សន្តិសុខ - ការពារប្រទេស ការពារប្រទេស

05/09/2023 - 16:40

បន្ដក្តីស្រមៃដល់សិស្សក្រីក្រនៅតំបន់ព្រំដែនសមុទ្រ

កម្មវិធី “ជំរុញដំណើរប្អូនទៅសាលា” របស់កងទ័ពការពារព្រំដែនខេត្តសុកត្រាំង អនុវត្តចាប់ពីឆ្នាំ២០១៦ បានជួយដល់សិស្សក្រីក្រជាច្រើន ពិសេសគឺសិស្សជនជាតិខ្មែរមានលក្ខណសម្បត្តិបន្តការសិក្សា។

ថ្នាក់ដឹកនាំកងទ័ពការពារព្រំដែនខេត្ត ឧបត្ថម្ភថវិកាដល់សិស្សនៅតំបន់ព្រំដែនសមុទ្រ។

កម្មាភិបាលប៉ុស្តិ៍ការពារព្រំដែនត្រុងប៊ិញ កងទ័ពការពារព្រំដែនខេត្តសុកត្រាំង អញ្ជើញមកសុខទុក្ខនិងលើកទឹកចិត្តប្អូនថាច់ធីមីត្វៀង។

អនុវត្តផែនការរបស់បញ្ជាការដ្ឋានកងទ័ពការពារព្រំដែន ស្តីពីការអនុវត្ត គម្រោង “កម្មាភិបាល យុទ្ធជនកងទ័ពជំរុញដំណើរប្អូនទៅសាលា” ដំណាក់កាល២០២១-២០៣០ កងទ័ពការពារព្រំដែនខេត្តសុកត្រាំង បានសហការជាមួយនឹងរដ្ឋអំណាចភូមិភាគ ពិនិត្យសិស្សដែលមានស្ថានភាពលំបាកនៅតំបន់ព្រំដែនសមុទ្រ ដើម្បីស្នើថ្នាក់លើជួយឧបត្ថម្ភ។ តាមរយៈនោះ ឆ្នាំ២០២៣ កងទ័ពការពារព្រំដែនខេត្ត បានទទួលឧបត្ថម្ភសិស្សជនជាតិខ្មែរ ១១នាក់ ដែលមានស្ថានភាពលំបាកខ្លាំង កំព្រាឪពុក ម្តាយ កម្រិតឧបត្ថម្ភអាហារូបករណ៍ក្នុងមួយឆ្នាំសិក្សា៧.៣៦០.០០០ដុងក្នុងសិស្សម្នាក់។ នេះគឺជាសកម្មភាពសំដៅជួយចែករំលែកការលំបាកជាមួយគ្រួសារ ព្រមទាំងលើកទឹកចិត្តប្អូនៗឱ្យមានទំនុកចិត្តនិងកម្លាំងចិត្ត បន្តបំពេញក្តីស្រមៃ។ ប្អូនថាច់ធីមីត្វៀង សិស្សសាលាបឋមសិក្សាត្រុងប៊ិញ B ស្រុកត្រឹងដេ មានជីវភាពលំបាកខ្លាំង ម្តាយស្លាប់ដោយសារជំងឺ COVID-១៩ ពីរនាក់ឪកូនរស់នៅពឹងផ្ទះពូ។ ប្អូនត្វៀង ឱ្យដឹង៖ “ឪពុកទៅធ្វើការឈ្នួលគ្រប់តែផ្គត់ផ្គង់ជីវភាពប្រចាំថ្ងៃ ដូច្នេះ បានពូៗយុទ្ធជនការពារព្រំដែនទទួលឧបត្ថម្ភអាហារូបករណ៍ប្អូនសប្បាយចិត្តខ្លាំងណាស់។ ឆ្នាំនេះ ប្អូនរៀនថ្នាក់ទី៥ ប្អូនសន្យានឹងខំប្រឹងរៀនសូត្រឱ្យបានល្អ ដើម្បីមិនឱ្យពូៗយុទ្ធជនការពារព្រំដែននិងលោកគ្រូអ្នកគ្រូដែលជួយឧបត្ថម្ភខកបំណងឡើយ”។ ចំណែកប្អូនថាច់កឹមវ៉ាន់ សិស្សសាលាអនុវិទ្យាល័យ វិទ្យាល័យឡាយហ្វា ទីរួមខេត្តវិញចូវ ជាសិស្សជនជាតិខ្មែរ រៀនសម្រេចនិទ្ទេសពូកែ១០ឆ្នាំបន្តបន្ទាប់។ ប្អូនកឹមវ៉ាន់ ឱ្យដឹង៖ “ម្តាយឈឺដេកមួយកន្លែង សេដ្ឋកិច្ចគ្រួសារពឹងផ្អែកលើប្រាក់ចំណូលពីការស៊ីឈ្នួលរបស់ឪពុក។ ដើមឆ្នាំសិក្សាបានពូៗយុទ្ធជនការពារព្រំដែន ឧបត្ថម្ភអាហារូបករណ៍ទឹកប្រាក់៧.៣៦០.០០០ដុង/ឆ្នាំ ដើម្បីប្អូនមានលក្ខណៈទិញសម្លៀកបំពាក់ សៀវភៅ ប៊ិកសម្រាប់ទៅសាលា ជួយសម្រាលបន្ទុកដល់គ្រួសារ។ អាហារូបករណ៍នេះ ផ្តល់កម្លាំងចិត្តដ៏ធំធេងដើម្បីប្អូនរៀនសូត្របានល្អ និងមានទំនុកចិត្តខ្ពស់បំពេញក្តីស្រមៃចូលរៀនមហាវិទ្យាល័យ”។

តាមប្រសាសន៍លោកវរសេនីយ៍ឯក ង្វៀងត្រេវម៉ឺន ស្នងការនយោបាយនៃកងទ័ពការពារព្រំដែនខេត្ត គម្រោងមានអត្ថន័យជាក់ស្តែងក្នុងជីវភាព រីកសាយភាយសេចក្តីស្រឡាញ់ ព្រមទាំងរឹតបន្តឹងទំនាក់ទំនងជិតស្និទ្ធរវាងកងទ័ព និងប្រជាជនក្នុងការរក្សាសន្តិសុខសណ្តាប់ធ្នាប់នៅតំបន់ព្រំដែនសមុទ្រ។ ទន្ទឹមនឹងនោះ ក៏ជាការលើកទឹកចិត្តដ៏ធំធេង បន្តក្តីស្រមៃដល់សិស្សជនជាតិខ្មែរដែលមានជីវភាពលំបាក ឈានឡើងក្នុងការសិក្សាក្លាយជាអ្នកមានប្រយោជន៍សម្រាប់សង្គម៕

យ្វីអាញ-មុនី

ចែករំលែកអត្ថបទ

ពាក្យគន្លឹះ