សុខភាព - អប់រំ អប់រំ

06/08/2026 - 07:59

រដូវវិស្សមកាលរបស់ប្អូនៗជនរួមជាតិខ្មែរនៅកាម៉ាវ

ជារៀងរាល់រដូវវិស្សមកាល នៅតាមវត្តខ្មែរលើភូមិឋានខេត្តកាម៉ាវ តែងមានកូនចៅជនរួមជាតិខ្មែរមកចូលរៀនអក្សរខ្មែរ។ ស្ថិតក្នុងបរិយាកាសដ៏ស្ងប់ស្ងាត់នៃទីវត្តអារាម សូរសំឡេងសិស្សអានអក្សរខ្មែរលាន់ឮកងរំពងយ៉ាងទៀងទាត់ ដូចជាការបន្តចរន្តអភិរក្ស ពង្រីកភាសានិងអក្សរខ្មែរពីមួយជំនាន់ទៅមួយជំនាន់។

ព្រះតេជព្រះគុណ ថាច់ហ្វាងត្វឹង គង់វត្តបុប្ផារាម កំពុងបង្រៀនអក្សរខ្មែរដល់សិស្សានុសិស្សរដូវវិស្សមកាល។

ពេលសិស្សានុសិស្សឈប់សម្រាករដូវវិស្សមកាល ថ្នាក់រៀនអក្សរខ្មែរនៅវត្តបុប្ផារាម ឃុំហឹងហោយ ខេត្តកាម៉ាវ ក៏ចាប់ផ្តើមបើកបង្រៀនអក្សរ សកម្មភាពនេះបានរក្សាជាច្រើនឆ្នាំមក។ ជារៀងរាល់ថ្ងៃ ព្រះសង្ឃនិងគ្រូបង្រៀនបង្គាប់ សិស្សហាត់អាននិងសរសេរអក្សរខ្មែរ។ ព្រះតេជព្រះ គុណថាច់ហ្វាងត្វឹង គង់នៅវត្តបុប្ផារាម មានថេរដីកា៖ “ការបង្រៀនអក្សរខ្មែរក្នុងវត្តគឺជាសកម្មភាពប្រចាំឆ្នាំ ដើម្បីជួយកូនចៅខ្មែរមិនភ្លេចភាសាកំណើតនិងបង្ក ជាបរិស្ថានលេងកម្សាន្តវិជ្ជមានក្នុងរដូវវិស្សមកាល។ ប្អូនៗមករៀនក្នុងវត្តបានព្រះចៅអធិការវត្តជូនអាវសៀវភៅ ប៊ិក។ល។ ផ្តល់កម្លាំងចិត្តដល់សិស្សានុសិស្សមកចូលរៀនយ៉ាងច្រើនកុះករ។ អាត្មាភាពមានមោទនភាព ពេលបានបង្រៀនអក្សរខ្មែរដល់កូនចៅមាមីងខ្មែរកុំឱ្យភ្លេចដើមកំណើត”។

រដូវវិស្សមកាលឆ្នាំនេះ វត្តបុប្ផារាមបើករៀនបាន ៣ ថ្នាក់ ចាប់ពីថ្នាក់ទី១ដល់ថ្នាក់ទី៣ ដោយមានសិស្សចូលរៀន១៧៣ នាក់។ មិនត្រឹមតែបង្រៀនអក្សរប៉ុណ្ណោះទេ ថែមទាំងបង្រៀនពីសីលធម៌គោរពយាយតា ឪពុកម្តាយនិងចាស់ទុំ ពីរបៀបរស់នៅ ការចូលរួមពិធីបុណ្យនិងការក្សាសាមគ្គីភាពក្នុងសហគមន៍។ ប្អូនង្វៀងមិញហាយឱ្យដឹង៖ “ប្អូនចូលចិត្តមករៀនអក្សរខ្មែរក្នុងវត្តរដូវវិស្សមកាល។ នេះជារដូវវិស្សមកាលទី៣ ដែលប្អូនបានចូលរៀនអក្សរខ្មែរក្នុងវត្ត ប្អូនចេះអានចេះសរសេរអក្សរខ្មែរត្រឹមត្រូវ និងបានយល់ដឹងពីសីលធម៌ របៀបសំពះដែលជាវប្បធម៌ដ៏ពិសេសរបស់ជនរួមជាតិខ្មែរ ដូច្នេះ កាន់តែរៀនប្អូនកាន់តែស្រឡាញ់ចូលចិត្ត”។

