គោលនយោបាយ -ការរស់នៅ គោលនយោបាយ

06/10/2026 - 05:52

ភាពកក់ក្តៅនៃផ្ទះឧបការគុណ

អនុវត្តផែនការលេខ ៤១៤/KH-UBND ចុះថ្ងៃទី ៣ ខែកញ្ញា ឆ្នាំ ២០២៦ របស់គណៈកម្មាធិការប្រជាជនទីក្រុងកឹងធើ អំពីការឧបត្ថម្ភបំបាត់ផ្ទះបណ្តោះអាសន្ន ផ្ទះទ្រុឌទ្រោម ជូនកូនបង្កើតរបស់អ្នកចូលរួមសកម្មភាពតស៊ូក្នុងសម័យសង្គ្រាម រងផលប៉ះពាល់ដោយសារជាតិពុលគីមី មកដល់ថ្ងៃទី ១៧ ខែកញ្ញា ទីក្រុងបានឧបត្ថម្ភសាងសង់និងជួសជុលផ្ទះបាន ១២៥ ខ្នង នៅតាមឃុំ សង្កាត់ចំនួន ៤៧។ លំនៅឋានទាំងនេះ បានសាងសង់ឡើងផ្តើមពីការយកចិត្តទុកដាក់របស់បក្សនិងរដ្ឋ ព្រមជាមួយការព្រួតដៃរបស់កងកម្លាំងប្រដាប់អាវុធ និងប្រជាជន រួមចំណែកជួយគ្រួសារទាំងនេះលំនឹងជីវភាព។

តឹងថាញ់ ប្រគល់ផ្ទះដល់គ្រួសារបងស្រី ង៉ោធីហ្វិញលៀង។

តាមប្រសាសន៍ឧត្តមសេនីយ៍ត្រី ង្វៀងមិញត្រេវ មេបញ្ជាការរងយោធភូមិភាគ៩ រយៈពេលផ្សព្វផ្សាយយុទ្ធនាការត្រឹមតែ ១០ ថ្ងៃប៉ុណ្ណោះ ក៏សាងសង់និងជួសជុលបានផ្ទះ ១២៥ ខ្នង ក្នុងនោះសង់ថ្មី ៦៥ ខ្នង ជួសជុល ៦០ ខ្នង គិតជាទឹកប្រាក់សរុប ៩,៥ ពាន់លានដុង។ ខាងក្រោយតួលេខទាំងនោះ គឺជាការចូលរួមយ៉ាងសកម្មរបស់គណៈ ផ្នែកគ្រប់ថ្នាក់ បង្ហាញពីការទទួលខុសត្រូវក្នុងការអនុវត្តគោលនយោបាយ “តបស្នងសងគុណ” និង “ផឹកទឹកនឹកប្រភព”។ ដើម្បីធានាសន្ទុះដំណើរការកម្មវិធីបានកៀរគរ ប្រមាណ ១.៥០០ នាក់ ចូលរួមកម្លាំងពលកម្ម។ ដោយឡែកយោធភូមិភាគ ៩ បានកៀគរកម្មាភិបាល យុទ្ធជន ៣០០ នាក់ចំណុះកងពលធំ ៣៣០ កងពលតូចព័ត៌មាន ២៩ និងកងពលតូចកាំភ្លើងធំការពារដែនអាកាស ២២៦ សហការជាមួយកងកម្លាំងនៅភូមិភាគចូលរួមសាងសង់ដោយផ្ទាល់។ ទោះបីអាកាសធាតុមិនប្រក្រតី តែកម្មាភិបាល យុទ្ធជនតែងជម្នះការលំបាក ឆ្លៀតពេលរួមជាមួយកងកម្លាំងពន្លឿនល្បឿនដំណើរការ។ ទាហានមិនត្រឹមតែរួមកម្លាំងសាងសង់ជញ្ជាំងដំបូលផ្ទះប៉ុណ្ណោះទេ ថែមទាំងនាំមកនូវការចែករំលែក និងស្មារតីកងទ័ព - ប្រជាជនដ៏កក់ក្តៅទៀតផង។

