សុខភាព - អប់រំ អប់រំ

10/07/2026 - 18:43

ផ្តល់អាហារូបករណ៍ ៣១០ ចំណែក "ការរៀនសូត្រគ្មានទីបញ្ចប់"

នាព្រឹកថ្ងៃទី ១០ ខែកក្កដា នៅទីក្រុងកឹងធើ មជ្ឈិមសមាគមជំរុញការសិក្សាវៀតណាម បានចាត់តាំងពិធីផ្តល់អាហារូបករណ៍ “ការរៀនសូត្រគ្មានទីបញ្ចប់” លើកទី ៦។

អញ្ជើញចូលរួមក្នុងពិធីនេះ មានលោកស្រី សាស្ត្រាចារ្យ បណ្ឌិត ង្វៀងធីយ្វង អតីតសមាជិកគណៈប្រតិបត្តិការមជ្ឈិមបក្ស អតីតអនុប្រធានរដ្ឋ និងជាប្រធានសមាគមជំរុញការសិក្សាវៀតណាម; លោក ឡេ ម៉ាញ់ហុង អនុប្រធាន និងជាអគ្គលេខាធិការសមាគមជំរុញការសិក្សាវៀតណាម; លោកស្រី ថាយ ធូ សឿង អនុប្រធានសហព័ន្ធសហជីពពលកម្មវៀតណាម។

អ្នកតំណាងទាំងឡាយអញ្ជើញចូលរួមក្នុងពិធីផ្តល់អាហារូបករណ៍។

ចំណែកខាងថ្នាក់ដឹកនាំទីក្រុងកឹងធើ មានលោកស្រី ហូ ធីកឹមដាវ អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ; លោក ង្វៀង វ៉ាំងខើយ អនុប្រធានគណៈកម្មាធិការប្រជាជនទីក្រុងកឹងធើ ព្រមទាំងតំណាងថ្នាក់ដឹកនាំបណ្តាមន្ទីរ ផ្នែក និងអង្គការមហាជននានារបស់ទីក្រុង។

លោកស្រី សាស្ត្រាចារ្យ បណ្ឌិត ង្វៀងធីយ្វង ថ្លែងការណ៍ក្នុងពិធី។

ថ្លែងក្នុងពិធីនេះ លោកស្រី សាស្ត្រាចារ្យ បណ្ឌិត ង្វៀងធីយ្វង បានសង្កត់ធ្ងន់ថា អាហារូបករណ៍ "ការរៀនសូត្រគ្មានទីបញ្ចប់" តាមដំបូន្មានរបស់លោកប្រធានហូជីមិញ អាស្រ័យដោយសមាគមជំរុញការសិក្សាវៀតណាមផ្តួចផ្តើម មិនត្រឹមតែមានអត្ថន័យជ្រាលជ្រៅអំពីប្រពៃណីសង្វាត់រៀនសូត្រប៉ុណ្ណោះទេ ប៉ុន្តែថែមទាំងផ្សព្វផ្សាយនូវស្មារតីស្វ័យសិក្សាក្នុងចំណោមប្រជាជន ពិសេសគឺក្នុងបរិការណ៍អនុវត្តសេចក្តីសម្រេចចិត្តលេខ ៧១-NQ/TW របស់ការិយាល័យនយោបាយ ស្តីពីការលោតផ្លោះក្នុងការអភិវឌ្ឍវិស័យអប់រំ និងបណ្តុះបណ្តាល។ អ្នកតំណាងទាំងឡាយដែលទទួលបានការលើកសរសើរ គឺជាសិស្ស និស្សិតដែលជម្នះការលំបាករៀនសូត្រពូកែ និងអ្នកមានវ័យចំណាស់ដែលជាគំរូក្នុងការស្វ័យសិក្សា។ ពួកគេគឺជាបុគ្គលឆ្នើម ជាកងកម្លាំងពលកម្មគុណភាពខ្ពស់ និងគួរឱ្យគោរពសរសើររបស់ប្រទេសជាតិ។

លោកស្រី សាស្ត្រាចារ្យ បណ្ឌិត ង្វៀងធីយ្វង សង្ឃឹមថា អាហារូបករណ៍នេះនឹងក្លាយជាកម្លាំងចលករដើម្បីឱ្យបុគ្គលម្នាក់ៗបន្តខិតខំប្រឹងប្រែង ហ្វឹកហាត់ខ្លួន ក្លាយជាពលរដ្ឋគំរូ រួមដៃគ្នាកសាងសង្គមសិក្សាមួយប្រកបដោយចីរភាព។

លោកស្រី សាស្ត្រាចារ្យ បណ្ឌិត ង្វៀងធីយ្វង (ទី ៥ រាប់ពីស្តាំ) អតីតសមាជិកគណៈប្រតិបត្តិការមជ្ឈិមបក្ស អតីតអនុប្រធានរដ្ឋ ប្រធានសមាគមជំរុញការសិក្សាវៀតណាម និងលោកស្រី ហូ ធីកឹមដាវ (ទី ៤ រាប់ពីស្តាំ) អនុលេខាគណៈកម្មាធិការបក្សទីក្រុង ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ ប្រគល់អាហារូបករណ៍ “ការរៀនសូត្រគ្មានទីបញ្ចប់”។

អ្នកតំណាងគំរូជាសិស្ស និស្សិត និងអ្នកមានវ័យចំណាស់ ទទួលអាហារូបករណ៍ “ការរៀនសូត្រគ្មានទីបញ្ចប់”។

នៅក្នុងពិធីជូនអាហារូបករណ៍លើកនេះ មានអ្នកតំណាងចំនួន ៣១០ រូប ក្នុងនោះមានសិស្ស និស្សិតចំនួន ២៣៥ រូប និងអ្នកមានវ័យចាស់ចំនួន ៧៥ រូប ដែលបានជ្រើសរើសមកពីខេត្ត-ក្រុងចំនួន ៩ នៅតំបន់ភាគខាងត្បូង; កម្មាភិបាល អ្នករដ្ឋការ បុគ្គលិក យុទ្ធជននៃកងកម្លាំងប្រដាប់អាវុធឆ្នើម ដែលមានស្មារតីស្វ័យសិក្សា ស្វ័យស្រាវជ្រាវ និងច្នៃប្រតិដ្ឋ ដែលសម្រេចបានលទ្ធផលល្អ; ព្រមទាំងតំណាងមកពីស្ថាប័នចំនួន ១០ ដែលបានសហការជាមួយមជ្ឈិមសមាគមជំរុញការសិក្សាវៀតណាម ក្នុងកិច្ចការជំរុញការសិក្សានិងជំរុញបញ្ញា រួមចំណែកកសាងស្ថាប័នសម្រេចបានកិត្តិនាម “អង្គភាពសិក្សា”។