មហាសាមគ្គីជនជាតិ គំរូក្នុងសហគមន៍

18/09/2023 - 14:06

អ្នកអស់ពីចិត្តដើម្បីភូមិស្រុក

លោកឡឹមងៀង នៅភូមិយង់ចាក ឃុំលីវទូ ស្រុកត្រឹងដេ ខេត្តសុកត្រាំង ជាអ្នកមានប្រជាប្រិយគំរូក្នុងការចលនា ជនរួមជាតិខ្មែរគិតគូរអភិវឌ្ឍសេដ្ឋកិច្ច និងកសាងតំបន់ជនបទភ្លឺ បៃតង ជ្រះ ស្អាត សុវត្ថិភាព។

លោកឡឹមងៀង ( កណ្តាល) រួមជាមួយអង្គការមហាជនភូមិចុះទៅដល់ផ្ទះចលនាមាមីងខ្មែរ
ព្រួតដៃកសាងផ្លូវជនបទថ្មីគំរូ។

លោកឡឹមងៀង ធ្លាប់ជាអ្នកបួសរៀន ម្ល៉ោះហើយគំរូក្នុងការអភិវឌ្ឍសេដ្ឋកិច្ចគ្រួសារមានសណ្ដាប់ធ្នាប់ កូនចៅចេះស្ដាប់បង្គាប់ដំបូន្មានចាស់ទុំ អ្នកភូមិផងរបងជាមួយ និងអនុវត្តល្អបទប្បញ្ញត្តិច្បាប់ លោកងៀង ឱ្យដឹង៖ “កាលនោះ ប្ដីប្រពន្ធខ្ញុំ រៀបការរួចមានដីស្រែតែពីរបីកុង រស់នៅប្រិតសំចៃ រួមគ្នាធ្វើស្រែ ដាំដំណាំរួមផ្សំ ចិញ្ចឹមជ្រូកគួបផ្សំនឹងបិតស្រាលក់ផង ម្ល៉ោះហើយ សន្សែសន្សំជួលដីនិងទិញបានដីស្រែ។ បច្ចុប្បន្ន គ្រួសារបានធូរធារ កូនៗមានជីវភាពលំនឹង ហេតុនោះ ខ្ញុំរិះរកវិធីជួយឧបត្ថម្ភ ចលនាមាមីងភូមិស្រុកគិតគូរអភិវឌ្ឍសេដ្ឋកិច្ច ឈានឡើងចាកផុតភាពក្រីក្រ”។

ក្នុងនាមជាអ្នកមានប្រជាប្រិយ នៅពេលភូមិភាគបំផុសចលនាកសាងផ្លូវជនបទថ្មីគំរូ លោកឡឹមងៀង ចលនាមាមីងរួមវិភាគទានទឹកប្រាក់ កម្លាំងពលកម្ម បរិច្ចាគដី សម្ភារៈ៘ ដើម្បីធ្វើផ្លូវ ដាំផ្កាដំឡើងអំពូលភ្លើងផ្លូវ និងកាម៉េរាសន្តិសុខ៘ លោកផាមហ្វាងត្វឹងអាញ ទទួលបន្ទុកជនបទថ្មីឃុំលីវទូ ឱ្យដឹង៖ “ចំណុចល្អរបស់លោកឡឹមងៀង ក្នុងការចលនាមាមីងខ្មែរ គឺការពន្យល់វែកញែកពីផលប្រយោជន៍សម្រាប់ការអភិវឌ្ឍតំបន់ជនបទ ម្ល៉ោះហើយ គ្រប់គ្នាតែងយល់ស្របនិងគាំទ្រ។ ឥឡូវនេះ នៅតាមដងផ្លូវជនបទក្នុងភូមិស្រុកភ្លឺចិញ្ចាច បៃតង ជ្រះ ស្អាត និងសុខសាន្ត”។

ដោយឃើញមាមីងខ្មែរភូមិយង់ចាក នៅក្រលំបាកច្រើន ម្ល៉ោះហើយលោកឡឹមងៀង បានសហការជាមួយរដ្ឋអំណាចភូមិភាគចលនា មាមីងគ្រប់អាយុពលកម្មឱ្យទៅរៀនរបរ រួចឧទ្ទេសនាមឱ្យចូលធ្វើជាកម្មករក្នុងមណ្ឌល ចិញ្ចឹមបង្គាបច្ចេកវិទ្យាខ្ពស់ក្នុងឃុំ ធ្វើការក្នុងកសិដ្ឋាន ឬក្រុមហ៊ុនក្នុងនិងក្រៅខេត្តដើម្បីបង្កើនប្រាក់ចំណូល។ ផ្តើមពីនោះ កូនចៅភាគច្រើនទៅធ្វើការរកបានប្រាក់ចំណូលជួយគ្រួសារលំនឹងជីវភាព។ តួយ៉ាងដូចបងស្រីឡឹមធីសាល ស្តាប់តាមលោកឡឹមងៀង បានឱ្យកូន២នាក់ ទៅធ្វើការក្នុងកសិដ្ឋានចិញ្ចឹមជ្រូកនៅខេត្តឡុងអាង សព្វថ្ងៃមានលុយផ្ញើមកសង់ផ្ទះឥដ្ឋ ទិញគោនិងពពែចិញ្ចឹម។ លោកឡឹមងៀង ឱ្យដឹង៖ “សព្វថ្ងៃ មានអ្នកខ្លះនៅទីក្រុងបាត់បង់អាជីព វិលត្រឡប់មកស្រុក ធ្វើការនៅមណ្ឌលចិញ្ចឹមបង្គាបច្ចេកវិទ្យាខ្ពស់ រកបានប្រាក់ចំណូលលំនឹង ជីវភាពបានល្អប្រសើរ។ មធ្យមភាគក្នុងមួយរដូវចិញ្ចឹមបង្គា កម្មករអាចរកបានប្រាក់ចំណូលពី៣០លានដុងឡើងទៅ”។

តាមប្រសាសន៍លោកឡេហុងវ៉ី ប្រធានភូមិយង់ចាក ដោយប្រជាប្រិយនិងការរួមចំណែករបស់លោកឡឹមងៀង ទើបតំបន់ជនបទក្លាយជាភ្លឺចិញ្ចាច បៃតង ជ្រះ ស្អាត; ក្នុងភូមិពលករមានការងារធ្វើ រកបានប្រាក់ចំណូលលំនឹងជាង៧០%; អត្រាគ្រួសារក្រីកាត់បន្ថយនៅតែ ២,៥% និងតំបន់ជនបទក្លាយជាកន្លែងដែលចង់រស់នៅ៕

យ្វីអាញ-លីសៀ

ចែករំលែកអត្ថបទ

ពាក្យគន្លឹះ