សុខភាព - អប់រំ អប់រំ

06/11/2023 - 17:13

អាងយ៉ាង យកចិត្តទុកដាក់អភិវឌ្ឍអប់រំនិងបណ្តុះបណ្តាលនៅតំបន់ជនរួមជាតិភាគតិច

ជនរួមជាតិភាគតិចនៅខេត្តអាងយ៉ាង ស្រូបអត្រា៥,២% (ភាគច្រើនជាជនរួមជាតិខ្មែរ) នៃចំនួនប្រជាជនទូទាំងខេត្ត។ ហេតុនោះ ខេត្តអាងយ៉ាង តែងយកចិត្តទុកដាក់អភិវឌ្ឍអប់រំនិងបណ្តុះបណ្តាលនៅតំបន់ជនរួមជាតិភាគតិច បំផុតគឺតំបន់ជនរួមជាតិខ្មែរ។

ម៉ោងអនុវត្តជាក់ស្តែងនៅសាលាមធ្យមសិក្សាវិជ្ជាជីវៈជនជាតិអន្តេវាសិកអាងយ៉ាង។

យោងតាមគណៈកម្មាធិការប្រជាជនខេត្តអាងយ៉ាង បច្ចុប្បន្ន ទូទាំងខេត្តមានសាលាជនជាតិអន្តេវាសិកចំនួន៣។ ក្នុងនោះ វិទ្យាល័យជនជាតិអន្តេវាសិកអាងយ៉ាង មានទីតាំងនៅក្រុងចូវដុក អនុវិទ្យាល័យជនជាតិអន្តេវាសិកទ្រីតូង មានទីតាំងនៅស្រុកទ្រីតូងនិងអនុវិទ្យាល័យជនជាតិអន្តេវាសិកទិញបៀង មានទីតាំងនៅស្រុកទិញបៀង។ ក្រៅពីនោះ ខេត្តនៅមានសាលាមធ្យមសិក្សាវិជ្ជាជីវៈជនជាតិអន្តេវាសិកអាងយ៉ាង មានទីតាំងនៅស្រុកទ្រីតូង។ ការបង្រៀននិងរៀនភាសាជនជាតិភាគតិច ត្រូវបានផ្នែកជាប់ពាក់ព័ន្ធ យកចិត្តទុកដាក់ផ្សព្វផ្សាយអនុវត្ត ក្នុងនោះ ការបង្រៀននិងរៀនភាសាខ្មែរ បានរៀបចំនៅតាមសាលាជនជាតិអន្តេវាសិកទាំង៣ និងនៅតាមសាលាបឋមសិក្សា អនុវិទ្យាល័យនៅលើភូមិសាស្រ្តស្រុកទ្រីតូង និងទីរួមខេត្តទិញបៀង។ ពិសេស នៅកន្លែងមួយចំនួនរបស់ស្រុកទ្រីតូង នៅទាំងបានបើកថ្នាក់បង្រៀនអក្សរខ្មែរនៅតាមវត្តអារាមក្នុងរដូវវិស្សមកាលជារៀងរាល់ឆ្នាំទៀតផង។

