ព្រឹត្តិការណ៍ - នយោបាយ ព្រឹត្តិការណ៍

17/10/2026 - 15:29

នារីតំបន់ព្រំដែនកឹងធើពង្រីកកម្លាំងផ្ទៃក្នុង កសាងភូមិស្រុក

ឆ្ពោះដល់រំលឹកខួបអនុស្សាវរីយ៍ ៩៦ឆ្នាំ ទិវាបង្កើតសមាគមសហព័ន្ធនារីវៀតណាម (២០/១០/១៩៣០-២០/១០/២០២៦) និង១៦ឆ្នាំ ទិវានារីវៀតណាម (២០/១០/២០១០-/១០/២០២៦) សមាគមសហព័ន្ធនារីបណ្តាឃុំតំបន់ព្រំដែនទីក្រុងកឹងធើ បានចាត់តាំងសកម្មភាពជាក់ស្តែងជាច្រើន ដើម្បីបង្កលក្ខណៈឱ្យសមាជិកាបានជួបជុំ ដោះដូរ សាមគ្គីភាព និងលើកកម្ពស់ជីវភាពស្មារតី។ ឆ្លងតាមរយៈនោះ ពង្រីកតួនាទីរបស់នារីក្នុងការថែរក្សាអត្តសញ្ញាណវប្បធម៌ខ្មែរ កសាងគ្រួសារសុភមង្គល និងរួមចំណែកកសាងភូមិស្រុកឱ្យកាន់តែអភិវឌ្ឍ។

កម្មាភិបាល សមាជិកានារីឃុំកូវឡាវយុងជួបជុំ ដោះដូរ ក្នុងឱកាសអនុស្សាវរីយ៍ទិវានារីវៀតណាម ថ្ងៃទី២០ ខែតុលា។

នៅឃុំកូវឡាវយុង បណ្តាសាខាសមាគមនារីភូមិបានចាត់តាំងការជួបជុំ ដោះដូរ ក្នុងឱកាសអនុស្សាវរីយ៍ទិវានារីវៀតណាម ថ្ងៃទី២០ ខែតុលា។ ក្នុងបរិយាកាសរីករាយនិងកក់ក្តៅ កម្មាភិបាលនិងសមាជិការួមគ្នារំលឹកឡើងវិញនូវប្រពៃណីរុងរឿងរបស់នារីវៀតណាម ចែករំលែកបទពិសោធន៍ក្នុងពលកម្មផលិត កសាងគ្រួសារសុភមង្គល និងចូលរួមបណ្តាចលនានៅភូមិភាគ។ ការជួបជុំទាំងនេះមិនត្រឹមតែនាំមកនូវក្តីរីករាយប៉ុណ្ណោះទេ ថែមទាំងបង្កឱកាសឱ្យបងប្អូនបានជិតស្និទ្ធ លើកទឹកចិត្តគ្នាជម្នះការលំបាក ព្រមទាំងចូលរួមយ៉ាងសកម្មក្នុងកិច្ចការសមាគម និងបណ្តាសកម្មភាពសហគមន៍។

បងស្រី ថាច់ធីសម្បត្តិ សមាជិកានារីភូមិវ៉ថាញ់វ៉ាំង ឃុំកូវឡាវយុង បានចែករំលែក៖ “ចូលរួមពិធីជួបជុំ បងប្អូនមានឱកាសជំនួប ចែករំលែកបទពិសោធន៍ក្នុងជីវភាពនិងគ្រួសារ លើកទឹកចិត្តគ្នាខិតខំពលកម្ម អភិវឌ្ឍសេដ្ឋកិច្ច។ បណ្តាសកម្មភាពនេះជួយយើងខ្ញុំកាន់តែមានភាពជិតស្និទ្ធ សាមគ្គីគ្នា ក៏ដូចជាមានកម្លាំងចិត្តបន្ថែមចូលរួមចលនានារី និងបណ្តាសកម្មភាពនៅភូមិភាគ”។

ឆ្លងតាមរយៈបណ្តាសកម្មភាពជួបជុំ សមាគមសហព័ន្ធនារីឃុំកូវឡាវយុងបន្តផ្សព្វផ្សាយស្មារតីសាមគ្គី ជឿជាក់ ម្ចាស់ការ និងទំនួលខុសត្រូវក្នុងកងជួរកម្មាភិបាល សមាជិកា ព្រមទាំងលើកទឹកចិត្តនារីពង្រីកតួនាទីក្នុងការកសាងគ្រួសារសម្បូរសប្បាយ ជឿនលឿន និងសុភមង្គល រួមចំណែកកសាងភូមិស្រុកឱ្យកាន់តែអភិវឌ្ឍ។

