សុខភាព - អប់រំ អប់រំ

12/04/2018 - 09:37

ភាពវិវឌ្ឍនៅភូមិស្រុក

ដើមពីគោលការណ៍ គោលនយោបាយត្រឹមត្រូវ ស្របនឹងទឹកចិត្តប្រជាជនរបស់បក្សនិងរដ្ឋយើង ម្ល៉ោះហើយជនរួមជាតិខ្មែរតំបន់ឆ្ងាយដាច់ស្រយាលរបស់ខេត្តសុកត្រាំង មានជំហានរីកចម្រើន ជីវភាពប្រជាជនពីមួយថ្ងៃទៅមួយថ្ងៃកាន់តែធូរធារ។

ផ្ដើមពីគោលនយោបាយវិនិយោគទុន ម្ល៉ោះហើយសាលារៀននៅឃុំដែលមានជនរួមជាតិខ្មែរ

រស់នៅកុះកររបស់ខេត្តសុកត្រាំង ត្រូវបានកសាងសមរម្យ។

ឆ្នាំ២០១៧ ទូទាំងខេត្តសុកត្រាំងមានប្រជាជនចាកផុតពីភាពក្រីក្រចំនួន១១.២០០គ្រួសារ ក្នុងនោះ ក៏មានគ្រួសារជនជាតិខ្មែរ៥.០៣០គ្រួសារ អត្រាគ្រួសារជនជាតិខ្មែរក្រីក្ររបស់ខេត្តកាត់បន្ថយនៅត្រឹម១៧,៩៥% (ថយចុះ៥%បើប្រៀបនឹងចុងឆ្នាំ២០១៦)។ តាមប្រសាសន៍របស់លោកលីសុខា អនុប្រធានគណៈជនជាតិខេត្តសុកត្រាំង៖ ល្បឿនកាត់បន្ថយភាពក្រីក្រ សម្រេចលើសផែនការកំណត់នៃសេច ក្ដីសម្រេចដែលខេត្តដាក់ចេញ គឺដោយសារគោលនយោបាយអាទិភាព ឧបត្ថម្ភរបស់បក្សនិងរដ្ឋក្នុងការវិនិយោគទុនកសាងហេដ្ឋារចនាសម្ព័ន្ធ ឧបត្ថម្ភទុន ផ្ទេរជូនបច្ចេកទេស ផ្សព្វផ្សាយគោលនយោបាយ ច្បាប់ ក៏ដូចជាណែនាំប្រជាជនចេះរបៀបផលិតកម្ម ចិញ្ចឹមសត្វអភិវឌ្ឍសេដ្ឋកិច្ចគ្រួសារ ។ល។ ឆ្នាំ២០១៧ ខេត្តបានវិនិយោគទុនជាង១០០ពាន់លានដុងសម្រាប់អភិវឌ្ឍតំបន់ជនរួមជាតិខ្មែរ មានដូច៖ គោលនយោបាយឧបត្ថម្ភផ្ទះ ដីសង់ផ្ទះ ដីផលិតកម្ម ឧបត្ថម្ភផ្លាស់ប្តូរមុខរបរ ភ្ជាប់បណ្តាញ អគ្គិសនី ទឹកប្រើប្រាស់ ឧបត្ថម្ភបុលទុនអភិវឌ្ឍសេដ្ឋកិច្ច ជូនជនជាតិខ្មែររាប់សិបពាន់គ្រួសារ។ល។ ជាពិសេស កម្មវិធី១៣៥ របស់នាយករដ្ឋមន្រ្តីនៃរដ្ឋាភិបាល គឺជាការវិនិយោគទុនប្រកបដោយប្រសិទ្ធភាពបំផុត។ ឆ្នាំ២០១៧ ខេត្តសុកត្រាំងបានឧបត្ថម្ភជិត៦០ពាន់លានដុងដល់ឃុំតំបន់លំបាកពិសេស មានជនរួមជាតិខ្មែររស់នៅកុះករ ដើម្បីកសាងហេដ្ឋារចនាសម្ព័ន្ធចំនួន៨៣ សំណង់មានដូច ផ្លូវគមនាគមន៍ជនបទ ធារាសាស្រ្ត អាគារប្រជុំជីវភាពសហគមន៍; ឧបត្ថម្ភអភិវឌ្ឍផលិតកម្ម ពិពិធកម្មរបររកស៊ីចិញ្ចឹមជីវិត ពង្រីកទូលាយទម្រង់រូបភាពកាត់បន្ថយភាពក្រីក្រ ព្រមជាមួយនឹងការលើកកម្ពស់សមត្ថភាពកម្មាភិបាលមូលដ្ឋាននៅក្នុងសហគមន៍។ល។ ផ្ដើមពីនោះ បានជួយជនរួមជាតិខ្មែរមានកន្លែងរស់នៅសុខសាន្ត លំនឹងជីវភាព ជនបទពីមួយថ្ងៃទៅមួយថ្ងៃកាន់តែមានភាពរីកចម្រើន។