នៅរដូវវិស្សមកាលនេះដែរ ក្រៅពីបើកបង្រៀនអក្សរខ្មែរ២ថ្នាក់ វត្តសុរិយារាម នៅឃុំហឹងហោយ ក៏មានបើកថ្នាក់បង្រៀនភ្លេងពិណពាទ្យ របាំប្រពៃណី របាំឆៃយ៉ាំ ដល់សិស្សខ្មែរ៣០នាក់។ ថ្នាក់បង្រៀនរបាំនិងភ្លេងពិណពាទ្យ ចាត់តាំងឡើងដោយមន្ទីរវប្បធម៌ កីឡានិងទេសចរណ៍ខេត្តកាម៉ាវ ដើម្បីរួមចំណែកអភិរក្សវប្បធម៌ខ្មែរ។ ប្អូនស៊ើងខាញ់ដូន ឱ្យដឹង៖ “ជារៀងរាល់ថ្ងៃ ឱ្យតែដល់វេលាម៉ោង១៤ ប្អូន ទៅវត្តរៀនអក្សរ នេះជាឆ្នាំទី៣ដែលប្អូនចូលរៀនអក្សរខ្មែរ ដូច្នេះ ឥឡូវនេះ ប្អូនចេះអាន ចេះសរសេរ អក្សរខ្មែរបានច្រើន។ រដូវវិស្សមកាលឆ្នាំនេះរបស់ប្អូនពិតជាសប្បាយរីករាយបំផុត ពីព្រោះក្រៅពីរៀនអក្សរខ្មែរ ពេលយប់ប្អូនឆ្លៀតមករៀនភ្លេងពិណពាទ្យ និងរបាំឆៃយ៉ាំជាមួយមិត្តភក្តិ ដូច្នេះ ប្អូនពេញចិត្តខ្លាំងណាស់”។

ទន្ទឹមនឹងនោះ គណៈកម្មាធិការប្រជាជនឃុំហឹងហោយ នៅទាំងសហការជាមួយវត្តអារាមខ្មែរ ដើម្បីជំនួយសៀវភៅសិក្សា សៀវភៅសរសេរនិងប៊ិកដល់សិស្ស ព្រមទាំងអនុវត្តយ៉ាងពេញលេញនូវគោលនយោបាយឧបត្ថម្ភសម្រាប់គ្រូបង្រៀនតាមសេចក្តីកំណត់។ តាមរយៈនោះ ផ្តល់កម្លាំងចិត្តដល់គ្រូបង្រៀននិងព្រះសង្ឃក្នុងការបង្ហាត់បង្រៀន ក៏ដូច ជាជំនួយកម្លាំងដល់វត្តអារាម ដើម្បីបន្តការបើកថ្នាក់ បង្រៀនអក្សរខ្មែររដូវវិស្សមកាល។ ថ្នាក់រៀនរដូវវិស្សមកាលក្នុងវត្តមិនត្រឹមតែរក្សាភាសានិងអក្សរខ្មែរប៉ុណ្ណោះទេ ថែមទាំងរួមចំណែកអភិរក្សនិងពង្រីកអត្តសញ្ញាណវប្បធម៌ខ្មែរពីមួយជំនាន់ទៅមួយជំនាន់៕

លីធាន-មុនី

ចែករំលែកអត្ថបទ

ពាក្យគន្លឹះ