នៅឃុំឡាយហ្វា ទន្ទឹមនឹងបណ្តាសកម្មភាពជួបជុំ ដោះដូររំលឹកទិវានារីវៀតណាម ថ្ងៃទី២០ ខែតុលា សមាគមសហព័ន្ធនារីឃុំនៅទាំងយកចិត្តទុកដាក់កសាងបណ្តាទម្រង់វប្បធម៌ សិល្បៈ ដើម្បីបង្កទីលានកម្សាន្តមានប្រយោជន៍សម្រាប់សមាជិកា។ នាពេលកន្លង សមាគមសហព័ន្ធនារីឃុំបានសហការចាត់តាំងពិធីបង្ហាញមុខក្រុមរបាំនារី “របាំប្រពៃណីខ្មែរ” នៅភូមិឈូងធំ A ដោយមានសមាជិកា១៥នាក់ចូលរួម។ បណ្តាសមាជិកាសុទ្ធតែមានចំណង់ចំណូលចិត្តវប្បធម៌ សិល្បៈដូចគ្នា មានបំណងដោះដូរ លត់ដំសុខភាព លើកកម្ពស់ជីវភាពស្មារតី និងរួមចំណែកថែរក្សា ពង្រីកអត្តសញ្ញាណវប្បធម៌ប្រពៃណីរបស់ជនជាតិ។

សមាគមសហព័ន្ធនារីឃុំឡាយហ្វាបង្ហាញក្រុមរបាំនារី “របាំប្រពៃណីខ្មែរ” នៅភូមិឈូងធំ A។

ឆ្លងតាមរយៈបណ្តាចង្វាក់រាំដិតដាមដោយអត្តសញ្ញាណវប្បធម៌ខ្មែរដូចជា រាំវង់ សារ៉ាវ៉ាន់ ឡាំលាវជាដើម ទម្រង់នេះបានរួមចំណែកបំផុសមោទនភាពជនជាតិ លើកកម្ពស់ស្មារតីថែរក្សា និងពង្រីកបណ្តាតម្លៃវប្បធម៌ប្រពៃណីក្នុងជីវភាពទំនើប។ ឆ្លងតាមរយៈនោះ ពង្រីកតួនាទីរបស់នារីខ្មែរក្នុងការកសាងជីវភាពវប្បធម៌ ព្រមទាំងបង្កកម្លាំងផ្សព្វផ្សាយក្នុងសហគមន៍ រួមចំណែកធ្វើឱ្យសម្បូរបែបបណ្តាសកម្មភាពវប្បធម៌ សិល្បៈនៅភូមិភាគ។

តាមប្រសាសន៍លោកស្រីវ៉ាំងធីអាញហុង ប្រធានសមាគមសហព័ន្ធនារីឃុំឡាយហ្វា ឆ្ពោះដល់ខួបអនុស្សាវរីយ៍ទិវានារីវៀតណាម ថ្ងៃទី២០ ខែតុលា សមាគមសហព័ន្ធនារីឃុំបានចាត់តាំងសកម្មភាពជាក់ស្តែងជាច្រើន ដើម្បីបង្កលក្ខណៈឱ្យសមាជិកាបានជួបប្រជុំ ដោះដូរ លើកកម្ពស់ជីវភាពស្មារតី និងពង្រឹងសាមគ្គីភាព។ ទន្ទឹមនឹងការបង្ហាញមុខក្រុមរបាំនារី “របាំប្រពៃណីខ្មែរ” សមាគមរំពឹងបង្កើតក្រុមនារីកើតកូនគ្រប់ ២ នាក់មុនអាយុ ៣៥ ឆ្នាំ រួមចំណែកឃោសនា ចលនាសមាជិកាអនុវត្តល្អនូវគោលនយោបាយចំនួនប្រជាជន ថែទាំសុខភាពបន្តពូជនិងកសាងគ្រួសារសុភមង្គល។

រយៈពេលខាងមុខ សមាគមសហព័ន្ធនារីទីក្រុងកឹងធើគ្រប់លំដាប់ថ្នាក់បន្តផ្លាស់ថ្មីខ្លឹមសារ វិធីសាស្ត្រសកម្មភាព ព្រមទាំងកសាងបណ្តាទម្រង់សមស្របនឹងលក្ខណៈភូមិភាគនីមួយៗ និងតម្រូវការរបស់សមាជិកា។ តាមរយៈនោះ ពង្រីកតួនាទីរបស់នារីក្នុងការកសាងគ្រួសារសុភមង្គល អភិវឌ្ឍសេដ្ឋកិច្ច ថែរក្សាអត្តសញ្ញាណវប្បធម៌ជាតិ រួមកម្លាំងកសាងភូមិស្រុក និងរួមចំណែកការពាររឹងមាំអធិបតេយ្យភាព សន្តិសុខតំបន់ព្រំដែន៕

ហុងទើ - ថាច់ធី

ចែករំលែកអត្ថបទ

ពាក្យគន្លឹះ