ផ្លូវគមនាគមន៍ជនបទនៅតាមភូមិរបស់ឃុំវៀងប៊ិញត្រូវបានកសាងរាបរលូន។

ប៉ុន្មានថ្ងៃជិតដល់បុណ្យចូលឆ្នាំថ្មី ពេលមកកាន់ភូមិតាអុង ឃុំវៀងប៊ិញ ស្រុកត្រឹងដេ ជាភូមិដែលមានជនរួមជាតិខ្មែររស់នៅជិត៩៧% និងជាភូមិលំបាកពិសេស ទើបឃើញច្បាស់អំពីភាពផ្លាស់ថ្មីនៃភូមិនេះនាបច្ចុប្បន្ន។ លោកគឹមរ៉ុង លេខាសាខាបក្ស ភូមិតាអុង ឲ្យដឹងដោយក្តីរីករាយ៖ “ភូមិតាអុងសម្រេចបានដូចសព្វថ្ងៃ គឺអាស្រ័យគោលនយោបាយត្រឹមត្រូវរបស់បក្សនិងរដ្ឋ បានឧបត្ថម្ភជូនតំបន់ជនរួមជាតិខ្មែរ។ ទន្ទឹមនឹងនោះ សាខាបក្សតែងយកចិត្តទុកដាក់ ពិសេស និងពង្រីកបានតួនាទីរបស់បក្ខជនខ្មែរក្នុងការផ្សព្វផ្សាយ ចលនាមាមីងខ្មែរអនុវត្តគោលនយោបាយជនជាតិប្រកបដោយប្រសិទ្ធភាព។ ពិសេស ផ្ដុំប្រមូលរាល់គោលនយោបាយរបស់បក្ស រដ្ឋ ឧបត្ថម្ភដល់គ្រួសារក្រីក្រដើម្បីអភិវឌ្ឍសេដ្ឋកិច្ច។ ទន្ទឹមនឹងនោះ ចង្អុលការដល់បក្ខជនទាំងឡាយត្រួតពិនិត្យ ណែនាំផលិតកម្មនិងខ្នះខ្នែងផ្សព្វផ្សាយដល់កសិករអនុវត្តវិទ្យាសាស្រ្តបច្ចេកទេសក្នុងការផលិត បង្វែររចនាសម្ព័ន្ធពូជដំណាំ សត្វចិញ្ចឹម ដើម្បីបង្កើនប្រាក់ចំណូល។ អាស្រ័យមាមីងមានស្មារតីភ្ញាក់រលឹកក្នុងការក្តាប់យកវិទ្យាសាស្រ្តបច្ចេកទេសក្នុងការផលិត ជាពិសេសគឺផលិតកម្មស្រូវមានគុណភាពខ្ពស់ ចិញ្ចឹមគោទឹកដោះ គោបង្កាត់ស៊ីន ចិញ្ចឹមជ្រូក។ល។ ម្ល៉ោះហើយ ការផលិតសុទ្ធសឹងសម្រេចប្រសិទ្ធភាពសេដ្ឋកិច្ចខ្ពស់។ ឆ្នាំ២០១៦ ទូទាំងភូមិមានគ្រួសារក្រីក្រចំនួន៩៣គ្រួសារ មកទល់សព្វថ្ងៃថយចុះនៅត្រឹម៥០ប៉ុណ្ណោះ”។ លោកថាច់សយ នៅភូមិតាអុង ផ្ដើមពីគ្រួសារក្រីក្រមួយ មានដីត្រឹមតែកន្លះកុងសម្រាប់សង់ផ្ទះ ក្រោយរយៈពេលច្រើនឆ្នាំខ្នះខ្នែងរកស៊ី មកទល់សព្វថ្ងៃបានក្លាយជាគ្រួសារមួយធូរធារក្នុងភូមិ។ មិនត្រឹមតែធ្វើមានធ្វើបានសម្រាប់គ្រួសារខ្លួនប៉ុណ្ណោះ លោកថាច់សយនៅទាំងចែករំលែករបៀបធ្វើមានដល់មាមីងក្នុងភូមិនិងខ្នះខ្នែងចលនាមាមីងរួមវិភាគទានកសាងជនបទថ្មីទៀតផង។

