គោលនយោបាយ -ការរស់នៅ ការរស់នៅ

13/01/2025 - 16:02

មានជីវភាពលំនឹងដោយសារគោលនយោបាយ

ស្រុកហុងយ៉ឹង ខេត្តបាកលីវ អនុវត្តល្អនូវកម្មវិធី គម្រោងវិនិយោគអភិវឌ្ឍសេដ្ឋកិច្ចនៅតំបន់ជនរួមជាតិខ្មែរ បង្កលក្ខណៈជូនគ្រួសារក្រីក្រ គ្រួសារប្រកៀកបន្ទាត់ក្រជាជនជាតិខ្មែរអភិវឌ្ឍសេដ្ឋកិច្ច លើកកម្ពស់ប្រាក់ចំណូល លំនឹងជីវភាព។

បណ្តុះបណ្តាលមុខរបរ បង្កើតការងារធ្វើនៅនឹងកន្លែងជូនពលករជនបទ។

តាមប្រសាសន៍លោក ង្វៀងហ្វាងវ៉ូវ អនុប្រធានគណៈកម្មាធិការប្រជាជនស្រុកហុងយ៉ឹង រដ្ឋបានផ្សព្វផ្សាយអនុវត្តនូវគោលនយោបាយ ព្រមជាមួយនឹងការខិតខំប្រឹងប្រែងរបស់រដ្ឋអំណាចភូមិភាគក្នុងការគិតគូរជូនអ្នកក្រ ដូចជា៖ ឧបត្ថម្ភទុន ប្រគល់ជូនឧបករណ៍ មធ្យោបាយផលិតកម្ម ណែនាំរបៀបរកស៊ី បណ្តុះបណ្តាលវិជ្ជាជីវៈ និងដោះស្រាយការងារធ្វើ។ល។ ជាសន្សឹមៗលើកកម្ពស់ជីវភាពសម្ភារៈនិងស្មារតីជូនជនរួមជាតិភាគតិច។ ទន្ទឹមនឹងនោះ ស្រុកនៅទាំងចលនាមូលនិធិសុខុមាលភាពសង្គមនិងមូលនិធិដើម្បីអ្នកក្រ បានជាង ៤៦ ពាន់លានដុង ដើម្បីសាងសង់និងជួសជុលផ្ទះឧបការគុណបាន ១៨៩ខ្នង ផ្ទះមេត្តាធម៌បាន ៥១៨ ខ្នង ជូនគ្រួសារក្រីក្រ គ្រួសារប្រកៀកបន្ទាត់ក្រ គ្រួសារលំបាកខាងលំនៅឋាននិងជនរងគ្រោះដោយជាតិពុលពណ៌លឿង (Dioxi) ។ល។ អាស្រ័យហេតុនោះ ជនរួមជាតិខ្មែរមានលំនៅឋានលំនឹង មានលក្ខណៈអភិវឌ្ឍសេដ្ឋកិច្ច លើកកម្ពស់ប្រាក់ចំណូលជូនគ្រួសារ រួមចំណែកកាត់បន្ថយអត្រាគ្រួសារក្រីក្រនៅត្រឹមតែ ៥,៦% ប្រាក់ចំណូលមធ្យមភាគសម្រេចបាន ៨៤,១២ លានដុង/ម្នាក់/ឆ្នាំ។

បងស្រីយ័ញកីមហឿង នៅភូមិស៊ាវយ៉ឹង ឃុំនិញថាញ់ឡើយ ជាគ្រួសារក្រីក្រ ពេលបានរដ្ឋអំណាចឧបត្ថម្ភសង់ផ្ទះមេត្តាធម៌ និងឱ្យបុលទុន គាត់មានលក្ខណៈអភិវឌ្ឍសេដ្ឋកិច្ចដើម្បីចាកផុតពីភាពក្រីក្រ។ បងស្រីហឿង ឱ្យដឹង៖ “ពេលមានផ្ទះសម្បែងនិងបានបុលទុន ខ្ញុំបានវិនិយោគចិញ្ចឹមជ្រូកមេ ហេតុនោះ ពេលជ្រូកកើតកូនមកទុកចិញ្ចឹមមួយចំនួននិងមួយចំនួនលក់ជាកូន ចំណែកប្តីខ្ញុំគាត់ធ្វើកម្មករនៅក្រៅខេត្តមានប្រាក់ គាត់ផ្ញើមកផ្ទះ។ ដោយសារចិញ្ចឹមជ្រូកអំណោយផល ទើបគ្រួសារខ្ញុំបានចាកផុតពីភាពក្រីក្រនិងសន្សំដើមទុនបានមួយចំនួនដើម្បីពង្រីកទម្រង់ផលិតកម្ម”។ ចំណែកបងស្រីធីរឿង ក៏ជាគ្រួសារក្រីក្របានឧបត្ថម្ភសង់ផ្ទះ និងបុលទុនអភិវឌ្ឍសេដ្ឋកិច្ច ម្ល៉ោះហើយក៏បានចាកផុតពីភាពក្រីក្រ មានជីវភាពលំនឹង។ បងស្រីធីរឿង ឱ្យដឹង៖ “បានសមាគមសហព័ន្ធនារីខេត្ត សង់ផ្ទះមេត្តាធម៌ជូន និងឱ្យបុលទុន ខ្ញុំបានវិនិយោគចិញ្ចឹមជ្រូកនិងដាំដំណាំរួមផ្សំ។ ផ្ទៃដីជាង១កុង ខ្ញុំដាំបន្លែជាច្រើនប្រភេទប្តូរវេនគ្នា ដូចជា៖ ស្ពៃចង្កឹះ ស្ពៃខៀវ ត្រកួន ត្រសក់។ល។ ហេតុនោះ មានបន្លែបង្ការប្រមូលផលជាប្រចាំ។ ឥឡូវ ខ្ញុំចិញ្ចឹមជ្រូក ដាំដំណាំរួមផ្សំ រកបានប្រាក់ចំណូលលំនឹង ម្ល៉ោះហើយគ្រួសារខ្ញុំបានធូរធារជាបណ្តើរៗ។

លោកយ័ញកាវ ប្រធានការិយាល័យជនជាតិនិងសាសនាស្រុកហុងយ៉ឹង ឱ្យដឹង៖ “ដោយសារមានកម្មវិធី គម្រោងឧបត្ថម្ភទុន សង់ផ្ទះមេត្តាធម៌ បណ្តុះបណ្តាលវិជ្ជាជីវៈ និងឧទ្ទេសនាមការងារធ្វើ។ល។ បានជួយឱ្យគ្រួសារខ្មែរជាច្រើនចាកផុតពីភាពក្រីក្រ ឈានឡើងធូរធារ។ អាចអំណះអំណាងបានថា គោលនយោបាយរបស់រដ្ឋវិនិយោគអភិវឌ្ឍសេដ្ឋកិច្ចនៅតំបន់ជនរួមជាតិខ្មែរបានពង្រីកប្រសិទ្ធភាព ទន្ទឹមនឹងនោះ ក៏ជាប្រភពកម្លាំងលើកទឹកចិត្តដ៏ធំជួយគ្រួសារលំបាក មានទំនុកចិត្តឈានឡើងក្នុងជីវភាព”៕

យ្វីអាញ-វិមាន

ចែករំលែកអត្ថបទ

ពាក្យគន្លឹះ