មហាសាមគ្គីជនជាតិ គំរូក្នុងសហគមន៍

18/04/2024 - 15:55

ជានិច្ចកាលគឺជាគំរូល្អក្នុងទឹកចិត្តបញ្ញវន្តខ្មែរ

គ្រូបង្រៀនប្រជាជន ឡឹមអែស អតីតនាយករងមន្ទីរអប់រំនិងបណ្តុះបណ្តាលខេត្តសុកត្រាំង អតីតប្រធានសមាគមជំរុញការសិក្សាខេត្ត ជានិច្ចកាលគឺជាគំរូល្អឈានឡើងក្នុងការសិក្សានិងរួមចំណែកសម្រាប់បុព្វហេតុអប់រំ។ គ្រូបង្រៀនប្រជាជន ឡឹមអែស បានទទួលមរណភាពក្នុងជន្មាយុ៨៤ឆ្នាំ។ លោកគ្រូបានបន្សល់ទុកបុព្វហេតុបណ្តុះបណ្តាលមនុស្សនិងរួមចំណែកយ៉ាងធំធេងសម្រាប់ការអប់រំគួរឱ្យគោរពក្រៃលែង។

គ្រូបង្រៀនប្រជាជន ឡឹមអែស ក្នុងឱកាសជូនអាហារូបករណ៍ដល់សិស្សដែលមានជីវភាពលំបាកនៅខេត្តសុកត្រាំង។ (រូបថតជាឯកសារ)

ជាកូនអ្នកក្រ នៅភូមិឃូ២ ឃុំថាញ់ភូ ស្រុកមីស្វៀង ខេត្តសុកត្រាំង។ កំព្រា ឪពុកតាំងពីអាយុ៥ឆ្នាំ ដូច្នេះ លោកគ្រូឡឹមអែស បានម្តាយនាំទៅផ្ញើនឹងព្រះសង្ឃឱ្យរៀនសូត្រនៅវត្តព្រែកអណ្តើកឃុំថាញ់ភូ។ រៀងរាល់ពេលព្រឹក កុមារឡឹមអែស ត្រូវធ្វើដំណើរចម្ងាយផ្លូវ៥គីឡូម៉ែត្រទៅវត្តដើម្បីរៀនសូត្រ មកផ្ទះពេលរសៀលទៅឃ្វាលក្របី ដើម្បីរកប្រាក់ចំណូលបន្ថែមជួយម្តាយ។ ហេតុដូច្នេះ ចាប់តាំងពីពេលនោះមក លោកគ្រូតែងចិញ្ចឹមក្តីស្រមៃធ្វើជាគ្រូបង្រៀន ដើម្បីជួយបង្រៀនអក្សរខ្មែរដល់កូនចៅ មាមីងខ្មែរនៅស្រុកកំណើត។ ពេលរៀនចប់ថ្នាក់បឋមសិក្សា គាត់ទៅសុកត្រាំងបន្តការសិក្សានៅសាលាអនុវិទ្យាល័យខៃទ្រី។ ឆ្នាំ១៩៥៩ ប្រឡងបញ្ចប់ថ្នាក់ទី៩ លោកគ្រូចូលសាងផ្នួសនៅវត្តព្រែកអណ្តើក និងបើកថ្នាក់បង្រៀនអក្សរខ្មែរនៅក្នុងវត្ត។ បង្រៀនបណ្តើរ គាត់សិក្សាស្រាវជ្រាវសៀភៅដោយខ្លួនឯង ទាំងភាសាអង់គ្លេសនិងបារាំងទៀតផង។ កាលនោះ លោកគ្រូត្រូវបានចាត់ទុកជាព្រះសង្ឃមួយអង្គដំបូងបង្អស់បង្រៀនអក្សរវៀត-ខ្មែរ-បារាំង-បាលីដល់ព្រះសង្ឃនិងកូនចៅមាមីងខ្មែរនៅក្នុងវត្ត និងជាអ្នកដំបូង ស្វ័យសិក្សាក្នុងវត្តប្រឡងជាប់សញ្ញាបត្រមធ្យមសិក្សាទុតិយភូមិ។