ភូមិរ៉ាចសេន ឃុំថាញ់ភូ ស្រុកម៉ីស្វៀង មានជនរួមជាតិខ្មែររស់នៅជាង៩៨% ពីមុនជាភូមិក្រីក្របំផុតរបស់ឃុំ។ ទោះបីដូច្នោះក្តី ក្រោយពីបានទទួលរបបគោលនយោ បាយរបស់បក្ស រដ្ឋ និងការខិតខំប្រឹងប្រែងរបស់ប្រជាជន ម្ល៉ោះហើយជីវភាពប្រជាជនជាជំហានៗបានលើកកម្ពស់។ ផ្ដើមពីភូមិមានអត្រាគ្រួសារក្រីក្រជាង៧០%នៅឆ្នាំ២០០០ មកទល់សព្វថ្ងៃថយចុះនៅក្រោម៩%។ លោកម៉ាយថាញ់កូវ ប្រធានគណៈកម្មាធិការប្រជាជនឃុំថាញ់ភូ ឲ្យដឹង៖ “ជាឃុំលំបាកពិសេស អាស្រ័យមានគោល នយោបាយជនជាតិរបស់បក្សនិងរដ្ឋ ពិសេសគឺកម្មវិធី១៣៥វិនិយោគទុនអភិវឌ្ឍតំបន់ជនជាតិខ្មែរ ម្ល៉ោះហើយតំបន់ជនបទ មានភាពវិវឌ្ឍន៍ ជីវភាពប្រជាជនមានការរីកចម្រើនគួរឲ្យកត់សម្គាល់”។ មិនត្រឹមតែវិនិយោគទុនសម្រាប់គ្រួសារក្រីក្រប៉ុណ្ណោះទេ រដ្ឋអំណាចភូមិភាគនៅទាំងវិនិយោគទុន កសាងសាលារៀន ដំណាក់សុខាភិបាលផ្លូវគមនាគមន៍ជនបទ ស្ថានីយផ្គត់ផ្គង់ទឹក ភ្ជាប់បណ្តាញអគ្គិសនីចុះទៅជនបទ។ល។ លោកតូភិន នៅភូមិរ៉ាចសេន ឃុំថាញ់ភូ មានអាយុជាង៧៥ឆ្នាំ ឲ្យដឹង៖ “កាលនោះ ទូទាំងភូមិសុទ្ធសឹងជាផ្លូវដី ផ្ទះប្រក់ស្លឹក ប្រើចង្កៀងប្រេងកាត។ល។ ឥឡូវបានរដ្ឋ វិនិយោគទុនកសាងគ្រប់សព្វ។ ផ្លូវបេតុង អគ្គិសនី ទឹកស្អាត បានតភ្ជាប់ដល់ផ្ទះ សាលារៀនមានភាពសមរម្យ អ្នកក្របានរដ្ឋគិត គូរសង់ផ្ទះជូន ផ្ដល់ទុនធ្វើការងាររកស៊ី ដីផលិតស្រូវ។ល។ ហេតុនេះនរណាក៏ខ្នះខ្នែងធ្វើការរកស៊ីដើម្បីធ្វើមានធ្វើបានដែរ។ សម្លឹងរួមតំបន់ជនបទឥឡូវមិនប្លែកពីទី ក្រុងទេ”។

តាមប្រសាសន៍របស់លោកលីសុខា ឃុំតំបន់ឆ្ងាយដាច់ស្រយាលមានជនរួមជាតិ ខ្មែររស់នៅកុះករ ក្រោយរយៈពេលច្រើនឆ្នាំអនុវត្តគោលនយោបាយរបស់បក្សនិង រដ្ឋ ដែលវិនិយោគទុន ឃើញថាសាលារៀនដំណាក់សុខាភិបាលបានកសាងដោយសុីម៉ងត៍ ផ្លូវគមនាគមន៍ជនបទបានចាក់បេតុង និងមានអគ្គិសនី ទឹកស្អាតប្រើប្រាស់។ល។ ឆ្នាំ២០១៨ ខេត្តក៏បានលើកជូនគម្រោងអនុវត្តសេចក្ដីសម្រេចចិត្តលេខ២០៨៥/QĐ-TTg ចុះថ្ងៃ៣១/១២/២០១៦ របស់នាយករដ្ឋមន្រ្តីនៃរដ្ឋាភិបាល។ គម្រោងមានទុនវិនិយោគសរុបជាង៤៩០ពាន់លានដុង សម្រាប់ឧបត្ថម្ភដីសង់ផ្ទះ ដីផលិតកម្ម ផ្លាស់ប្តូរមុខរបរនិងឧបត្ថម្ភទឹកស្អាតប្រើប្រាស់ជូនគ្រួសារជនជាតិខ្មែរនៅរប៉េះរបោះលើ ភូមិសាស្រ្តខេត្ត។ ប្រសិនបើគម្រោងបានផ្តល់សច្ចាប័ន នោះគឺជាក្តីរីករាយរបស់ជនរួមជាតិខ្មែរ ពិសេសគឺគ្រួសារក្រីក្រលើភូមិសាស្រ្តខេត្តមានឱកាសឈានឡើងក្នុងជីវភាព៕

យ្វីអាញ់-សេរី

ចែករំលែកអត្ថបទ

ពាក្យគន្លឹះ