សុខភាព - អប់រំ សុខភាព

11/11/2024 - 16:47

សុខាភិបាលមូលដ្ឋានតំបន់ជនជាតិភាគតិច

សុខាភិបាលមូលដ្ឋានតំបន់ជនជាតិភាគតិច នៅតំបន់វាលរាបទន្លេគឺវឡុងកាន់តែសុក្រឹត ឆ្លើយតបតម្រូវការថែទាំសុខភាពបឋមជូនប្រជាជន។ ផ្តើមពីនោះ សុខាភិបាលមូលដ្ឋានក៏បង្កបានទំនុកចិត្តចំពោះអ្នកជំងឺជាបណ្តើរៗ រួមចំណែកបង្កើនចំនួនមនុស្សទិញប័ណ្ណធានារ៉ាប់រងសុខាភិបាល។

អ្នកជំងឺមកពិនិត្យជំងឺនៅដំណាក់សុខាភិបាលសង្កាត់ត្រឿងឡាក។

យោងតាមស្ថិតិរបស់ផ្នែកសុខាភិបាលក្រុងកឹងធើ ទូទាំងក្រុងមានដំណាក់សុខាភិបាលចំនួន៨០ សម្រេចក្រមលក្ខឋានជាតិអំពីសុខាភិបាលឃុំ ដំណាក់សុខាភិបាលទាំង ១០០% គឺមានវេជ្ជបណ្ឌិតប្រចាំការនិងមានសហការីសុខាភិបាលចំនួន៥៦៦នាក់នៅតាមភូមិមណ្ឌល។ ពិសេស ដំណាក់សុខាភិបាលតំបន់ជនរួមជាតិភាគតិចទាំងអស់នៅតំបន់វាលរាបទន្លេគឺវឡុង មានភាពសមរម្យ បានបំពាក់សម្ភារៈបរិក្ខារពេទ្យទំនើបៗ ដើម្បីបម្រើដល់ការពិនិត្យ ព្យាបាលជំងឺបឋមជូនប្រជាជន។ លោក ង្វៀងមិញហ្វី ប្រធានគណៈកម្មាធិការប្រជាជនសង្កាត់ត្រឿងឡាក ខណ្ឌអូរម៉ូង ក្រុងកឹងធើ ឱ្យដឹង៖ “ដំណាក់សុខាភិបាលសង្កាត់ត្រឿងឡាក បានបំពាក់សម្ភារៈបរិក្ខារពេទ្យគ្រប់សព្វ ដើម្បីបម្រើដល់ការពិនិត្យ ព្យាបាលជំងឺបឋមជូនប្រជាជន ថែមទាំងនៅក្បែរមណ្ឌលចំនួន២ ដែលមានជនរួមជាតិខ្មែររស់នៅកុះករ នោះគឺមណ្ឌលប៊ិញអៀងនិងប៊ិញឡើយ ដូច្នេះមាមីងបានមកពិនិត្យ ព្យាបាលជំងឺយ៉ាងច្រើនកុះករ។ ដំណាក់សុខាភិបាល បានបង្កលក្ខណៈសម្បត្តិជូនបុគ្គលិកម្នាក់ជាជនជាតិខ្មែរ ទៅសិក្សាថ្នាក់វិក្រឹតការ វេជ្ជបណ្ឌិត ដើម្បីងាយស្រួលក្នុងការពិនិត្យ ព្យាបាលជំងឺជូនជនរួមជាតិខ្មែរលើភូមិសាស្ត្រ។ ក្រៅពីនោះ ដំណាក់សុខាភិបាលនៅទាំងសហការជាមួយសប្បុរសជនដើម្បីមានរថយន្តសង្គ្រោះបន្ទាន់ ដឹកអ្នកជំងឺធ្ងន់ឡើងទៅមន្ទីរពេទ្យថ្នាក់លើដោយឥតគិតថ្លៃ។ បន្ទាប់ពីមានសម្ភារៈបរិក្ខារពេទ្យគ្រប់សព្វ សម្រាប់បម្រើការងារពិនិត្យ ព្យាបាលជំងឺ ប្រជាជនក៏ស្ងប់អារម្មណ៍ពេលមកពិនិត្យសុខភាព”។

