្ងៃខ្លះក៏ទេ ដូច្នោះជីវភាពប្ដីប្រពន្ធវ័យក្មេងរួមជាមួយនឹងកូនក៏ជួបលំបាកបង្គួរ។ មានច្រើនដងដែលគាត់ពិបាកចិត្ដ ជាក់ស្ដែងនៅពេលគ្មានការងារធ្វើ គាត់និងយុវជនមួយចំនួនក្នុងភូមិ តែងជុំគ្នាផឹកស៊ី។ ពេលខ្លះ “ស្រាចូលក្លាសម្ដី” ក៏ឈ្លោះប្រកែកគ្នា ជួនកាលវាយប្រតប់គ្នាទៀតផង។ ហេតុនោះ ប្ដីប្រពន្ធច្រើនតែរកាំរកូសគ្នា។ “សំណាងបានពូហ៊ីប មកណែនាំដោះស្រាយ បញ្ហាខ្ញុំចាំសម្ដីពូហ៊ីប ពន្យល់ណែនាំប្ដីប្រពន្ធ ខ្ញុំនៅក្មេង ខិតខំប្រឹងប្រែងរកស៊ី ទើបថ្ងៃមុខគិតគូរឱ្យកូនមិនសូវលំបាក។ល។ រួចហើយពូបានចង្អុលបង្ហាញគ្រួសារពូរ៉េត គ្មានដីផលិតកម្ម ដោយសារគាត់ប្រឹងប្រែងធ្វើការងាររកស៊ីទើបសេសសល់បានទ្រព្យសម្បត្តិ។ គ្រួសារបងរី មានត្រឹមតែផ្ទះ ប៉ុន្តែពីរនាក់ប្ដីប្រពន្ធគាត់ទៅធ្វើកម្មករនៅខេត្តប៊ិញយឿង មានប្រាក់ផ្ញើមកចិញ្ចឹមកូនរៀងរាល់ខែ ហើយសង់បានផ្ទះសម្បែងសមរម្យ។ល។ ឮពូនិយាយញយដងដូច្នោះ ខ្ញុំក៏ជ្រួតជ្រាប រួចពិគ្រោះយោបល់ជាមួយនឹងប្រពន្ធ ផ្ញើកូនជាមួយឪពុកម្តាយខ្ញុំដើម្បីទៅខេត្តប៊ិញយឿង រកការងារធ្វើ។ល។ ប៉ុន្មានឆ្នាំឃ្លាតឆ្ងាយពីស្រុកកំណើតទៅធ្វើការងារ ប្ដីប្រពន្ធខ្ញុំទើបអាចសង់បានផ្ទះឥដ្ឋ ហើយនៅសន្សែសន្សំបានប្រាក់បន្តិចបន្តួច។ល។ និយាយតាមត្រង់សំណាងណាស់ប្ដីប្រពន្ធខ្ញុំស្ដាប់តាមសម្ដីពូហ៊ីប!” បងប៊ិញ បានចែករំលែកដូច្នេះ។

ដើម្បីមានចំណេះដឹងនិយាយជាមួយនឹងជនរួមជាតិភាគតិច លោកយ័ញហ៊ីប តែងតាមដានព័ត៌មាន ជាពិសេសគឺគោលនយោបាយស្ដីពីជនជាតិ។ មិនតែប៉ុណ្ណោះ គាត់បានស្វែងយល់ ស្រាវជ្រាវនិងបញ្ចុះបញ្ចូលជនរួមជាតិភាគតិច តាមរយៈគំរូ “មនុស្សល្អ ការងារល្អ” ទៀតផង។ លោកកៅវ៉ាន់ង៉ីប អនុប្រធានការិយាល័យស្រុកត្រឹងវ៉ាន់ថើយ ឱ្យដឹង៖ ចំណេះដឹងដែលលោក យ័ញហ៊ីប បានសិក្សាស្រាវជ្រាវ ហើយយកទៅបញ្ជ្រាបផ្សព្វផ្សាយដល់ជនរួមជាតិភាគតិច មានភាពជិតដិតនិងងាយចងចាំ។ មិនត្រឹមតែនៅក្នុងភូមិ ក្នុងឃុំប៉ុណ្ណោះទេ លោកយ័ញហ៊ីប នៅទាំងជាអ្នកមានប្រជាប្រិយគំរូនៅខេត្តកាម៉ាវទៀតផង។ ប៉ុន្មានឆ្នាំកន្លង ការរួមយោបល់ជាច្រើនរបស់គាត់ក្នុងការលើកកម្ពស់ប្រសិទ្ធភាពការងារឃោសនាក្នុងជនរួមជាតិភាគតិច ត្រូវបានភូមិភាគអនុវត្តប្រកបដោយប្រសិទ្ធភាព។ អាស្រ័យហេតុនោះ មានអ្នកជាច្រើនតែងហៅគាត់ថា លោក “ឃោសនិក”។ ជាពិសេសទៀត គាត់ជាអ្នកមានប្រជាប្រិយម្នាក់ក្នុងចំណោមអ្នកមានប្រជាប្រិយជិត ៥០០ នាក់ ដែលបានជ្រើសរើសមកពីគ្រប់ខេត្ត ក្រុងទូទាំងប្រទេសទៅចូលរួមក្នុងកម្មវិធីស្ងើចសរសើរ លើកតម្កើងបុគ្គលគំរូ ជាអ្នកមានប្រជាប្រិយក្នុងជនរួមជាតិភាគតិចទូទាំងប្រទេស កាលពីចុងឆ្នាំ ២០២៣ កន្លងហើយ៕

ហាទ្រីវ - ថាច់ធី

ចែករំលែកអត្ថបទ

ពាក្យគន្លឹះ