មហាសាមគ្គីជនជាតិ គំរូក្នុងសហគមន៍

14/04/2025 - 17:46

ជោគជ័យជាមួយនឹងទម្រង់ដាំឈើហូបផ្លែគួបផ្សំនឹងចិញ្ចឹមពពែ

ជាមួយនឹងទម្រង់ដាំឈើហូបផ្លែ គួបផ្សំនឹងចិញ្ចឹមពពែរបស់កសិករប៊ូយស្វឹងដៀង នៅភូមិភឿកឡុក ឃុំអូរឡឹម ស្រុកទ្រីតូង ខេត្តអាងយ៉ាង រកបានប្រាក់ចំណូលរាប់រយលានដុងក្នុងមួយឆ្នាំ។ គាត់ជាកសិករពូកែនិងជាគំរូឆ្នើមនៅភូមិភាគ។

ទម្រង់ចិញ្ចឹមពពែក្នុងចម្ការស្វាយរបស់បងប៊ូយស្វឹងដៀង។ (រូបថតផ្តល់ដោយសមាគមកសិករឃុំអូរឡឹម)

បងប៊ូយស្វឹងដៀង រៀបរាប់៖ គ្រួសារគាត់ មានសមាជិក៣នាក់ មានផ្ទៃដីផលិត ១១ ហិកតា ជំនាញដាំស្វាយនិងក្រូចឃ្វិច។ ដំបូងនៅថ្មីថ្មោង ទើបពុំសូវមានបទពិសោធន៍ក្នុងការផលិត និងមិនទាន់យល់ច្បាស់អំពីវិទ្យាសាស្ត្របច្ចេកទេសជឿនលឿនក្នុងការដាំស្វាយ ដូច្នេះ មិនសូវមានប្រសិទ្ធភាព។ ក្រោយមកគាត់បានចូលរួមនៅរាល់ពេលបើកសិក្ខាសាលា វគ្គហ្វឹកហ្វាត់ផ្ទេរវិទ្យាសាស្ត្របច្ចេកទេសរយៈពេលខ្លីនិងរយៈពេលវែង ដែលរៀបចំដោយសមាគមកសិករ និងកសិកម្មឃុំ។ ដោយមានចរិតឧស្សាហ៍ព្យាយាមចូលចិត្តក្នុងការរៀនសូត្រ ជាមួយនឹងចំណេះដឹងដែលបានសិក្សា គាត់មិនរារែកអនុវត្តក្នុងការបង្កបង្កើនផលភ្លាម ទើបនាំមកប្រសិទ្ធភាពសេដ្ឋកិច្ចខ្ពស់ ទិន្នផលមួយថ្ងៃកាន់តែកើនឡើង។

ថ្វីដ្បិតក្នុងដំណាក់ការផលិត គាត់យល់ឃើញថា ជុំវិញចម្ការស្វាយរបស់គ្រួសារស្មៅដុះច្រើន។ ជារៀងរាល់ឆ្នាំ គាត់ត្រូវចំណាយពេលនិងប្រាក់ជាច្រើនលើការទិញថ្នាំស្មៅ។ បន្ទាប់ពីស្វែងយល់ បងដៀងសម្រេចចិត្តទិញពពែមកចិញ្ចឹមព្រលែង ឱ្យស៊ីស្មៅក្នុងចម្ការ។ ពូជពពែដែលបងដៀង ជ្រើសទិញចិញ្ចឹមគឺពូជបង្កាត់ Boer។ ពូជនេះងាយ ចិញ្ចឹមងាយថែទាំ ឆាប់ធំនិងផ្តល់ប្រភពចំណូលគ្រាន់បើ។ល។ សមស្របសម្រាប់ការចិញ្ចឹមនៅតំបន់ភ្នំឃុំអូរឡឹម។ បងប៊ូយស្វឹងដៀង ឱ្យដឹង៖ “ជារៀងរាល់ថ្ងៃ ប្រហែលជាម៉ោង៣រសៀល ខ្ញុំព្រលែងវាឱ្យទៅស៊ីស្មៅក្នុងចម្ការស្វាយ។ លុះពេលថ្ងៃជិតលិច វាត្រឡប់មកចូលទ្រុងដោយខ្លួនឯង។ ហេតុនេះ ខ្ញុំមិនសូវបង់កម្លាំងក្នុងការចិញ្ចឹម”។

ពពែដែលចិញ្ចឹមក្នុងទ្រុងរយៈពេល ៨ ខែ ទើបលក់បានមួយក្បាលៗមានទម្ងន់ប្រមាណពី ៨០ គីឡូក្រាមឡើងទៅ។ ចំណែកចិញ្ចឹមព្រលែង ក្នុងចម្ការ (រយៈពេលប្រហែលជាង ១ ឆ្នាំឡើងទៅ) ទើបលក់បានមួយក្បាលៗមានទម្ងន់មិនដល់ ៣០ គីឡូក្រាម។ ទោះបីដូច្នោះ ប៉ុន្តែនេះ ក៏ជាឧត្តមភាពព្រោះសាច់ពពែហាប់លក់បានតម្លៃខ្ពស់។

ផ្តើមពីការខិតខំប្រឹងប្រែងរបស់ខ្លួន គ្រួសារគាត់រកបានប្រាក់ចំណូលប្រមាណ ៧៦០លានដុង/ឆ្នាំ ពីដំណាំស្វាយ បន្ទាប់ពីគិតគូរការចំណាយឈ្នួលកម្មករ ដឹកជញ្ជូនកសិផល គាត់នៅចំណេញបានជាង ២៥០ លានដុង/ឆ្នាំ។ អាស្រ័យឆ្លៀតប្រើប្រាស់ប្រភពចំណីពពែលើផ្ទៃដីចម្ការស្វាយ ទើបការចិញ្ចឹមពពែមិនសូវចំណាយទុន ព្រមទាំងសាងសង់ទ្រុងខ្ពស់ស្រឡះស្រឡំ ដូច្នេះ ហ្វូងពពែមានការឆាប់ធំ តិចកើតជំងឺ។ តាមការប៉ាន់ស្មាន ក្នុងមួយឆ្នាំគាត់រកបានប្រាក់ចំណូលប្រមាណពី ១៥០-២០០ លានដុង ពីការលក់កូនពពែនិងពពែសាច់។

បងតីវឌិញហ៊ីវញ៉ឹងហូវ ប្រធានសមាគមកសិករឃុំអូរឡឹម ឱ្យដឹង៖ ជាច្រើនឆ្នាំបន្តបន្ទាប់ លោកដៀង ត្រូវបានពិនិត្យជម្រើសជាកសិករពូកែ។ ក្រៅពីនោះ គាត់ក៏បានជួយណែនាំកសិករនៅភូមិភាគ ២៨ នាក់ រួមគ្នាអភិវឌ្ឍសេដ្ឋកិច្ចគ្រួសារ។ ជោគជ័យពីទម្រង់ដាំឈើហូបផ្លែគួបផ្សំ នឹងចិញ្ចឹមពពែរបស់លោកដៀង បានបើកទិសដៅថ្មីសម្រាប់មាមីងកសិករឃុំអូរឡឹម កន្លែងមានជនរួមជាតិខ្មែររស់នៅជាង៩៥%៕

ថាញឡុង-មុនី

ចែករំលែកអត្ថបទ

ពាក្យគន្លឹះ