គោលនយោបាយ -ការរស់នៅ ការរស់នៅ

08/07/2026 - 22:16

ផ្នែកកសិកម្មខិតខំជម្នះការលំបាកដើម្បីសម្រេចបានកំណើនខ្ពស់

ក្នុងរយៈពេល ៦ ខែដើមឆ្នាំ ២០២៦ ទោះបីជួបការលំបាកជាច្រើន ប៉ុន្តែការផលិតកសិកម្មរបស់ប្រទេសយើងនៅតែបានរក្សាខ្ជាប់ និងអភិវឌ្ឍល្អបង្គួរ។ ផលិតផលសរុបក្នុងវិស័យកសិកម្ម រុក្ខកម្មនិងជលផលសម្រេចបានកម្រិតកំណើនខ្ពស់ បន្តបញ្ជាក់ពីតួនាទីជាសសរទ្រូងនៃខឿនសេដ្ឋកិច្ច និងធានាយ៉ាងរឹងមាំនូវសន្តិសុខស្បៀងជាតិ។

កសិផលដាក់លក់នៅផ្សារទំនើបមួយនៅទីក្រុងកឹងធើ។

ការប្រែប្រួលអាកាសធាតុ គ្រោះធម្មជាតិ ការជ្រាបចូលទឹកប្រៃ អាកាសធាតុមិនអំណោយផល និងការវិវឌ្ឍយ៉ាងស្មុគស្មាញនៃជំងឺរាតត្បាតជាច្រើនប្រភេទលើដំណាំនិងសត្វចិញ្ចឹម បានបង្កការលំបាកជាច្រើនដល់សកម្មភាពផលិតកសិកម្មនៅក្នុងប្រទេសយើង។ ទន្ទឹមនឹងនោះ កសិករក៏ជួបការលំបាកផងដែរ នៅពេលដែលតម្លៃសម្ភារៈនាំចូលជាច្រើនប្រភេទស្ថិតក្នុងកម្រិតខ្ពស់ ចំណែកតម្លៃកសិផលជាច្រើនប្រភេទបែរជាស្ថិតក្នុងកម្រិតទាប។ ស្ថានភាពអន្តរជាតិនៅតែបន្តមានការវិវឌ្ឍយ៉ាងស្មុគស្មាញ ជាមួយនឹងការប្រកួតប្រជែងយុទ្ធសាស្ត្ររវាងប្រទេសមហាអំណាចនានា រួមទាំងជម្លោះយោធាអូសបន្លាយនៅតំបន់ជាច្រើន ជាពិសេសគឺនៅមជ្ឈិមបូព៌ា បានជះឥទ្ធិពលអវិជ្ជមានដល់ពាណិជ្ជកម្ម ការវិនិយោគ តម្លៃថាមពល សម្ភារៈកសិកម្ម និងតម្លៃលក់កសិផលជាច្រើនប្រភេទ។