លោកត្រឹងត្វឹងខាញ់ នាយករងមន្ទីរអប់រំនិងបណ្តុះបណ្តាលខេត្តអាងយ៉ាង ឱ្យដឹង៖ ផ្នែកអប់រំមានភាពម៉ឺងម៉ាត់ក្នុងការផ្សព្វផ្សាយនិងបង្កការឯកភាពនៅភូមិភាគ សាលារៀននានា។ល។ អំពីគោលការណ៍ គោលនយោបាយ អប់រំនិងបណ្តុះបណ្តាលតំបន់ជនរួមជាតិភាគតិច។ ផ្តើមពីនោះ បានរួមចំណែកកែលម្អការយល់ដឹងរបស់កម្មាភិបាលគ្រប់គ្រង និងគ្រូបង្រៀនអំពីការលើកកម្ពស់គុណភាពអប់រំនិងបណ្តុះបណ្តាលក្នុងតំបន់ជនរួមជាតិភាគតិច។ ជាពិសេស អង្គភាពនានាបានអនុវត្តម៉ឺងម៉ាត់នូវការផ្លាស់ថ្មីខ្លឹមសារ កម្មវិធីនិងវិធីសាស្រ្តបង្រៀន; ដោយបង្រៀនមានការបែងចែក ផ្គួបបញ្ចូលនិងរួមបញ្ចូលនូវខ្លឹមសារតាមសេចក្តីកំណត់របស់ផ្នែកអប់រំ។ ទន្ទឹមនឹងនោះ នៅតាមបណ្ណាល័យរបស់សាលាដែលមានបើកថ្នាក់បង្រៀន ភាសាជនជាតិភាគតិចនៅលើភូមិសាស្រ្តខេត្ត សុទ្ធតែបានផ្គត់ផ្គង់សៀវភៅ កាសែត ដើម្បីគ្រូបង្រៀនមានឯកសារយោងស្រាវជ្រាវ និងបង្ហាត់បង្រៀនភាសាជនជាតិភាគតិចផងដែរ។ លោកគ្រូអ្នកគ្រូបង្រៀនភាសាជនជាតិភាគតិច ណែនាំសិស្សស្រាវជ្រាវលើវិស័យវប្បធម៌ជនជាតិ; ឧទ្ទេសនាមរបៀបសូត្រកំណាព្យ ទម្រង់កំណាព្យខ្មែរ និងចាម។ល។ នៅក្នុងឯកសារបង្រៀន។ ផ្តើមពីនោះ ធ្វើឱ្យសិស្សយល់កាន់តែច្បាស់អំពីវប្បធម៌ ប្រពៃណី ទំនៀមទម្លាប់របស់ជនជាតិខ្លួន។ ជាពិសេសទៀត រៀងរាល់ឆ្នាំ គ្រូបង្រៀនភាសាខ្មែរ តែងរៀបចំសិក្សាស្រាវជ្រាវ សរសេរនិងអនុវត្តគំនិតច្នៃប្រតិដ្ឋ បទពិសោធន៍ លើវិស័យអប់រំជនជាតិ វិធីសាស្រ្តបង្រៀននិងរៀនវិញ្ញាសាភាសាខ្មែរ និងបានក្រុមប្រឹក្សាពិនិត្យសម្រេចនូវគំនិតច្នៃប្រតិដ្ឋ បទពិសោធន៍ ថ្នាក់ស្រុក និងខេត្តទទួលស្គាល់។ ឆ្លងតាមរយៈនោះ រួមចំណែកបង្កើតប្រភពឯកសារស្រាវជ្រាវសម្រាប់គ្រូបង្រៀន និងសិស្សានុសិស្ស ឱ្យមានវិធីសាស្រ្តបង្រៀននិងរៀនកាន់តែល្អប្រសើរ។ “នេះក៏ជាមូលហេតុដ៏សំខាន់ ដើម្បីខេត្តអាងយ៉ាងអនុវត្តសម្រេចនូវការកៀរគរកុមារជនជាតិភាគតិចចូលរៀនត្រូវតាមកម្រិតអាយុនៅកម្រិតបឋមសិក្សា និងសិស្សជនជាតិភាគតិចសម្រេចកម្មវិធីសិក្សាគ្រប់កម្រិត។ សំខាន់ជាងគេ គឺអតុល្យភាពខាងគុណភាពសិក្សារបស់សិស្សនៅតំបន់ជនជាតិភាគតិចក្នុងអំឡុងប៉ុន្មានឆ្នាំកន្លងនៅខេត្តអាងយ៉ាង សន្សឹមៗបានកាត់បន្ថយគម្លាត” លោកត្រឹងត្វឹងខាញ់ បានឱ្យដឹងដូច្នេះ។

ថ្វីដ្បិតដូច្នេះក៏ដោយ តាមប្រសាសន៍លោកត្រឹងត្វឹងខាញ់ ខេត្តមិនទាន់ពង្រីកបានទម្រង់បង្រៀនភាសាជនជាតិភាគតិចនៅតាមសាលាបឋមសិក្សា និងអនុវិទ្យាល័យដទៃទៀតនៅតំបន់ដែលមានសិស្សជនជាតិភាគតិចច្រើនកុះករនៅឡើយ ដោយសារខ្វះគ្រូបង្រៀន។ គ្រូបង្រៀនភាសាជនជាតិភាគតិច (ពិសេស គឺភាសាចាម) មិនទាន់បានបញ្ជូនទៅបណ្តុះបណ្តាលឬបំពាក់បំប៉ន ដើម្បីឆ្លើយតបនឹងតម្រូវការធ្វើឱ្យសុក្រឹតតាមសេចក្តីកំណត់នៅឡើយ។ ព្រោះហេតុនោះ “ក្រសួងអប់រំនិងបណ្តុះបណ្តាល គប្បី៖ មានគោលនយោបាយឧបត្ថម្ភថវិកាដល់ព្រះសង្ឃ គណៈកម្មការវិហារឥស្លាម លោកគ្រូ អ្នកគ្រូ ។ល។ ក៏ដូចជាផ្គត់ផ្គង់សៀវភៅនិងឧបករណ៍សិក្សានៅតាមវត្តអារាម និងវិហារឥស្លាមដែលមានបង្រៀនភាសាជនជាតិភាគតិច។ មានគោលនយោបាយធ្វើឱ្យសុក្រឹតគ្រូបង្រៀនភាសាជនជាតិភាគតិចសមស្របជាមួយនឹងលក្ខណៈជាក់ស្តែងរបស់ភូមិភាគ ដើម្បីឆ្លើយតបទៅនឹងតម្រូវការកាន់តែខ្ពស់របស់សង្គម” លោកត្រឹងត្វឹងខាញ់ បានលើកជាសំណើដូច្នេះ៕

ថាញឡុង - វិមាន

ចែករំលែកអត្ថបទ

ពាក្យគន្លឹះ