មហាសាមគ្គីជនជាតិ គំរូក្នុងសហគមន៍

03/02/2025 - 15:53

បក្ខជនសកម្មកសាងភូមិស្រុក

បងហ្វិញសាវ៉េត ប្រធានគណៈកម្មាធិការប្រជាជនភូមិតាកាន់ B ឃុំធ្វឹងហ្វា ស្រុកចូវថាញ់ ខេត្តសុកត្រាំង មានស្មារតីទទួលខុសត្រូវខ្ពស់ក្នុងការងារ ពិសេសគឺការងារកសាងជនបទថ្មី។

បងហ្វិញសាវ៉េត កំពុងថែទាំផ្កា។

តាកាន់ B ជាភូមិនៅតំបន់ជ្រៅ មានជនរួមជាតិខ្មែររស់នៅស្រូបអត្រាជាង ៧៥%។ ផ្លូវធ្វើដំណើរទៅមកមានការលំបាក ប៉ះពាល់យ៉ាងខ្លាំងដល់ការរស់នៅ និងការផលិតរបស់ប្រជាជន។ នៅពេលដែលរដ្ឋាភិបាលចាប់ផ្តើមចលនាកសាងជនបទថ្មី បងសាវ៉េត បានចលនាប្រជាជនចូលរួមជាមួយរដ្ឋដើម្បីអនុវត្តសំណង់ជនបទ។ បងបានចលនាប្រជាជនចូលរួមបរិច្ចាគដី សម្ភារៈ កម្លាំងពលកម្ម និងចលនាសប្បុរសជនដើម្បីកសាងស្ពាន និងផ្លូវជនបទ។ ជាមួយនឹងកិត្យានុភាពជាកម្មាភិបាលបក្ខជន និយាយដើរទន្ទឹមនឹងធ្វើនិងអនុវត្តមានប្រសិទ្ធភាពនោះ ជាង១០ឆ្នាំមកនេះ បងសាវ៉េត បានចលនាកសាងស្ពានបេតុងជនបទជាង ១០ ខ្សែ (ស្ពាននីមួយៗតម្លៃពី ៨០ - ១៥០ លានដុង) កសាងផ្លូវដាន ២ ខ្សែ ប្រវែងជិត៣គីឡូម៉ែត្រ បង្គោលទង់ជាង ៥០ ដើម ដោយមានបំពាក់អំពូលភ្លើងបំភ្លឺផ្លូវ រក្សាអនាម័យបរិស្ថាន ។ល។ ញុាំងឱ្យភូមិស្រុកមានសោភណភាពនិងជ្រះស្អាត។ លោក ហ្វិញគិត នៅភូមិតាកាន់ B ឱ្យដឹង៖ “អាស្រ័យបង ហ្វិញសាវ៉េត ទើបផ្លូវនិងស្ពានជនបទបានសាងសង់តភ្ជាប់ឃុំនិងភូមិភាគផ្សេងៗ ការដឹកជញ្ជូនទំនិញ លក់ដូរ ធ្វើដំណើរមានភាពងាយស្រួល ទើបជីវភាពរបស់ប្រជាជនមានភាពធូរធារជាង។ បង សាវ៉េត ពិតជាបក្ខជនអស់ពីចិត្ត គំរូជិតដិតនឹងប្រជាជន យល់ពីប្រជាជន និងនិយាយបានគឺធ្វើបាន ម៉្លោះហើយ អ្នកណាក៏ជឿទុកចិត្ត និងគោរពស្រឡាញ់”។

បងហ្វិញសាវ៉េត (ទី២រាប់ពីស្តាំ) ទទួលបណ្ណសរសើរពីគណៈកម្មាធិការប្រជាជនខេត្ត។

ទន្ទឹមនឹងនោះ បងសាវ៉េត បានចលនាមាមីងខ្មែរបរិច្ចាគដីសាងសង់អគារវប្បធម៌ និងចូលរួមកសាងសាលាទាន ដើម្បីមានកន្លែងសម្រាប់ធ្វើពិធីសាសនា និងធ្វើបុណ្យកម្សាន្តភូមិផងដែរ។ បងសាវ៉េត បានឱ្យដឹង៖ “មុននឹងធ្វើប្រធានភូមិ ខ្ញុំបម្រើការនៅរណសិរ្សបាន ១០ ឆ្នាំ ម៉្លោះហើយការកៀរគរសប្បុរសជនគឺងាយស្រួល។ ម៉្យាងទៀត ខ្ញុំនិយាយគឺធ្វើហើយថវិកាដែលសប្បុរសជននិងប្រជាជនផ្តល់ទាំងអស់ គឺធ្វើឡើងដោយបើកចំហនិងតម្លាភាពចំពោះមុខប្រជាជន។ ខ្ញុំបានកំណត់ច្បាស់ គឺធ្វើការងារណាដែលផ្តល់ប្រយោជន៍ដល់ប្រជាជន និងបម្រើការអភិវឌ្ឍជនបទ។ ខ្លួនខ្ញុំផ្ទាល់និងគ្រួសារ តែងតែរស់នៅជាគំរូ សកម្មចូលរួមចលនាក្នុងភូមិ ស្រុក និងសកម្មអភិវឌ្ឍសេដ្ឋកិច្ចដើម្បីធ្វើមាន។ ទាល់តែដូច្នេះ ទើបមាមីងខ្មែរឃើញជឿទុកចិត្ត ស្តាប់និងធ្វើតាម”។

អ្នកស្រី ដាំងធីយ៉ីមភឿង ប្រធានគណៈកម្មាធិការប្រជាជនឃុំធ្វឹងហ្វា ឱ្យដឹង៖ “បងហ្វិញសាវ៉េត គឺជាកម្មាភិបាលបក្ខជនគំរូ អស់ពីចិត្តចំពោះការងារនិងជាគំរូកសិករផលិតពូកែ។ ជាមួយនឹងការរួមចំណែករបស់គាត់ បានជួយឱ្យជនបទភូមិតាកាន់ B ក្លាយជាតំបន់មានសោភណភាព ជ្រះ ស្អាត និងប្រជាជនងាយស្រួលក្នុងការធ្វើដំណើរនិងអភិវឌ្ឍន៍សេដ្ឋកិច្ច។ បងសាវ៉េត ទើបបានគណៈកម្មាធិការប្រជាជនខេត្តសុកត្រាំង ជូនបណ្ណសរសើរដោយមានស្នាដៃក្នុងការកសាងជនបទថ្មី”៕

លីធាន-មេងលី

ចែករំលែកអត្ថបទ

ពាក្យគន្លឹះ