ព្រឹត្តិការណ៍ - នយោបាយ ព្រឹត្តិការណ៍

28/07/2025 - 09:48

ក្រុងកឹងធើ រៀបចំសកម្មភាពដ៏មានអត្ថន័យជាច្រើន រំលឹកខួបអនុស្សាវរីយ៍លើកទី ៧៨ ឆ្នាំ ទិវាយុទ្ធជនពិការពលី

ក្នុងឱកាសរំលឹកខួបអនុស្សាវរីយ៍លើកទី ៧៨ ឆ្នាំ ទិវាយុទ្ធជនពិការពលី (២៧/៧/១៩៤៧ – ២៧/៧/២០២៥) គ្រប់ថ្នាក់ គ្រប់ផ្នែកនិងគ្រប់ភូមិភាគនានានៅក្រុងកឹងធើ បានរៀបចំសកម្មភាពជាក់ស្តែងជាច្រើន ដើម្បីរំលឹកនឹកគុណចំពោះអ្នកមានសគុណចំពោះបដិវត្តន៍។

សមមិត្ត ង្វៀងត្វឹងអាញ អនុលេខាគណៈកម្មាធិការបក្សក្រុង ប្រធានគណៈប្រតិភូតំណាងរដ្ឋសភាក្រុងកឹងធើ បានអញ្ជើញទៅសួរសុខទុក្ខ និងជូនអំណោយដល់វីរមាតាវៀតណាម ត្រឿងធីណាំនៅភូមិ២ ឃុំហ្វាអាន។

ថ្នាក់ដឹកនាំគណៈកម្មាធិការបក្សក្រុង ក្រុមប្រឹក្សាប្រជាជន គណៈកម្មាធិការប្រជាជន និងគណៈកម្មាធិការរណសិរ្សមាតុភូមិវៀតណាម ក្រុងកឹងធើ បានអញ្ជើញទៅគោរពវិញ្ញាណក្ខ័ន្ធ និងដាក់កម្រងផ្ការំលឹកនឹកគុណដល់វីរយុទ្ធជនពលី នៅទីបញ្ចុះសពយុទ្ធជនពលីក្រុងកឹងធើ ទីបញ្ចុះសពយុទ្ធជនពលីសុកត្រាំង ទីបញ្ចុះសពយុទ្ធជនពលីហូវយ៉ាង។ គណៈប្រតិភូនៃកម្មាភិបាលសម្ព័ន្ធយុវជន កងកម្លាំងប្រដាប់អាវុធ ក៏បានរួមគ្នារៀបចំអនាម័យសម្អាតទីនោះ ហើយបានអុជទៀនរំលឹកនឹកគុណនៅតាមទីបញ្ចុះសព និងស្ដូបរំលឹកគុណនានានៅលើភូមិសាស្រ្ត។

ក្នុងឱកាសនេះ ក្រុងកឹងធើ បានជូនអំណោយជាង ៣១.៩៤០ ចំណែកដល់វីរមាតាវៀតណាម; វីរៈកងកម្លាំងប្រដាប់អាវុធប្រជាជន វីរពលកម្មក្នុងសម័យសង្គ្រាម ដែលកំពុងទទួលប្រាក់ឧបត្ថម្ភប្រចាំខែ; យុទ្ធជនពិការ យុទ្ធជនជំងឺ ដែលទទួលរបបគោលនយោបាយដូចយុទ្ធជនពិការ; អ្នកធ្វើសកម្មភាពបដិវត្តន៍ដែលជ្រាបជាតិពុលគីមីថមថយសមត្ថភាពពលកម្ម; សាច់ញាតិយុទ្ធជនពលីដែលកំពុងទទួលប្រាក់ឧបត្ថម្ភចិញ្ចឹមប្រចាំខែ; អ្នកគោរពបូជាវិញ្ញណក្ខ័ន្ធយុទ្ធជនពលី។ល។ សរុបថវិកាសម្រាប់ការជូនអំណោយប្រមាណ ១៧,០៣៣ពាន់លានដុង ពីប្រភពថវិកាចំណាយប្រចាំឆ្នាំ ២០២៥ នៃថវិកាក្រុង បន្ទាប់ពីការរៀបចំឡើងវិញនូវអង្គភាពរដ្ឋបាលថ្នាក់ខេត្ត។ ភូមិភាគជាច្រើនក្នុងក្រុងក៏បានរៀបចំជួសជុលផ្ទះសម្បែង ផ្តល់សៀវភៅប្រិតសំចៃ និងរៀបចំពិធីជួបជុំ សួរសុខទុក្ខវីរមាតាវៀតណាម យុទ្ធជនពិការ យុទ្ធជនជំងឺ។ល។

សកម្មភាពទាំងនេះមិនត្រឹមតែបង្ហាញពីការដឹងគុណយ៉ាងជ្រាលជ្រៅរបស់បក្ខភាគ រដ្ឋអំណាចនិងប្រជាជនក្រុងកឹងធើចំពោះការលះបង់ដ៏ធំធេងរបស់វីរយុទ្ធជនពលីប៉ុណ្ណោះទេ ថែមទាំងរួមចំណែកអប់រំប្រពៃណីស្នេហាជាតិ គុណធម៌ “ផឹកទឹកនឹកប្រភព” សម្រាប់យុវជនជំនាន់ក្រោយទៀតផង៕

កាសែតកឹងធើភាសាខ្មែរ

ចែករំលែកអត្ថបទ

ពាក្យគន្លឹះ