មហាសាមគ្គីជនជាតិ គំរូក្នុងសហគមន៍

17/02/2025 - 15:38

បងស្រីហា នៅអង្គុលី

បងស្រី យ៉ាងធីង៉ៀហា បច្ចុប្បន្ន ជាអ្នកជំនាញការការិយាល័យក្រុមប្រឹក្សាប្រជាជន និងគណៈកម្មាធិការប្រជាជនទីរួមខេត្តប៊ិញមិញ ខេត្តវិញឡុង។ ក្នុងនាមជាជនជាតិខ្មែរ ហើយត្រូវបានអង្គភាពចាត់ឱ្យទទួលបន្ទុកខាងការងារជនជាតិ ម្ល៉ោះហើយ បងស្រីពង្រីកបានល្អនូវសមត្ថភាពនិងមុខជំនាញរបស់ខ្លួន។

បងស្រីយ៉ាងធីង៉ៀហា។ (រូបបុគ្គលផ្ដល់ជូន)

បងស្រីហាបានទទួលប័ណ្ណសរសើររបស់ប្រធានគណៈកម្មាធិការប្រជាជនខេត្តវិញឡុង ដោយការរួមចំណែករបស់បងស្រី ក្នុងការងារជនជាតិលើភូមិសាស្រ្តនៅក្នុងមហាសន្និបាតតំណាងបណ្ដាជនជាតិភាគតិចខេត្តវិញឡុងឆ្នាំ ២០២៤ ។ បងស្រីហា រ៉ាយរ៉ាប់៖ “ប័ណ្ណសរសើររបស់ប្រធានគណៈកម្មាធិការប្រជាជនខេត្ត មានតម្លៃខាងស្មារតីយ៉ាងធំសម្រាប់ខ្ញុំ។ ដ្បិតអី វាបញ្ជាក់នូវប្រសិទ្ធភាពការងារដែលខ្ញុំកំពុងធ្វើ គឺជួយជីវភាពជនរួមជាតិលើភូមិសាស្រ្តទីរួមខេត្តប៊ិញមិញកាន់តែលំនឹងថែមទៀត”។

ដោយសារផ្ទះបងស្រីហានៅភូមិអង្គុលី ឃុំដុងប៊ិញ ទីរួមខេត្តប៊ិញមិញ ទើបមាមីងតែងហៅគាត់ថា បងស្រីហា នៅអង្គុលីដូច្នោះ។ ជាអ្នករស់នៅនឹងភូមិស្រុក ហើយថែមទាំងផ្សារភ្ជាប់ជាមួយការងារជនជាតិជាច្រើនឆ្នាំកន្លង បានជាបងស្រីហា យល់ច្បាស់នូវភូមិសាស្រ្តនិងជីវភាពរបស់ជនជាតិភាគតិច។ អាស្រ័យហេតុនោះ បងស្រីបានសហការយ៉ាងល្អជាមួយនឹងគណៈ ផ្នែក អង្គការមហាជននិងគណៈកម្មាធិការប្រជាជនឃុំ សង្កាត់ ខណៈពេលធ្វើស្ថិតិ ពិនិត្យឡើងវិញនូវមុខសញ្ញាទទួលផលប្រយោជន៍ពីកម្មវិធីគោលនយោបាយរបស់រដ្ឋ មានដូច៖ ប័ណ្ណធានារ៉ាប់រងសុខាភិបាល សម្រាប់ជនជាតិភាគតិចកំពុងរស់នៅតំបន់មានលក្ខណៈសេដ្ឋកិច្ច - សង្គមលំបាក និងអ្នកកំពុងរស់នៅតំបន់មានលក្ខណៈសេដ្ឋកិច្ច - សង្គមលំបាកខ្លាំង និងកម្មវិធីទិសដៅជាតិអភិវឌ្ឍន៍សេដ្ឋកិច្ច - សង្គមតំបន់ជនជាតិភាគតិចនិងតំបន់ភ្នំ ដំណាក់កាល ២០២១ - ២០៣០ ។ល។

បងសើុងរឿ អនុប្រធានគណៈកម្មាធិការប្រជាជនឃុំដុងថាញ់ ទីរួមខេត្តប៊ិញមិញ ឱ្យដឹង៖ “បងស្រីហាតែងសង្វាតសិក្សាស្រាវជ្រាវនូវកម្មវិធី គម្រោងនានា ម្ល៉ោះហើយខណៈពេលសហការជាមួយភូមិភាគគឺគាត់អនុវត្តលឿននិងប្រសិទ្ធភាព។ យើងខ្ញុំសុទ្ធសឹងជាអ្នករួមទិសដៅជួយជនរួមជាតិភាគតិចទទួលផលប្រយោជន៍គ្រប់សព្វ និងទាន់ពេលនូវគោលនយោបាយពិសេសដោយឡែករបស់រដ្ឋ ម្ល៉ោះហើយ ទើបមានគ្រួសារជនជាតិភាគតិចរាប់រយគ្រួសារ មានប័ណ្ណធានារ៉ាប់រងសុខាភិបាល កុមារបានជំនួយថវិកាសម្រាប់រៀនសូត្រ។ល។”។

តាមប្រសាសន៍លោក ង្វៀងថាញ់ផុង ប្រធានការិយាល័យក្រុមប្រឹក្សាប្រជាជននិងគណៈកម្មាធិការប្រជាជនទីរួមខេត្តប៊ិញមិញ អាស្រ័យបងស្រីហា ប្ដេជ្ញាចិត្តជាមួយការងារជនជាតិ ហើយថែមទាំងផ្សារភ្ជាប់ជាមួយការងារជាច្រើនឆ្នាំ ទើបស្ថាប័នមានការទំនុកចិត្តនៅពេលប្រគល់ការងារដល់បងស្រី។ ដើម្បីមិនឱ្យថ្នាក់លើខកបំណង បងស្រីតែងអនុវត្តសម្រេចល្អការងារបានប្រគល់ជូន ក្ដាប់ច្បាស់ភូមិសាស្រ្ត យល់ច្បាស់អំពីកម្មវិធី គម្រោងនីមួយៗ ហើយតែងមានសំណើសមស្របជាមួយស្ថានភាពភូមិភាគ និងតម្រូវការរបស់អ្នកទទួលផលពីគម្រោង។ ផ្ដើមពីនោះ មានកម្មវិធី គម្រោងជាច្រើនលើភូមិសាស្រ្តតែងបានផ្សព្វផ្សាយអនុវត្តប្រកបដោយប្រសិទ្ធភាព៕

ហាថាញ់ - ថាច់ធី

ចែករំលែកអត្ថបទ

ពាក្យគន្លឹះ