ទោះជាយ៉ាងនេះក្តី អាស្រ័យការជំរុញយន្តូបនីយកម្ម ការអនុវត្តវិទ្យាសាស្ត្របច្ចេកវិទ្យាជឿនលឿន និងការលើកកម្ពស់កម្រិតផលិតរបស់កសិករ បានបង្កលក្ខណៈងាយស្រួលដល់ការអភិវឌ្ឍផលិតកសិកម្មរបស់ប្រទេសយើង។ ជាពិសេស ក្រសួងកសិកម្ម និងបរិស្ថាន រួមជាមួយបណ្តាក្រសួង ផ្នែកមជ្ឈិម និងភូមិភាគ បានសកម្មជួយឧបត្ថម្ភកសិករ និងអាជីវកម្មដោះស្រាយការលំបាក ដើម្បីអភិវឌ្ឍផលិតអាជីវកម្ម; ម្ចាស់ការនិងប្តេជ្ញាចិត្តខ្ពស់ ក្នុងការដឹកនាំ អនុវត្តតាមបណ្តាសេចក្តីសម្រេចចិត្តរបស់មជ្ឈិម រដ្ឋសភា និងកិច្ចចង្អុលការរបស់រដ្ឋាភិបាល ធ្វើការត្រួតពិនិត្យ ជំរុញ និងដោះស្រាយការលំបាក ជំពាក់ជំពិនតាំងពីថ្នាក់មូលដ្ឋានបានទាន់ពេល។ ក្រសួងកសិកម្មនិងបរិស្ថាន បានប្រមូលផ្តុំដឹកនាំ និងអនុវត្តព្រមៗគ្នានូវរាល់ដំណោះស្រាយអភិវឌ្ឍផលិតកសិកម្ម រុក្ខកម្ម និងជលផល ផ្សារភ្ជាប់នឹងតម្រូវការទីផ្សារ; ជំរុញការរៀបចំរចនាសម្ព័ន្ធផ្នែកសិកម្មឡើងវិញ រៀបចំផលិតឡើងវិញតាមខ្សែសង្វាក់តម្លៃ តំបន់វត្ថុធាតុដើមប្រមូលផ្តុំ បង្កើនការតភ្ជាប់រវាងផលិត ការកែច្នៃ ការប្រើប្រាស់ ការលើកកម្ពស់ពាណិជ្ជកម្ម និងពង្រីកទីផ្សារនាំចេញ។

តាមរយៈការជួយឧបត្ថម្ភពីមជ្ឈិម រដ្ឋអំណាចគ្រប់លំដាប់ថ្នាក់ រួមនឹងការស្រុះស្រួលគ្នានៃសហគមន៍អាជីវកម្ម សមាគមផ្នែកមុខទំនិញ និងកសិករ ក្នុងរយៈពេល ៦ខែ ដើមឆ្នាំ២០២៦ ផ្នែកកសិកម្មបានអនុវត្តសម្រេចនិងសម្រេចលើសស្ទើរតែទាំងអស់នូវបណ្តាភាគកម្រិតដែលបានដាក់ចេញ។ ក្នុងនោះ ចំណុចលេចធ្លោគឺការនាំចេញកសិ - រុក្ខ - ជលផល ដោយមានទំហំទឹកប្រាក់សរុបប្រមាណ ៣៥,៨៨ពាន់លានដុល្លារអាមេរិក កើនឡើង ៦% ធៀបនឹងរយៈពេលដូចគ្នា; ល្បឿនកំណើន GDP សម្រេចបានប្រហែល ៣,៨-៣,៨៥% លើសភាគកម្រិតដែលរដ្ឋាភិបាលនិងក្រសួងបានដាក់ចេញ ៣,៧%។

លោកឌាំងង៉ុកឌីប អនុរដ្ឋមន្ត្រីក្រសួងកសិកម្មនិងបរិស្ថាន បានឱ្យដឹង៖ “ក្រសួងបានបង្កើនកិច្ចសហប្រតិបត្តិការជាមួយបណ្តាដៃគូអន្តរជាតិ ជំរុញការចរចាបើកទូលាយទីផ្សារ និងដោះស្រាយរបាំងពាណិជ្ជកម្ម។ កៀរគរប្រភពធនធានអន្តរជាតិបម្រើឱ្យការអភិវឌ្ឍកសិកម្មបៃតង សេដ្ឋកិច្ចវិលជុំ ការគ្រប់គ្រងធនធាន ការពារបរិស្ថាន និងឆ្លើយតបនឹងការប្រែប្រួលអាកាសធាតុ។ ទន្ទឹមនឹងនោះ ក្រសួងផ្តោតលើការអនុវត្តសម្រេចយន្តការ គោលនយោបាយអនុវត្តកម្មវិធីទិសដៅជាតិដំណាក់កាល ២០២៦-២០៣០; ធ្វើជាសេនាធិការបង្កើតគណៈចង្អុលការមជ្ឈិម ដោយនាយករដ្ឋមន្ត្រីធ្វើជាប្រធានគណៈចង្អុលការ...”។

