សុខភាព - អប់រំ អប់រំ

03/10/2026 - 12:39

លើកស្ទួយសិស្សានុសិស្សតំបន់ជនជាតិភាគតិចទៅសាលា

ឈានចូលឆ្នាំសិក្សា ២០២៦ - ២០២៧ ការងារអប់រំនៅតំបន់ជនជាតិភាគតិច លើភូមិឋានទីក្រុងកឹងធើ បន្តកត់ត្រានូវការផ្លាស់ប្តូរយ៉ាងសកម្មជាច្រើន។ រួមជាមួយនឹងការយកចិត្តទុកដាក់លើវិស័យអប់រំ និងបណ្តុះបណ្តាល គណៈកម្មាធិការបក្ស រដ្ឋអំណាចមូលដ្ឋាន និងសាលា បានបង្កលក្ខណៈងាយស្រួលដើម្បីឱ្យសិស្សានុសិស្សជនជាតិភាគតិច បានរៀនសូត្រពេញលេញ ជាជំហានលើកកម្ពស់គុណភាពអប់រំ។

ទីក្រុងកឹងធើ លើកស្ទួយសិស្សានុសិស្សតំបន់ជនជាតិភាគតិចទៅសាលា។

គិតគូរអភិវឌ្ឍន៍ការអប់រំនៅតំបន់ជនជាតិភាគតិច តែងតែបានបក្ស និងរដ្ឋកំណត់ថាជាភារកិច្ចសំខាន់ រួមចំណែកធានាឱកាសរៀនសូត្រសមភាពសម្រាប់កុមារគ្រប់រូប។ មិនត្រឹមតែបង្កលក្ខណៈងាយស្រួលដើម្បីឱ្យសិស្សានុសិស្សបានទៅសាលារៀនប៉ុណ្ណោះទេ ការងារអប់រំជនជាតិនៅទាំងឆ្ពោះទៅរកការលើកកម្ពស់គុណភាពបង្រៀន និងរៀន ជួយឱ្យប្អូនៗខិតជិតចំណេះដឹង អភិវឌ្ឍន៍គ្រប់ជ្រុងជ្រោយ ជឿជាក់ក្នុងការកសាងខ្លួន បង្កើតមុខរបរ និង រក្សាអត្តសញ្ញាណវប្បធម៌ជនជាតិទៀតផង។

ឆ្នាំសិក្សា ២០២៦ - ២០២៧ ការងារចលនាសិស្សានុសិស្សតំបន់ជនជាតិភាគតិច ទៅសាលា នៅទីក្រុងកឹងធើ បន្តសម្រេចបានលទ្ធផលវិជ្ជមាន។ អត្រាកុមារមតេយ្យសិក្សាអាយុ ៥ ឆ្នាំចូលថ្នាក់សម្រេច ៩៦% ។ កម្រិតបឋមសិក្សាសម្រេច ៩៩,១៧% និងកម្រិតអនុវិទ្យាល័យសម្រេច ៩៩,៥៤%។ ទូទាំងទីក្រុងបច្ចុប្បន្នមាន ៧១ សាលាបង្រៀនភាសាខ្មែរ ដោយមាន ១.៦៩៧ ថ្នាក់ ទាក់ទាញសិស្សានុសិស្សចំនួន ៤៥.៩៣៤ នាក់តាមរៀន។ ទន្ទឹមនឹងនោះ វិទ្យល័យជនជាតិអន្តេវាសិកចំនួន ១៣ កំពុងរៀបចំបង្រៀនជូនសិស្សានុសិស្សចំនួន ៤.៣៣៨ នាក់។ នេះគឺជាមូលដ្ឋានអប់រំដែលមានតួនាទីសំខាន់ក្នុងការបណ្តុះបណ្តាលប្រភពធនធានមនុស្ស បង្កលក្ខណៈងាយស្រួលដើម្បីឱ្យសិស្សានុសិស្សជនជាតិភាគតិច បានរៀនសូត្រក្នុងបរិស្ថានសមស្រប ជាជំហានៗអភិវឌ្ឍន៍សមត្ថភាព និងលក្ខណសម្បត្តិ។

