មហាសាមគ្គីជនជាតិ គំរូក្នុងសហគមន៍

13/05/2024 - 15:52

ប្ដីប្រពន្ធបងស្រីលី ចាកផុតពីភាពក្រីក្រ

នឹកឃើញគ្រាក្រលំបាក បងស្រីចូវគីមលី នៅភូមិ៤B ទីប្រជុំជនបៃងាង ស្រុកចូវថាញ់ A ខេត្តហូវយ៉ាង នៅតែមានភាពភ័យខ្លាចជានិច្ច។ អាស្រ័យហេតុនោះ បានជាបងស្រីលី តែងថ្លែងអំណរគុណយ៉ាងជ្រាលជ្រៅចំពោះការឧបត្ថម្ភប្រកបមុខរបរចិញ្ចឹមជីវិតរបស់រដ្ឋ ដែលជួយគ្រួសារបងស្រីឈានឡើង។

ផ្ទះតូចល្មមក៏ពិតមែន ប៉ុន្តែប្ដីប្រពន្ធបងស្រីលីសន្សែសន្សំទិញបាន
របស់របរប្រើប្រាស់ក្នុងគ្រួសារ។

ដោយសារស្ថានភាពគ្រួសារទាំងសងខាងក្រលំបាក ក្រោយពីរស់នៅគ្រួសារខាងប្ដីមួយរយៈ បងស្រីលី ក៏ទទួលបានធារផ្ទះមួយនៅក្បែរប្រឡាយសម្រាប់សង់ផ្ទះអំពីឫស្សី ប្រក់ស្លឹកចេញរស់នៅដោយឡែក។ ជីវភាពពឹងលើការស៊ីឈ្នួល ម្ល៉ោះហើយប្ដីប្រពន្ធបងស្រីលី ប្រឈមនឹងភាពលំបាកខណៈពេលដាច់រដូវកាល។ បងស្រីលី រំលឹកឡើង៖ “គ្មាននរណាជួលគឺប្ដីប្រពន្ធខ្ញុំត្រូវរត់រកប្រាក់ឈ្នួលជាមុនពីម្ចាស់ស្រែដែលស្គាល់សម្រាប់ដោះស្រាយជីវភាព។ លុះដល់រដូវស្រូវ គឺយើងខ្ញុំទៅធ្វើការឈ្នួលសងវិញ ចេះតែអនុវត្តបែបនេះ ពីមួយឆ្នាំទៅមួយឆ្នាំ។ ទោះបីពីរនាក់ប្ដីប្រពន្ធខ្ញុំប្រឹងប្រែងធ្វើការហត់នឿយយ៉ាងណាក៏ដោយ ប៉ុន្តែនៅតែមិនសេសសល់។ ក្នុងគ្រួសារចេះតែខ្វះមុខខ្វះក្រោយ”។

