សុខភាព - អប់រំ អប់រំ

09/06/2015 - 09:23

អស់ពីចិត្តដើម្បីសិស្សជាទីស្រឡាញ់

កើតឆ្នាំ១៩៨៨ ក្នុងគ្រួសារកសិករក្រីក្រមួយដែលមានបងប្អូនដល់ទៅ៤នាក់នៅភូមិព្រែកអំពិល ឃុំភូកឹង ស្រុកទីវកឹង ខេត្តត្រាវិញ ហេតុនេះ ជីវភាពជួបការលំបាក។ ថាច់ប៊ិញ ឲ្យដឹងកាលនៅតូចក្រៅពីពេលទៅសាលារៀន ប្អូនតែងជួយធ្វើកិច្ចការផ្ទះ ដើម្បីឪពុកម្តាយមានពេលទៅធ្វើស្រែ និងធ្វើការឈ្នួល។ ប៉ុន្តែពួកគាត់មិនដែលបង្ខំឲ្យប៊ិញធ្វើកិច្ចការទេ ពីព្រោះខ្លាចមានឥទ្ធិពលលើការរៀនសូត្រ។ ហេតុនេះ នៅរាល់កម្រិតសិក្សា ថាច់ប៊ិញតែងខិតខំរៀនសូត្រសម្រេចបាននិទ្ទេសគ្រាន់បើ ពូកែរៀងរាល់ឆ្នាំ។

លោកគ្រូថាច់ប៊ិញក្នុងម៉ោងបង្រៀន។

ឆ្នាំ២០០៦ ក្រោយពីប្រឡងចប់ថ្នាក់ទី១២ ថាច់ប៊ិញ ប្រឡងជាប់អនុមហាវិទ្យាល័យភាសាអង់គ្លេសឆ្នាំសិក្សា២០០៦-២០០៩ នៅសកលវិទ្យាល័យត្រាវិញ។ ក្នុងអំឡុងពេលសិក្សា មិនថានៅអនុមហាវិទ្យាល័យឬវិទ្យាល័យនោះទេ ថាច់ប៊ិញ តែងជាសិស្សឆ្នើមរបស់ថ្នាក់និងរបស់សាលា។ ថាច់ប៊ិញ ឲ្យដឹង ភាសាអង់គ្លេសជាវិញ្ញាសាចំណូលចិត្តតាំងពីពេលប៊ិញរៀននៅកម្រិតបឋមម៉្លេះ ដូច្នេះបានជាមុខវិជ្ជានេះនៅរាល់កម្រិតសិក្សាថាច់ប៊ិញ រៀនសម្រេចចំណាត់ថ្នាក់ល្អសឹងរៀងរាល់ខែ។ លុះពេលរៀននៅអនុមហាវិទ្យាល័យ ការរៀនសូត្រក៏មិនមានការផ្លាស់ប្ដូរច្រើននោះទេ។ អំឡុងពេលសិក្សានៅអនុមហាវិទ្យាល័យ ដោយសារជីវភាពគ្រួសារខ្វះខាត គ្មានលុយជួលផ្ទះសំណាក់ ហេតុនេះឪពុកម្ដាយ ថាច់ប៊ិញ បានទៅសុំវត្តសម្បូរិទ្ធិស័កដើម្បីស្នាក់នៅបន្តការសិក្សា។ ទំនេរពីការសិក្សា ប៊ិញតែងជួយធ្វើការងារវត្តនិងឆ្លៀតពេលទៅរកការងារធ្វើបន្ថែម មានដូចជួយរត់តុបាយ កាហ្វេជាដើម ដើម្បីរកលុយទប់ទល់ឲ្យការសិក្សានឹងជួយសម្រាលអម្រែកឪពុកម្ដាយ។ ក្រៅពីនោះ ថាច់ប៊ិញ នៅទាំងឆ្លៀតពេលទៅរៀនថ្នាក់បាលីទី១ នៅវត្តគោករាជសីមា (គោក) ស្រុកចូវថាញ់ (ត្រាវិញ) ទៀតផង។