ដំណាក់សុខាភិបាលតំបន់ជនរួមជាតិភាគតិចនៅខេត្តវិញឡុង គៀងយ៉ាង ហូវយ៉ាង។ល។ ក៏បានវិនិយោគកសាងមានភាពសមរម្យ បង្កបានទំនុកចិត្តចំពោះអ្នកជំងឺពេលមកពិនិត្យ ព្យាបាលជំងឺបឋម។ វេជ្ជបណ្ឌិត លឺវវ៉ាន់ហាញ់ ប្រធានដំណាក់សុខាភិបាលឃុំឌិញអាង ស្រុកហ្គក្វាវ ខេត្តគៀងយ៉ាង ឱ្យដឹង៖ “ដំណាក់សុខាភិបាល ទើបបានវិនិយោគបង្កើនកម្រិតជួសជុលលាបពណ៌បានសមរម្យ ស្អាតបាត អ្នកជំងឺមកពិនិត្យព្យាបាលកាន់តែច្រើនឡើង”។ បច្ចុប្បន្ន លក្ខណៈនៃការរស់នៅរបស់ប្រជាជនមានភាពផ្លាស់ប្តូរ ការទទួលផលអំពីសម្ភារៈ ស្មារតីក៏កាន់តែកើនឡើងផងដែរ។ អ្នកមីងធីបេន នៅឃុំឌិញអាង ឱ្យដឹង៖ “ពេលឈឺ យើងមានអារម្មណ៍ពិបាកទ្រាំណាស់ លុះមកពិនិត្យជំងឺនៅកន្លែងមិនបានស្អាតបាត ជំងឺកាន់តែធ្ងន់ឡើង។ ដូច្នេះ ពេលមកដំណាក់សុខាភិបាលឃុំពិនិត្យជំងឺ ឃើញដំណាក់មានភាពសមរម្យ មានបំពាក់សម្ភារៈបរិក្ខារពេទ្យទំនើបៗ កងជួរកម្មាភិបាលពេទ្យរួសរាយរាក់ទាក់ គឺខ្ញុំស្ងប់អារម្មណ៍ដូចបានធូរស្រាលបន្តិចដែរ”។

នៅដំណាក់សុខាភិបាលឃុំដុងប៊ិញ ទីរួមខេត្តប៊ិញមិញ ខេត្តវិញឡុង ការងារផ្សព្វផ្សាយ ចលនាប្រជាជនម្ចាស់ការថែទាំសុខភាពបឋម តែងបានអនុវត្តល្អ។ វេជ្ជបណ្ឌិត តូយ៉ាឡិន ប្រធានដំណាក់សុខាភិបាលឃុំដុងប៊ិញ ឱ្យដឹង៖ “យើងខ្ញុំធ្វើបច្ចុប្បន្នភាពព័ត៌មានជាប្រចាំអំពីរោគរាតត្បាត របៀបបង្ការជំងឺ។ល។ រួចបិទលើតារាងព័ត៌មាននៅដំណាក់ ដើម្បីប្រជាជនមកពិនិត្យជំងឺអាចមើលឃើញ។ ក្រៅពីនោះ ដំណាក់ក៏បានចាត់កម្មាភិបាលម្នាក់ទទួលបន្ទុកទំនាក់ទំនងជាមួយបុគ្គលិក សហការីសុខាភិបាលនៅតាមភូមិនីមួយៗ ធ្វើយ៉ាងណាពេលមានរោគរាលដាលកើតឡើង យើងអាចនឹងទប់ស្កាត់បានទាន់ពេល។ ទន្ទឹមនឹងនោះ ធ្វើការពិគ្រោះយោបល់ជូនប្រជាជនពេលត្រូវការ”៕

ហាថាញ-មុនី

ចែករំលែកអត្ថបទ

ពាក្យគន្លឹះ