គោលនយោបាយ -ការរស់នៅ ការរស់នៅ

18/09/2026 - 05:59

ដាំប្លុងអង្ករនៅជម្រាក់ស្រែនាំមកប្រសិទ្ធភាពសេដ្ឋកិច្ច

ទន្ទឹមនឹងការបង្វែររចនាសម្ព័ន្ធពូជដំណាំសមស្របជាមួយនឹងលក្ខណៈធម្មជាតិ និងតម្រូវការទីផ្សារ លោក លីជុង ភូមិបឹងចុង ឃុំតាយវុាំង ទីក្រុងកឹងធើ បានមោះមុតដាំប្លុងអង្ករនៅជម្រាក់ស្រែ រួមចំណែកលើកកម្ពស់ប្រាក់ចំណូល កែលម្អជីវភាព។

ពីមុន គ្រួសារលោកលីជុង ធ្វើស្រែជាចម្បង។ ប៉ុន្តែដោយសារទិន្នផលស្រូវមិនខ្ពស់ តម្លៃមិនលំនឹង ម្ល៉ោះហើយគាត់បានបង្វែរផ្ទៃដីធ្វើស្រែរដូវដើមឆ្នាំ និងរដូវសម្រក ២ ហិកតា មកដាំប្លុងអង្ករវិញ ពីព្រោះប្លុងអង្ករសមស្របជាមួយនឹងលក្ខណៈដីធ្លីនៅតំបន់នេះ។ លោកជុង ឱ្យដឹង៖ "កាលទើបដាំប្លុងអង្ករខ្ញុំជួបការលំបាកច្រើនណាស់ ដោយសារមិនទាន់មានបទពិសោធន៍អំពីបច្ចេកទេសដាំ និងរបៀបថែទាំ។ ចាប់ពីផ្នែកជ្រើសពូជ កែប្រែដី គ្រប់គ្រងកម្រិតទឹក រហូតដល់បង្ការកម្ចាត់សត្វល្អិត និងជំងឺ ប៉ុន្តែពេលបានចូលរួមវគ្គហ្វឹកហ្វឺន និងរៀនសូត្រពីបទពិសោធន៍របស់គ្រួសារដែលដាំជោគជ័យ ខ្ញុំក៏ក្ដោបក្តាប់ដំណើរការដាំដុះបានបន្តិចម្តងៗ ជួយដំណាំលូតលាស់ល្អ"។

លោក លីជុង នៅភូមិបឹងចុង ឃុំតាយវុាំង កំពុងថែទាំប្លុងអង្ករដែលផ្តល់ប្រាក់
ចំណូលជាង ១៥០ លានដុងក្នុងមួយឆ្នាំ។

