សុខភាព - អប់រំ អប់រំ

06/08/2024 - 10:22

ផ្ដោតការយកចិត្តទុកដាក់ការងារអប់រំនៅតំបន់ជនរួមជាតិខ្មែរ

ស្រុកត្រឹងដេ ខេត្តសុកត្រាំង តែងយកចិត្តទុកដាក់ដល់ការកសាងប្រព័ន្ធសាលារៀនសម្រេចបទដ្ឋានជាតិ រួមចំណែកលើកកម្ពស់គុណភាពអប់រំ ពិសេសនៅតំបន់មានជនរួមជាតិខ្មែររស់នៅកុះករ។

សិស្សសាលាបឋមសិក្សាដាយអឹង២B កំពុងលេងកម្សាន្តមុខទីធ្លាសាលា។

យោងតាមការិយាល័យអប់រំនិងបណ្តុះបណ្តាលស្រុកត្រឹងដេ ឆ្នាំសិក្សា២០២៣-២០២៤ ស្រុកបានវិនិយោគទឹកប្រាក់ជាង៧៣ពាន់លានដុងពីប្រភពទុនបុព្វហេតុ ទុនកម្មវិធីទិសដៅជាតិអភិវឌ្ឍសេដ្ឋកិច្ច-សង្គមនៅតំបន់ជនជាតិភាគតិចនិងតំបន់ភ្នំ (ហៅកាត់ថា កម្មវិធី) ទុនបែងចែកថវិកាស្រុកសម្រាប់បង្កើនកម្រិត ជួសជុលមូលដ្ឋានសម្ភារៈនិងសាងសង់ថ្មីអង្គភាពសាលាចំនួន២៧។ ឆ្លងតាមរយៈនោះ រួមចំណែកជំរុញទូទាំងស្រុកមានសាលារៀនសម្រេចបទដ្ឋានជាតិ៤០/៤៦។ ព្រមជាមួយនោះ កងជួរគ្រូបង្រៀនក៏បានបណ្តុះបណ្ដាល បំពាក់បំប៉នធានាគ្រប់បទដ្ឋាន រួមចំណែកលើកកម្ពស់គុណភាពអប់រំ ជាពិសេសគឺនៅតំបន់ជនរួមជាតិខ្មែរ។

ឆ្នាំសិក្សា២០២៣-២០២៤ សាលាអនុវិទ្យាល័យជនជាតិអន្តេវាសិកស្រុកត្រឹងដេ បានផ្នែកអប់រំវិនិយោគទឹកប្រាក់ជាង៣ពាន់លានដុង ផ្ដើមពីប្រភពទុនកម្មវិធីសម្រាប់វិនិយោគ បង្កើនកម្រិតកែលម្អបន្ទប់រៀន១១បន្ទប់និងមណ្ឌលអន្តេវាសិកដ្ឋាន៣៦បន្ទប់។ លោកគ្រូត្រឹងស៊ុង នាយកអនុវិទ្យាល័យជនជាតិអន្តេវាសិកស្រុកត្រឹងដេ ឱ្យដឹង៖ “សាលារៀនបានវិនិយោគធ្វើឱ្យសុក្រឹត មូលដ្ឋានសម្ភារៈនិងឧបករណ៍ មានដូច៖ បន្ទប់រៀនអន្តេវាសិកដ្ឋាន អគារពហុមុខងារ អាហារដ្ឋានជាដើម ដើម្បីឆ្លើយតបតម្រូវការស្នាក់នៅនិងសិក្សារបស់សិស្សគ្រប់រូប។ ទន្ទឹមនឹងនោះ ឧបករណ៍បង្ហាត់បង្រៀនត្រូវបានបំពាក់គ្រប់សព្វ។ សាលា ក៏បានអនុវត្តគ្រប់សព្វនូវរបបគោលនយោបាយសម្រាប់គ្រូបង្រៀននិងសិស្ស តាមសេចក្ដីកំណត់របស់រដ្ឋ ម្ល៉ោះហើយបង្កជាកម្លាំងចលករសម្រាប់គ្រូបង្រៀននិងសិស្ស បង្រៀនល្អ រៀនល្អ។ រៀងរាល់ឆ្នាំ សាលាមានសិស្សឡើងថ្នាក់១០០% មានសិស្សសម្រេចនិទ្ទេសពូកែជាង៧០% ហើយអត្រាសិស្សទទួលបានកិត្តិនាមសិស្សពូកែថ្នាក់ស្រុក ថ្នាក់ខេត្ត កាន់តែកើនឡើង”។

សាលាបឋមសិក្សាដាយអឹង ២B ឃុំដាយអឹង២ ជាសាលាមានសិស្សជនជាតិខ្មែរជិត១០០% ម្ល៉ោះហើយត្រូវបានវិនិយោគកសាងយ៉ាងសមរម្យ បំពាក់ឧបករណ៍បង្រៀនគ្រប់សព្វ ឆ្លើយតបតម្រូវការតាមកម្មវិធីផ្លាស់ថ្មីសៀវភៅសិក្សាគោលរបស់ក្រសួងអប់រំនិងបណ្តុះបណ្តាល។ មកដល់បច្ចុប្បន្ន គ្រូបង្រៀនទាំងអស់របស់សាលាសុទ្ធតែសម្រេចបទដ្ឋាន ហើយសាលាធានាការបង្ហាត់បង្រៀនក្នុងមួយថ្ងៃ២ពេល ចាប់ពីថ្នាក់ទី ១ដល់ថ្នាក់ទី៥។ អ្នកគ្រូថាច់ធីស្វឹង គ្រូបង្រៀនសាលាបឋមសិក្សាដាយអឹង២B ឱ្យដឹង៖ “បន្ទប់រៀន ឧបករណ៍បង្រៀនត្រូវបានវិនិយោគគ្រប់សព្វ គ្រូបង្រៀនសុទ្ធតែមានម៉ាស៊ីនកុំព្យូទ័រយួរដៃគ្រប់គ្នាសម្រាប់បញ្ចាំងស្លាយខ្លឹមសារមេរៀនលើកញ្ចក់ទូរទស្សន៍។ រូបភាពបញ្ចាំងមានភាពរស់រវើក ជួយដល់សិស្សងាយយល់និងហ៊ានបញ្ចេញយោបល់ ម្ល៉ោះហើយម៉ោងរៀនកាន់តែសម្រេចគុណភាពថែមទៀត”។

តាមប្រសាសន៍លោកទ្រិញវ៉ាន់បែ អនុប្រធានគណៈកម្មាធិការប្រជាជនស្រុកត្រឹងដេ ឱ្យដឹង៖ ស្រុកមានជនជាតិខ្មែរជិត៦៥% ម្ល៉ោះហើយការងារអប់រំត្រូវបានយកចិត្តទុកដាក់ពិសេស។ សំខាន់គឺសាលារៀននៅឃុំមានជនរួមជាតិខ្មែររស់នៅកុះករ រឹតតែបានស្រុកចិត្តទុកដាក់វិនិយោគ កសាងសមរម្យនិងសម្រេចបទដ្ឋានជាតិ៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