ដែលគួរចាប់អារម្មណ៍ គឺកងជួរគ្រូបង្រៀនភាសាខ្មែរកាន់តែបានយកចិត្តទុកដាក់ធ្វើឱ្យសុក្រឹត។ ទូទាំងទីក្រុងបច្ចុប្បន្នមានគ្រូបង្រៀនភាសាខ្មែរចំនួន ២២៩ រូប ឆ្លើយតបនឹងតម្រូវការផ្លាស់ប្តូរថ្មីវិធីសាស្ត្របង្រៀនតាមកម្មវិធីអប់រំសកលឆ្នាំ ២០១៨។ ការរក្សា និងលើកកម្ពស់គុណភាពបង្រៀនភាសាខ្មែរ មិនត្រឹមតែរួមចំណែកលើកកម្ពស់សមត្ថភាពភាសាសម្រាប់សិស្សានុសិស្សប៉ុណ្ណោះទេ ថែមទាំងជួយប្អូនៗយល់ដឹង គោរព និងពង្រីកតម្លៃវប្បធម៌ប្រពៃណីរបស់ជនជាតិទៀតផង។

ម៉ោងរៀនភាសាខ្មែរនៅសកលវិទ្យាល័យជនជាតិអន្តេវាសិកនិងអនុវិទ្យាល័យកេសាត់ រួមចំណែកថែរក្សាអត្តសញ្ញាណវប្បធម៌ជនជាតិ។

ទន្ទឹមនឹងនោះ ដើម្បីរក្សាចំនួនសិស្ស បន្ថយស្ថានភាពសិស្សបោះបង់ការសិក្សាដោយសារស្ថានភាពគ្រួសារ គណៈកម្មាធិការបក្ស រដ្ឋអំណាចមូលដ្ឋាន និងសាលា បានម្ចាស់ការចូលរួមធ្វើអន្តរាគមន៍ ក្តោបក្តាប់ទាន់ពេលនូវស្ថានភាពនៃករណីនីមួយៗ។ នៅឃុំថាញថើយអាង គណៈប្រជាជននានាភូមិបានសហការជាមួយសាលារៀន ពិនិត្យស្រាវជ្រាវសិស្សានុសិស្សដែលមានហានិភ័យឈប់រៀន ចុះទៅជួបផ្ទាល់នៅតាមគ្រួសារនីមួយៗដើម្បីឃោសនា ចលនា តាមរយៈនោះ ជួយឱ្យប្អូនៗបន្តរក្សាការរៀនសូត្រ។ លោក ហ្វិញ ត្រុងខាញ់ ប្រធានគណៈប្រជាជនភូមិហ៊ឹងថើយ ឃុំថាញថើយអាង បានចែករំលែក៖ “នៅមូលដ្ឋាន គ្រួសារមួយចំនួនដោយសារលក្ខណៈសេដ្ឋកិច្ចលំបាក ឬឪពុកម្តាយទៅធ្វើការនៅឆ្ងាយ ដូច្នេះការគិតគូរដល់រឿងរៀនសូត្ររបស់កូនចៅ ជួនកាលមិនទាន់បានដិតដល់នៅឡើយ។ គណៈប្រជាជនភូមិបានរក្សាខ្ជាប់ការសហការជាមួយលោកគ្រូអ្នកគ្រូនៅសាលាអនុវិទ្យាល័យថាញថើយអាង ចុះទៅដល់ផ្ទះជួបផ្ទាល់ជាមួយអាណាព្យាបាលដើម្បីក្តាប់ស្ថានភាព ជំរុញទឹកចិត្តមាមីង និងឧបត្ថម្ភសៀវភៅ សិក្ខូបករណ៍បានទាន់ពេល។ អាស្រ័យហេតុនេះ ដើមឆ្នាំសិក្សានេះ ភូមិបានចលនាជោគជ័យនូវសិស្សចំនួន ៦ នាក់ដែលមានហានិភ័យនឹងការឈប់រៀន ឱ្យត្រឡប់មកថ្នាក់រៀនវិញយ៉ាងពេញលេញ”។