ឆ្នាំ១៩៧៧ លោកគ្រូឡឹមអែស ចាកសិក្ខាបទចាប់អាជីពជាគ្រូបង្រៀនមួយរូបដ៏ស្មោះត្រង់ទៅបង្រៀននៅតាមសាលារៀននិងតាមវត្តអារាម។ ផ្តើមពីនោះ លោកគ្រូ តែងឧស្សាហ៍ក្នុងការសិក្សាស្រាវជ្រាវដោយខ្លួនឯង ដើម្បីក្លាយជាគ្រូបង្រៀនវិញ្ញាសាអក្សរសាស្ត្រ។ ពេលឃើញសិស្សានុសិស្សនៅតំបន់ជនរួមជាតិខ្មែរពិបាកទទួលយកចំណេះដឹងក្នុងការសិក្សា លោកគ្រូឡឹមអែស ក៏បានចងក្រងសៀវភៅបង្ហាត់បង្រៀនឧភយភាសាខ្មែរ-វៀតសម្រាប់សិស្សចំណេះទូទៅ។ សៀវភៅនេះ ចងក្រងដោយលោកគ្រូឡឹមអែស ត្រូវបានបោះពុម្ពឡើងវិញជាច្រើនលើកនិងក្លាយជាសៀវភៅសិក្សាគោល បានប្រើប្រាស់ជាផ្លូវការសម្រាប់សកម្មភាពបង្រៀននិងរៀនភាសាខ្មែរមកទល់ពេលនេះ។ លោកគ្រូក៏បានចូលរួមចងក្រងសៀវភៅភាសាខ្មែរប្រមាណ១០០ ក្បាល ក្នុងនោះ សៀវភៅថ្នាក់ជាតិ៥០ក្បាល។ បច្ចុប្បន្ន សៀវភៅសិក្សាគោលបង្ហាត់បង្រៀនពីថ្នាក់ទី១ ដល់ថ្នាក់ទី១២ ដែលចងក្រងដោយលោកគ្រូត្រូវបានប្រើប្រាស់សម្រាប់ការបង្ហាត់បង្រៀននៅតាមសាលាចំណេះទូទៅក្នុងទូទាំងតំបន់ណាមបូ។ ក្រៅពីនោះ លោគ្រូក៏ជាអ្នកនិពន្ធ និងជាសមាជិកក្រុមចងក្រងសៀវភៅសិក្សាគោលបង្ហាត់បង្រៀនភាសាខ្មែរនិងបាលី នៅសាលាមធ្យមសិក្សាបំពេញវិជ្ជាបាលីណាមបូ សៀវភៅបម្រើការបង្ហាត់បង្រៀនសម្រាប់គម្រោងបណ្តុះបណ្តាលភាសាខ្មែរដល់កម្មាភិបាល បុគ្គលិក អ្នករដ្ឋការលើភូមិសាស្ត្រខេត្តសុកត្រាំង។ លោកគ្រូក៏ជាសមាជិកក្រុមពិនិត្យសម្រេចការរិះគន់បធានបទ ឯកសារស្រាវជ្រាវ គម្រោងបង្រៀនភាសាខ្មែរ ធ្វើការសិក្សាស្រាវជ្រាវបកប្រែពាក្យស្លោក ពាក្យទំនឹមទំនៀម ចម្រៀងប្រជាប្រិយ។ល។ ប្រមាណជាង ១.០០០ អត្ថបទ។

ឆ្នាំ១៩៩៤ លោកគ្រូឡឹមអែស មានកិត្តិយស បានរដ្ឋប្រទានកិត្តិនាមជាគ្រូបង្រៀនឆ្នើមឆ្នាំ ២០០២ បានរដ្ឋប្រទានកិត្តិនាមជាគ្រូបង្រៀនប្រជាជន ក្លាយជាគ្រូបង្រៀនប្រជាជនជាជនជាតិខ្មែរដំបូងបង្អស់នៅណាមបូ។ ទន្ទឹមនឹងនោះ គ្រូបង្រៀនប្រជាជនឡឹមអែស នៅទាំងបានរដ្ឋប្រទានគ្រឿងឥស្សរិយយសពលកម្មចំណាត់ថ្នាក់លេខ៣នៅឆ្នាំ២០០៨ ព្រមទាំងប័ណ្ណសរសើរនិងលិខិតសរសើរជាច្រើនរបស់នាយករដ្ឋមន្ត្រីនៃរដ្ឋាភិបាលមជ្ឈិមសមាគមជំរុញការសិក្សាវៀតណាម ក្រសួងអប់រំនិងបណ្តុះបណ្តាលគណៈកម្មាធិការប្រជាជនខេត្តសុកត្រាំង គ្រប់ថ្នាក់ គ្រប់ផ្នែកជាច្រើនទៀត៕

លីធាន-មុនី

ចែករំលែកអត្ថបទ

ពាក្យគន្លឹះ