មហាសាមគ្គីជនជាតិ គំរូក្នុងសហគមន៍

08/07/2024 - 17:05

អាហារបួសសូន្យដុង ផ្តល់ភាពកក់ក្តៅដល់មាមីងក្នុងភូមិស្រុក

ទោះបីទើបតែដំណើរការបានជិត ៤ ខែក៏ដោយ ប៉ុន្តែហាងអាហារបួសទឺតឹម នៅឃុំអាងហ៊ីប ស្រុកចូវថាញ់ ខេត្តសុកត្រាំង បានក្លាយជាអាសយដ្ឋានជិតដិតសម្រាប់មាមីងកម្មករក្រីក្រក្នុងភូមិស្រុក។

សមាជិកដែលជួយថែទាំហាងបាយទឺតឹម គឺជាអ្នកភូមិមានចិត្តសប្បុរសដូចគ្នា។

អ្នកមីង ង្វៀងធីធ្វីឡង ទទួលបន្ទុកគ្រប់គ្រងហាងអាហារបួសទឺតឹម ឱ្យដឹង៖ ហាងនេះ ប្តីប្រពន្ធបងស្រី ហ្វិញថ្វយអៀង (អាយុ ៣៦ ឆ្នាំ ម្ចាស់គ្លីនិកទន្តពេទ្យនៅឃុំអាងហ៊ីប) ជាអ្នកជំហរបើក។ ដំបូងឡើយ ចម្អិនតែម្ភៃសាមសិមចំណែកសម្រាប់ចែកចាយជូនមាមីងកម្មករក្រីក្រប៉ុណ្ណោះ។ បន្តិចម្ដងៗ ការងារសប្បុរសធម៌មួយថ្ងៃកាន់តែរីកសុសសាយឡើង ដូច្នេះសប្បុរសជនជាច្រើនបានរួមដំណើរនិងជួយឧបត្ថម្ភ។ អ្នកខ្លះចេញកម្លាំងអ្នកខ្លះចេញធនធាន ដើម្បីជួយដល់ប្តីប្រពន្ធបងស្រីអៀង បន្តដំណើរការរបស់ហាង។

បច្ចុប្បន្ន ហាងនេះដំណើរការនិងផ្តល់អាហារនៅម៉ោង ១០:៣០ នាទី រៀងរាល់ថ្ងៃច័ន្ទ ពុធនិងថ្ងៃសុក្រក្នុងសប្តាហ៍។ ជារៀងរាល់ថ្ងៃ អាហារបួសត្រូវបានចែកចាយជាង ២០០ ចំណែក។ “ប្តីប្រពន្ធបងស្រីមានបំណងជាយូរមកហើយចង់បើកហាងអាហារបួស ប៉ុន្តែមិនមានពេលថ្មីៗ នេះទើបតែបើកបានហាង។ ដើម្បីមានកន្លែងធ្វើម្ហូបនិងចែកចាយអាហារ ប្តីប្រពន្ធបង បានសម្រេចចិត្តចំណាយប្រាក់សាងសង់ហាងនៅលើដីគ្រួសារនៅខាងមុខផ្ទះបានព្យួរផ្លាកសញ្ញាហាងអាហារបួសទឺតឹមសូន្យដុង ដើម្បីឱ្យមាមីងដឹងនឹងមកទទួល” - មីងឡងឱ្យដឹងដូច្នេះ។

បើតាមអ្នកមីងឡង ដើម្បីចម្អិនអាហារបាន ២០០ ចំណែក គឺត្រូវចំណាយប្រាក់ប្រមាណ ៧០០ ពាន់ដុង។ ក្រៅពីថវិកាប៉ាន់ស្មានរបស់ប្តីប្រពន្ធបងស្រីអៀង ហាងក៏ទទួលបានការឧបត្ថម្ភ ពីអាជីវករលក់បន្លែផ្លែឈើនៅផ្សារ អ្នកខ្លះចូលរួមចំណែកគ្រឿងទេស អង្ករ និងអ្នកខ្លះជួយជាកម្លាំងក្នុងការចម្អិន។ ទាំងអស់គ្នាមានបំណង ចង់ជួយដល់មាមីងក្រីក្រឱ្យមានអាហារឆ្ងាញ់ៗ បំពេញក្រពះ។ អ្នកមីង ង្វៀងធីឡាងអាញ (អាយុ ៦៥ ឆ្នាំ នៅឃុំអាងហ៊ីប) ឱ្យដឹង៖ “ហាងបាយសូន្យដុងនេះ ពិតជាមានន័យខ្លាំងណាស់ ព្រោះមានទីតាំងនៅកន្លែងដែលប្រជាជនខ្មែររស់នៅច្រើន ជួយប្រជាជនដែលមានការលំបាកមានអាហារសមរម្យ និងមានកម្លាំងធ្វើការ។ ខ្លួនខ្ញុំផ្ទាល់មិនមានធនធានសេដ្ឋកិច្ចដើម្បីជួយទេ ប៉ុន្តែខ្ញុំរួមកម្លាំងកាយក្នុងការចម្អិន។ ពេលឃើញ មាមីងទទួលប្រអប់បាយឆ្ងាញ់ ខ្ញុំសប្បាយចិត្តណាស់”។

ទោះបីគាត់មានវ័យច្រើនក៏ដោយ អ្នកមីងឡេធីសាវ (អាយុ ៧៤ ឆ្នាំ នៅឃុំអាងហ៊ីប) នៅតែមកជួយធ្វើម្ហូបនៅហាងបាយទឺតឹម ដោយមានបំណងចង់រួមចំណែកជួយដល់មាមីងក្រីក្រ។ ទទួលបានចំណែកបាយក្តៅៗ អ្នកមីងថាច់ធីហុង (អាយុ ៥០ ឆ្នាំ នៅឃុំអាងហ៊ីប) រៀបរាប់៖ “រាល់ថ្ងៃទៅលក់ឆ្នោត ខ្ញុំទិញតែបាយដំណើបមួយកញ្ចប់៥.០០០ដុងហូបឱ្យតែឆ្អែតប៉ុណ្ណោះ។ ចាប់តាំងពីហាងបាយសប្បុរសធម៌នេះបើកមកដល់គឺទទួលបានអាហារបួសគ្រប់មុខមួយចំណែក ដែលមានរសជាតិឈ្ងុយឆ្ងាញ់ មានជីវជាតិនិងគ្រប់ជាតិបំប៉ន។ ពួកគាត់ក៏បានសួរនាំនិងលើកទឹកចិត្ត ធ្វើឱ្យខ្ញុំមានអារម្មណ៍រីករាយ និងមានកម្លាំងចិត្តជម្នះការលំបាក”៕

ង្វៀងទ្រិញ - មេងលី

ចែករំលែកអត្ថបទ

ពាក្យគន្លឹះ