ក្រោយពីបញ្ចប់ការសិក្សានៅអនុមហាវិទ្យាល័យក្នុងឆ្នាំ២០១០ ប៊ិញបានដាក់ពាក្យសូមធ្វើជាគ្រូបង្រៀនភាសាអង់គ្លេសនៅសាលាបឋមសិក្សាភូកឹង។ ថាច់ប៊ិញ បានប្រាប់ពីមូលហេតុជំរុញឲ្យប៊ិញចង់ធ្វើជាគ្រូបង្រៀនថា៖ "ដោយសារខ្ញុំជាអតីតសិស្សនៅទីនេះស្រាប ដូច្នេះខ្ញុំអាចដឹងយល់ខ្លះៗអំពីសិស្សទាំងឡាយនៅទីនេះ ពីព្រោះសិស្សនៅទីនេះ ភាគច្រើនជាជនជាតិខ្មែរ ការទទួលយកនូវចំណេះដឹងមានកម្រិតដូច្នេះ ពាក្យណាដែលប្អូនៗមិនយល់ ខ្ញុំអាចពន្យល់ជាភាសាខ្មែរដើម្បីឲ្យប្អូនៗងាយយល់"។ ថាច់ប៊ិញ បង្ហើបឲ្យដឹង បានក្លាយជាគ្រូបង្រៀនគឺមានភាពខុសគ្នានឹងកាលនៅជាសិស្ស។ ធ្វើជាគ្រូបង្រៀនគឺមានការផ្លាស់ប្ដូរទាំងអាកប្បកិរិយា សំដីសំដៅនិងចំណេះដឹង។ ដំបូងជួបការលំបាកណាស់ដែរ ប៉ុន្តែអាស្រ័យបានលោកគ្រូ អ្នកគ្រូជារៀមច្បងជួយណែនាំ វិធីសាស្រ្តបង្រៀន មានដូចការត្រៀមខ្លួនចូលបង្រៀន ស្វែងរកឯកសារ ឬគន្លឹះថ្មីៗ ក្នុងការបង្រៀនធ្វើយ៉ាងណាឲ្យសិស្សឆាប់ចាំឆាប់យល់។ ម្យ៉ាងទៀតដោយការយកចិត្តទុកដាក់របស់គណៈនាយកសាលា បានបង្កលក្ខណសម្បត្តិឲ្យទៅបន្តការសិក្សានៅមហាវិទ្យាល័យ ហេតុនេះ លោកគ្រូថាច់ប៊ិញ បានរៀនបញ្ចប់បរិញ្ញាប័ត្រភាសាអង់គ្លេសក្នុងឆ្នាំ២០១៤។

ជារៀងរាល់ឆ្នាំ លោកគ្រូថាច់ប៊ិញ នៅទាំងស្ម័គ្រចិត្តបង្រៀនបំប៉នសិស្ស "ក្លឹបភាសាអង់គ្លេស" របស់សាលានៅពេលយប់ដោយមានសិស្សចូលរៀនពី៣០-៤០នាក់និងចូលរួមប្រឡង"Olympic ភាសាអង់គ្លេស " ថ្នាក់ស្រុកសម្រេចគុណភាពខ្ពស់។ ក្រៅពីនោះ លោកគ្រូថាច់ប៊ិញ បានរួមប្រាស្រ័យបង្រៀនភាសាអង់គ្លេសនៅសាលាពុទ្ធិកអនុវិទ្យាល័យតាមវត្តនានា ដូចជាវត្តអរុណរង្សីចាកអាគ្រោង វត្តពោធិវង្សកំពង់ដូង វត្តព្រះបាទកងចក្រកំពង់មាស វត្តសាលតិត្ថារាមកំពង់រាំង (ស្រុកទីវកឹង) និងវត្តមុនីរង្សីមេពាំង (ស្រុកកូវកែ) ដោយឥតយកកម្រៃ។

លោកគ្រូង្វៀនវុាំងធ្វឹង នាយកសាលាបឋមសិក្សាភូកឹង ឲ្យដឹង៖ "ក្នុងការបង្ហាត់បង្រៀន លោកគ្រូថាច់ប៊ិញ តែងសម្រេចបានល្អភារកិច្ចខ្នះខ្នែងក្នុងរាល់សកម្មភាពដែលសាលាបានបំផុសចលនា។ យកចិត្តទុកដាក់បំប៉នប្អូនៗក្នុងកម្មវិធី Olympic ភាសាអង់គ្លេស ដោយឥតយកកម្រៃ។ រួមចំណែកក្នុងការបង្កើនអត្រាសិស្សប្រឡងបញ្ចប់កម្រិតសិក្សាសម្រច១០០%។ សកម្មចូលរួមធ្វើឲ្យសាលាបានក្លាយជាអង្គភាពបណ្ដុះបណ្ដាល ពូកែមួយក្នុងចំណោមអង្គភាពពូកែៗទាំងឡាយរបស់ស្រុកទីវកឹង"៕

ពេជ្រសឿន

ចែករំលែកអត្ថបទ

ពាក្យគន្លឹះ