ប្លុងអង្ករជាប្រភេទដំណាំងាយស៊ាំនឹងបរិស្ថាន មិនសូវមានជំងឺនិងសត្វល្អិតបំផ្លាញ វិនិយោគទុនមិនខ្ពស់ពេក និងមិនសូវបង់កម្លាំងថែទាំបើប្រៀបនឹងប្រភេទដំណាំផ្សេងៗទៀត។ ក្រោយពីដាំ ៣ ខែ យើងអាចប្រមូលផលលើកដំបូង ហើយឱ្យតែគម្លាតពី ១ ខែដល់ ១ ខែកន្លះ គឺប្រមូលផលម្តង (ប្រមូលផលជុំឆ្នាំ)។ តាមប្រសាសន៍របស់លោកជុង ប្រមូលផលលើកដំបូងបានប្រមាណ ៨០០ គីឡូក្រាម/២ ហិកតា ហើយបន្តកើនឡើងក្នុងលើកប្រមូលផលបន្ទាប់ៗពី ១,២ ដល់ ១,៤ តោន/២ ហិកតា លក់ក្នុងតម្លៃពី ១៣.០០០ ដល់ ២០.០០០ ដុង/គីឡូក្រាម (អាស្រ័យទៅតាមដំណាក់កាលនីមួយៗ)។ ពិសេស ប្លុងអង្ករដាំតែម្តង អាចប្រមូលផលបានរយៈពេល ៣ ឆ្នាំ ប្រសិនបើថែទាំតាមបច្ចេកទេសត្រឹមត្រូវ។ ជាមួយនឹងបទពិសោធន៍ ៥ ឆ្នាំដាំប្លុងអង្ករ លោកជុង ឱ្យដឹង៖ "ដើម្បីប្លុងអង្ករលូតលាស់ល្អពេលដាំនៅជម្រាក់ស្រែ ត្រូវរក្សាទឹកនៅកម្រិត ៣ តឹកឡើងទៅជានិច្ច ប្លុងមិនសូវមានជំងឺ និងសត្វល្អិតបំផ្លាញ ហេតុនោះគ្រាន់តែព្រាចថ្នាំកម្ចាត់ខ្យងហោងលឿង ដើម្បីការពារមិនឱ្យខ្យងពងនៅលើដើម ឬស៊ីស្លឹកខ្ចី។ ដើម្បីប្លុងផ្តល់ទិន្នផលលំនឹង និងរក្សារយៈពេលប្រមូលផលបានយូរ ប្រហែលជា ៥ ខែ ត្រូវព្រាចជីម្តង ប្រើជីអ៊ុយរ៉េ និង DAP (មួយប្រភេទ ២ បាវ)។ មុនព្រាចជី ត្រូវបង្ហូរទឹកក្នុងស្រែចេញបន្តិច (ទុកប្រមាណ ១ តឹក) ដើម្បីជួយឱ្យប្លុងស្រូបយកជីបានល្អ បន្ទាប់ពី ២ សប្តាហ៍ ទើបបញ្ចូលទឹកចូលស្រែវិញតាមធម្មតា។ ចំពោះប្លុងអង្ករ ២ ហិកតា ក្រោយពីទូទាត់រួចស្រេចនៅចំណេញជាង ១៥០ លានដុងក្នុងមួយឆ្នាំ។ ទម្រង់នេះមិនត្រឹមតែនាំមកនូវប្រសិទ្ធភាពសេដ្ឋកិច្ចដល់គ្រួសារប៉ុណ្ណោះទេ ថែមទាំងបង្កការងាររដូវកាលឱ្យកម្មករ ១០ នាក់នៅភូមិភាគទៀតផង ដោយបានប្រាក់ចំណូលប្រមាណ ៣០០.០០០ ដុង/ថ្ងៃ/ម្នាក់"។

ស្រែប្លុងអង្កររបស់លោក លីជុង នៅភូមិបឹងចុង ឃុំតាយវុាំង។

លោក យ័ញតឹងក្វៀង ប្រធានសមាគមកសិករឃុំតាយវុាំង ទីក្រុងកឹងធើ ឱ្យដឹង៖ "ផ្តើមពីភាពជាក់ស្តែងនៃទម្រង់ដាំប្លុងអង្កររបស់លោកលីជុង ពេលចេះជ្រើសរើសដំណាំសមស្របនឹងលក្ខណៈដីធ្លី ផ្លាស់ថ្មីគំនិតផលិត និងម្ចាស់ការអនុវត្តបច្ចេកទេសនាំមកនូវប្រសិទ្ធភាពសេដ្ឋកិច្ចលើផ្ទៃដីតែមួយ។ នេះមិនត្រឹមតែជាទម្រង់នាំមកនូវប្រាក់ចំណូលបង្គួរដល់គ្រួសារប៉ុណ្ណោះទេ ថែមទាំងជាបទពិសោធន៍ជាក់ស្តែងដែលកសិករនៅភូមិភាគគួររៀនសូត្រនិងពង្រីកទម្រង់ទៀតផង; ទម្រង់នេះរួមចំណែកអំណះអំណាងពីប្រសិទ្ធភាពនៃការបង្វែររចនាសម្ព័ន្ធដំណាំ ឆ្ពោះដល់វិស័យកសិកម្មស៊ាំនឹងលក្ខណៈធម្មជាតិ លើកកម្ពស់តម្លៃកសិផល និងអភិវឌ្ឍផលិតតាមទិសដៅចីរភាព"៕

ថាញវ៉ាង - វិមាន

ចែករំលែកអត្ថបទ

ពាក្យគន្លឹះ