មហាសាមគ្គីជនជាតិ ភូមិស្រុកផ្លាស់ថ្មី

07/05/2024 - 08:24

ប្រសិទ្ធភាពនៃការដាំដំណាំរួមផ្សំលើដីស្រែ

កសិករខ្មែរនៅឃុំថាញ់ភូ ស្រុកមីស្វៀង ខេត្តសុកត្រាំង ដាំដំណាំរួមផ្សំនៅលើដីស្រែមានប្រសិទ្ធភាពខ្ពស់ រួមចំណែកបង្កើនប្រាក់ចំណូលនិងកែលម្អជីវភាព។

កសិករខ្មែរនៅឃុំថាញ់ភូ ប្រមូលផលឪឡឹកដាំនៅលើដីស្រែ។

បងស្រី តូធីគឹមហឿង នៅភូមិព្រែកឆ្វេង ឃុំថាញ់ភូ មិនធ្វើស្រែរដូវទី៣ទេ តែបង្វែរមកដាំឪឡឹកនៅលើដីស្រែចំនួន ២ កុងវិញ។ ក្រោយពីដាំបានជិត៣ខែ ឪឡឹកផ្តល់ទិន្នផលនិងរកបានប្រាក់ចំណេញខ្ពស់គួរសម បើប្រៀបនឹងធ្វើស្រែ។ បងស្រីហឿង ឱ្យដឹង៖ “ឪឡឹកងាយដាំ សមស្របក្នុងរដូវប្រាំង និងមិនសូវបង់ជីនិងថ្នាំកម្ចាត់សត្វល្អិតទៀតផង។ បន្ទាប់ពីប្រមូលផលស្រូវរដូវទី ២ រួច ខ្ញុំជីកដីធ្វើផ្លូវទឹក រួចចុះពូជ។ ជាធម្មតាខ្ញុំស្រោចទឹកពីរដងក្នុងមួយថ្ងៃ លុះដល់ពេលជិតប្រមូលផលស្រោចទឹកមួយថ្ងៃតែ ១ ម្ដង ហើយការដាក់ជី (URE និង ADP) ក្នុងមួយកុង ២ បាវ។ លុះជិតដល់ប្រមូលផលដាក់ជីកាលស្យូម ដើម្បីបង្កើតកម្រិតផ្អែមនិងពណ៌ផ្លែឱ្យស្អាត។ តាមប្រសាសន៍បង ស្រីហឿង ប្រមូលផលឪឡឹក ១ កុងបានជាង ៣តោន លក់ក្នុងមួយគីឡូក្រាម ៤.៥០០ ដុង ក្រោយពីទូទាត់រួចស្រេចនៅចំណេញជាង ៨ លានដុង។ “នេះជាឆ្នាំដំបូងដែលខ្ញុំដាំឪឡឹកបានផលនិងលក់បានថ្លៃ ម្ល៉ោះហើយរកបានប្រាក់ចំណូលគ្រាន់បើ”។

បងស្រីហឿង ថែទាំដំណាំឪឡឹក១កុង ដែលត្រៀមប្រមូលផល។

ចំណែកបងស្រី លីធីថាវ ខុសពីបងស្រីហឿង នៅឃុំថាញភូ ឱ្យដឹង៖ “ឆ្នាំនេះខ្ញុំដាំពោតបារាំង ១ កុងលើដីស្រែ ផ្តល់ទិន្នផលខ្ពស់បង្គួរ។ ពោតបារាំងងាយស្រួលដាំនិងថែទាំគ្រាន់តែស្រោចទឹកឱ្យបានគ្រប់គ្រាន់ ដាក់ជី DAP និង URE គ្រប់ល្មម នោះដំណាំនឹងលូតលាស់ល្អនិងចេញផ្លែច្រើន។ ឥឡូវដី ១ កុង ខ្ញុំប្រមូលផលពោតបារាំងបានពី ៨០ - ១៥០ គីឡូក្រាម/ថ្ងៃ លក់ដោយតម្លៃពី ៦.០០០ - ៨.០០០ ដុង/គីឡូក្រាម។ នេះជាប្រភេទដំណាំមិនសូវមានជំងឺ ហើយមានរយៈពេលប្រមូលផលវែងនិងមិនសូវបង់កម្លាំងថែទាំ”។ ក្រោយពីប្រមូលផលស្រូវរដូវទី ២ រួច បងស្រីថាវ ក៏បានដំឡើងទុយោក្បាលផ្សែងទឹកសម្រាប់ស្រោចស្រពលើដីស្រែ ចុះពូជហើយ ត្រូវស្រោចទឹកពីរដងក្នុងមួយថ្ងៃ។ កាលដំណាំនៅតូច បងស្រីប្រើប្រាស់ជី URE និង DAP ហេតុនោះក្រោយពីដាំជាង២ខែ ក៏ចាប់ផ្តើមប្រមូលផល។ បច្ចុប្បន្ន បងស្រីប្រមូលផលពោតបារាំងរៀងរាល់ថ្ងៃ ហើយក្រោយពីប្រមូលផលពី ២-៤ លើក គាត់ដាក់ជី URE ម្តង (ដាក់ជី URE ប្រមាណ ១៥ គីឡូក្រាម/ដង) ម្ល៉ោះហើយដំណាំមានពណ៌បៃតងល្អ និងផ្តល់ផ្លែប្រមូលផលជាបន្តបន្ទាប់។

តាមប្រសាសន៍លោក ភូវៀតបេន អនុប្រធានគណៈកម្មាធិការប្រជាជនឃុំថាញ់ភូ អនុវត្តផែនការបង្ការ ទប់ស្កាត់កង្វះទឹកនិងជ្រាបទឹកប្រៃក្នុងរដូវប្រាំងឆ្នាំ ២០២៣ - ២០២៤ កម្មាភិបាលឃុំតែងតាមដានការប្រែប្រួលស្ថានភាពជ្រាបទឹកប្រៃ ធ្វើបច្ចុប្បន្នភាពព័ត៌មានអំពីទិន្នន័យនៃទឹកប្រៃនៅតាមទន្លេនិងប្រឡាយ ដើម្បីម្ចាស់ការទប់ស្កាត់និងតទល់។ ទន្ទឹមនឹងនោះ ក្រើនរំលឹកដល់កសិករមិនឱ្យធ្វើស្រូវរដូវទី ៣ តែងាកមកដាំដំណាំរួមផ្សំនៅលើកដីស្រែវិញ ដូចជា៖ ឪឡឹក ពោតបារាំង ល្ពៅ ត្រឡាច ពោត ។ល។ នាំមកនូវប្រសិទ្ធភាពខ្ពស់ ជួយកសិករបង្កើនប្រាក់ចំណូលបន្ថែម លំនឹងជីវភាពនៅក្នុងរដូវប្រាំង៕

យ្វីអាញ-វិមាន

ចែករំលែកអត្ថបទ

ពាក្យគន្លឹះ