នៅឃុំតឹងថាញ់ គ្រាន់តែផ្តុំកម្លាំងសាងសង់ក្នុងអំឡុងពេល ១១ ថ្ងៃ ផ្ទះរបស់បងស្រី ង៉ោធីហ្វិញលៀង នៅភូមិកៃឌឿង ក៏បានសម្រេចរួចរាល់។ ផ្ទះមានផ្ទៃក្រឡា៤៣,២ ម៉ែត្រការ៉េ រចនាសម្ព័ន្ធកម្រិត ៤ ថវិកាសរុប ១០០ លានដុង។ ផ្ទះអាស្រ័យគណៈបញ្ជាការយោធាឃុំ នគរបាលឃុំ សម្ព័ន្ធយុវជន គណៈ ផ្នែក អង្គការមហាជន និងគណៈកម្មការប្រជាជនភូមិ រួមកម្លាំងពលកម្មចំនួន ២១៣ ថ្ងៃ។ រស់នៅក្នុងផ្ទះថ្មី បងស្រីលៀង ឱ្យដឹងដោយក្តីរំភើប៖ “ផ្ទះឥដ្ឋធំទូលាយ ស្អាត ឥឡូវនេះភ្លៀងធំខ្ញុំក៏មិនខ្លាចភ្លៀងស្រក់ទៀត។ នេះជាផ្ទះដែលខ្ញុំមិនហ៊ានស្រមៃសោះ។ ខ្ញុំមានក្តីត្រេកអរ និងដឹងគុណរដ្ឋដែលបានជួយឱ្យខ្ញុំមានកន្លែងនៅលំនឹង”។ ចំណែក អ្នកមីង ឡេធីង៉ុកក្វៀង នៅភូមិសមលើង ឃុំមីហឿង ជាកូនបង្កើតរបស់អ្នកចូលរួមសកម្មភាពតស៊ូក្នុងសម័យសង្គ្រាម រងផលប៉ះពាល់ជាតិពុលគីមី មិនអាចលាក់នូវក្តីរីករាយពេលទទួលផ្ទះថ្មី។ មីងក្វៀង ឱ្យដឹង៖ “ខ្ញុំសូមថ្លែងអំណរគុណដល់កងកម្លាំងប្រដាប់អាវុធដែលបានមកជួយសង់ផ្ទះ។ មានផ្ទះថ្មី រដ្ឋអំណាចក៏មកជូនអំណោយ និងសម្ភារៈប្រើប្រាស់ទៀតផង ខ្ញុំមានសេចក្តីត្រេកអរ រីករាយណាស់។ ចាប់ពីពេលនេះ ខ្ញុំនឹងខិតខំរកស៊ី ដើម្បីជីវភាពប្រសើរជាងទៀត”។

ផ្ទះមួយខ្នងៗដែលសម្រេចរួចរាល់ គឺជាលទ្ធផលនៃការរួបរួមទាំងកម្លាំងកាយទាំងកម្លាំងចិត្តរបស់កងកម្លាំងប្រដាប់អាវុធ សម្ព័ន្ធយុវជន សមាជិកសមាគម និងប្រជាជន។ តាមរយៈនោះ បង្ហាញពីសីលធម៌ “ផឹកទឹកនឹកប្រភព” និង “តបស្នងសងគុណ” បន្តផ្សព្វផ្សាយតាមរយៈសកម្មភាពជាក់ស្តែង។ ផ្ទះឧបការគុណទាំងនេះ មិនត្រឹមតែជួយឱ្យប្រជាជន “មានកន្លែងរស់នៅស្រួលបួល” ប៉ុណ្ណោះទេ ថែមទាំងជាទីបង្អែកបន្ថែមដើម្បីគ្រួសារទាំងនេះ កាន់តែមានទំនុកចិត្តក្នុងពលកម្ម លំនឹងជីវភាព៕

យ្វីអាញ - វិមាន

ចែករំលែកអត្ថបទ

ពាក្យគន្លឹះ