ជាអ្នកមានប្រជាប្រិយនៅភូមិភាគ ពូសើុងតាយ បានពិគ្រោះយោបល់ហើយឧទ្ទេសនាមនូវគោលនយោបាយជំនួយរបស់រដ្ឋសម្រាប់ប្ដីប្រពន្ធបងស្រីលី។ ផ្ដើមពីនោះ បងស្រីបានទៅកាន់ភូមិ ទីប្រជុំជនដើម្បីស្វែងរកទម្រង់ប្រកបការងារចិញ្ចឹមជីវិត។ អាស្រ័យបានជំនួយទុន ប្ដីប្រពន្ធបងលីទិញបានម៉ូតូ ហើយពីរនាក់ប្ដីប្រពន្ធគាត់អាចបើកបរចុះទៅមើុយបូងង៉ាង ធ្វើការឈ្នួលនៅរោងចក្រកិនស្រូវ។ ជម្រុកស្រូវនៅមើុយបូងង៉ាងគឺធំណាស់ បានជាប្ដីរបស់បងស្រីលីមានការងារធ្វើខួបឆ្នាំ។ ចំណែកបងស្រីលី ក៏មានម៉ូតូសម្រាប់បើកបរទៅផ្សារបៃង៉ាង ជួយការងាររត់តុក្នុងហាងលក់គុយទាវ ពេលព្រឹកក៏រកបានប្រាក់ចំណូលគ្រប់ប្ដីប្រពន្ធគាត់ហូបចុកប្រចាំថ្ងៃ។ ប្រាក់ឈ្នួលរបស់ប្ដី គឺត្រូវបានបងស្រីលី សន្សែសន្សំសម្រាប់ជួសជុលផ្ទះនិងទិញរបស់របរប្រើប្រាស់។ ក្រៅពីមានទូរទស្សន៍គ្រួសារបងស្រីក៏ទិញបានទូត្រជាក់ ម៉ាស៊ីនបោកគក់ទៀតផង។ល។ ពេលព្រឹកបងស្រីឌុបប្ដីទៅធ្វើការឈ្នួលនៅជង្រុកស្រូវ ហើយទៅផ្សារជួយការងាររត់តុក្នុងហាង។ ពេលរសៀល ក្រោយពីរៀបចំបាយទឹក ផ្ទះសម្បែងរួចរាល់ បងស្រីក៏បើកម៉ូតូទៅឌុបប្ដីមកផ្ទះ។ មានពេលវេលារៀបចំ ម្ល៉ោះហើយផ្ទះសម្បែងរបស់បងស្រីពេលណាក៏ជ្រះស្អាតនិងមានសណ្ដាប់ធ្នាប់។

បងស្រីលី ឱ្យដឹង៖ “ខ្ញុំជួយការងាររត់តុក្នុងហាងរៀងរាល់ពេលព្រឹករកបានប្រាក់ចំណូល ១០០.០០០ ដុង។ ចំនួនប្រាក់នេះ ខ្ញុំទៅផ្សារទិញម្ហូបចំណីសម្រាប់ពីរនាក់ប្ដីប្រពន្ធខ្ញុំហូបមិនអស់ទេ។ ដូចជាព្រឹកនេះ ខ្ញុំបានទិញត្រីងាប់ៗមកប្រឡាក់អំបិលហើយចៀន។ ពេលរសៀលក្រោយពីរៀបចំផ្ទះសម្បែងរួច ខ្ញុំដើរតាមមាត់ប្រឡាយរកបេះបន្លែបង្ការមកស្រុស ឬស្លគឺគ្រប់គ្រាន់ហូបទៅហើយ។ ធ្លាប់ក្រលំបាកបានជាប្ដីប្រពន្ធខ្ញុំតែងមូលគំនិតគ្នាប្រិតសំចៃដូច្នេះ”។

លោកយ័ញតាម សមាជិកគណៈកម្មាធិការបក្សនៃសាខាបក្សភូមិ៤B បញ្ជាក់៖ “ប្ដីប្រពន្ធ បងស្រីលី គឺព្យាយាមប្រកបការងាររកស៊ីខ្លាំងណាស់។ ប្រសិនបើមានអ្នកណាហៅទៅធ្វើការងារនៅពេលរសៀលរកប្រាក់ចំណូលបន្ថែម គឺបងស្រីទទួលទៅធ្វើភ្លាម។ មានអ្នកជាច្រើន បានរំលឹក បងស្រីឱ្យឈប់ទៅជួយការងាររត់តុក្នុងហាង ដើម្បីទៅធ្វើការឈ្នួលពេញមួយថ្ងៃសម្រាលដល់ការបើកបរចុះឡើង ប៉ុន្តែបងស្រី មិនព្រមទេ ព្រោះអីគាត់មានបំណងរកប្រាក់ចំណូលលំនឹង។ គ្រួសារបងស្រីលី គឺគ្រួសារគំរូក្នុងការប្រើប្រាស់ទុនជំនួយរបស់រដ្ឋប្រកបដោយប្រសិទ្ធភាព”៕

ហាថាញ់ - ថាច់ធី

ចែករំលែកអត្ថបទ

ពាក្យគន្លឹះ