ក្នុងរយៈពេល ៦ ខែចុងឆ្នាំ ២០២៦ ផ្នែកកសិកម្មនិងបរិស្ថានប្រមូលផ្តុំអនុវត្តបណ្តាភារកិច្ចនិងដំណោះស្រាយយ៉ាងប្តូរផ្តាច់និងព្រមៗគ្នា ដើម្បីសម្រេចឱ្យបានរាល់ទិសដៅ ភាគកម្រិត និងភារកិច្ចការងារប្រចាំឆ្នាំ២០២៦។ តាមប្រសាសន៍លោកទ្រិញវៀតហ៊ុង រដ្ឋមន្ត្រីក្រសួងកសិកម្មនិងបរិស្ថាន បានឱ្យដឹងថា ក្នុងរយៈពេល ៦ ខែដើមឆ្នាំ ទូទាំងផ្នែកបានខិតខំប្រឹងប្រែង និងសម្រេចបានលទ្ធផលគួរឱ្យលើកទឹកចិត្តជាច្រើន។ ទោះជាយ៉ាងណាក៏ដោយ ខាងមុខនៅមានការលំបាក និងការប្រឈមជាច្រើនទៀត ដែលទាមទារមានការខិតខំប្រឹងប្រែងអស់ពីកម្លាំងកាយចិត្តពីទូទាំងផ្នែក តាំងពីថ្នាក់មជ្ឈិមរហូតដល់ភូមិភាគ និងការសហការជិតដិតពីបណ្តាក្រសួង ផ្នែក ភូមិភាគនិងអង្គភាពពាក់ព័ន្ធនានា។

យោងតាមសេចក្តីសម្រេចចិត្តលេខ ១៦៨/NQ-CP ចុះថ្ងៃទី ២៧ ខែមិថុនា ឆ្នាំ ២០២៦ របស់រដ្ឋាភិបាល ស្តីពីការធ្វើបច្ចុប្បន្នភាពសេណារីយ៉ូកំណើន និងដំណោះស្រាយគន្លឹះក្នុងបណ្តាត្រីមាសនៅខាងមុខ ដើម្បីអនុវត្តទិសដៅកំណើនឆ្នាំ ២០២៦ ខិតខំសម្រេចឱ្យបានចាប់ពី ១០% ឡើងទៅ ផ្សារភ្ជាប់នឹងការរក្សាឱ្យបាននូវស្ថិរភាពម៉ាក្រូសេដ្ឋកិច្ច រដ្ឋាភិបាលបានកែសម្រួលទិសដៅល្បឿនកំណើនកសិ - រុក្ខ - ជលផលឆ្នាំ ២០២៦ ពី ៣,៧% ឡើងទៅ ៤,០%។ ដើម្បីសម្រេចបាននូវទិសដៅនេះ ក្នុងរយៈពេល ៦ ខែចុងឆ្នាំ ២០២៦ ភាគកម្រិតកំណើនរបស់ផ្នែកកសិកម្មនិងបរិស្ថាន ត្រូវតែសម្រេចបានយ៉ាងហោចណាស់ ៤,៣% (ផែនការចាស់គឺ ៣,៧៥%)។ ក្នុងនោះ ក្រសួងកសិកម្មនិងបរិស្ថាន ខិតខំប្រឹងប្រែងនាំចេញកសិ - រុក្ខ - ជលផលឱ្យសម្រេចបាន ៧៤ ពាន់លានដុល្លារអាមេរិក និងកំណើនកសិ - រុក្ខ - ជលផលសម្រេចបាន ៤% ក្នុងឆ្នាំ ២០២៦៕

ខាញ់ទ្រុង - ថាច់ធី

ចែករំលែកអត្ថបទ

ពាក្យគន្លឹះ