តាមប្រសាសន៍លោក យ័ញ ហ្វាងង្វៀងនាយករងមន្ទីរអប់រំ និងបណ្តុះបណ្តាលទីក្រុងកឹងធើ ឆ្នាំសិក្សា ២០២៦ - ២០២៧ វិស័យអប់រំបានកំណត់ថា ការលើកកម្ពស់គុណភាពអប់រំជាក់ស្តែង គឺជាភារកិច្ចសំខាន់មួយចំពោះតំបន់ជនជាតិភាគតិច។ គោលដៅមិនត្រឹមតែធានាឱ្យសិស្សានុសិស្សបានទៅសាលារៀនប៉ុណ្ណោះទេ នៅទាំងបង្កលក្ខណៈងាយស្រួលដើម្បីឱ្យប្អូនៗរៀនសូត្របានល្អ អភិវឌ្ឍន៍គ្រប់ជ្រុងជ្រោយ និងរក្សាអត្តសញ្ញាណវប្បធម៌ជនជាតិទៀតផង។ តាមរយៈនោះ ផ្នែកផ្តោតសំខាន់លើការប្រមូលផ្តុំអនុវត្តកម្មវិធីអប់រំសមស្របនឹងលក្ខណៈតំបន់ជនជាតិភាគតិច។ ផ្លាស់ប្តូរថ្មីវិធីសាស្ត្របង្រៀន ពិនិត្យ វាយតម្លៃ។ បំប៉ន ធ្វើឱ្យសុក្រឹតតាមបទដ្ឋានកងជួរគ្រូបង្រៀន។ អនុវត្តពេញលេញនូវរបបនានា គោលនយោបាយចំពោះសិស្សានុសិស្ស និងជំរុញខ្លាំងការផ្លាស់ប្តូរឌីជីថលក្នុងការគ្រប់គ្រងសាលា។ ជាពិសេស ការផ្តល់ជូននូវសៀវភៅសិក្សាគោល និងឯកសារណែនាំបង្រៀនភាសាខ្មែរចាប់ពីថ្នាក់ទី ១ ដល់ថ្នាក់ទី ៥ បានកំណត់ថាជាដំណោះស្រាយមួយ រួមចំណែកលើកកម្ពស់គុណភាពបង្រៀន និងរៀនភាសាខ្មែរនៅក្នុងមូលដ្ឋានអប់រំនានា។

ការយកចិត្តទុកដាក់ពីគ្រប់លំដាប់ថ្នាក់ បណ្តាវិស័យ រួមជាមួយនឹងការទទួលខុសត្រូវរបស់ សាលា គ្រួសារ និងសហគមន៍ កំពុងតែរួមចំណែកលើកស្ទួយសិស្សានុសិស្សតំបន់ជនជាតិ ភាគតិចលើដំណើរការរៀនសូត្រ។ តាមរយៈនោះ បង្កប្រភពធនធានវ័យក្មេងដែលមានចំណេះដឹង ឆន្ទៈ ទាំងធ្វើសមាហរណកម្មជាមួយនឹងការអភិវឌ្ឍទូទៅរបស់ទីក្រុង ទាំងមានស្មារតីម្ចាស់ការថែរក្សា និងពង្រីកតម្លៃវប្បធម៌ដ៏ប្រពៃរបស់ជនរួមជាតិខ្មែរផងដែរ៕

ហុងទើ - មេងលី

ចែករំលែកអត្ថបទ

ពាក្យគន្លឹះ