គោលនយោបាយ -ការរស់នៅ គោលនយោបាយ

31/07/2023 - 16:46

វិញឡុង ផ្តុំកម្លាំងអនុវត្តល្អនូវគោលនយោបាយអភិវឌ្ឍសេដ្ឋកិច្ចតំបន់ជនជាតិភាគតិច

ខេត្តវិញឡុង កំពុងផ្សព្វផ្សាយអនុវត្តមានប្រសិទ្ធភាពនូវកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិច ដំណាក់កាល I (២០២១-២០២៥) ម្ល៉ោះហើយ អត្រាគ្រួសារក្រីក្រជនជាតិភាគតិច កាត់បន្ថយបន្តិចម្តងៗ។

អាស្រ័យដោយកម្មវិធី គម្រោងផ្សេងៗ ទើបហេដ្ឋារចនាសម្ព័ន្ធតំបន់ជនរួមជាតិភាគតិចនៅវិញឡុង កាន់តែមានភាពសមរម្យ។

តាមរបាយការណ៍របស់គណៈកម្មាធិការរណសិរ្សមាតុភូមិវៀតណាមខេត្តវិញឡុង គិតដោយឡែកក្នុងឆ្នាំ២០២២ ខណៈពេលអនុវត្តនូវកម្មវិធីទិសដៅជាតិអភិវឌ្ឍសេដ្ឋកិច្ច-សង្គម តំបន់ជនរួមជាតិភាគតិច ដំណាក់កាល I (២០២១-២០២៥) (ហៅកាត់ថា កម្មវិធី) ខេត្តបានផ្សព្វផ្សាយនូវគម្រោងជាច្រើន។ តួយ៉ាងដូច៖ គម្រោងដោះស្រាយស្ថានភាពខ្វះដីសង់ផ្ទះ ដីបង្កបង្កើនផល លំនៅឋាន ទឹកស្អាតប្រើប្រាស់ និងផ្គត់ផ្គង់ទឹកស្អាតប្រើប្រាស់ដល់គ្រួសារជនជាតិភាគតិចចំនួន២៣៩ ដែលរស់នៅរាត់រាយនៅតាមភូមិលំបាកខ្លាំង; បើកការដ្ឋានសាងសង់សំណង់ហេដ្ឋារចនាសម្ព័ន្ធចាំបាច់ចំនួន៨ បម្រើការផលិត ប្រជុំជីវភាពតំបន់ជនរួមជាតិភាគតិចនៅឃុំតឹងមី និងត្រាកូង ស្រុកត្រាអូង គិតជាតម្លៃទឹកប្រាក់សរុបជាង៨,៣ពាន់លានដុង; គម្រោងអភិវឌ្ឍការអប់រំ បង្កើនគុណភាពប្រភពធនធានមនុស្ស គិតជាតម្លៃទឹកប្រាក់សរុប៥,៥ពាន់លានដុង។ ឆ្នាំ២០២២ ដើម្បីបង្កើតស្នាដៃអំណរខួបអនុស្សាវរីយ៍១០០ឆ្នាំ ថ្ងៃកំណើតអតីតនាយករដ្ឋមន្ត្រីនៃរដ្ឋាភិបាល វ៉វ៉ាន់កៀក និងបំពេញបំណងរបស់លោក គឺលុបបំបាត់ផ្ទះបណ្តោះអាសន្នជូនគ្រួសារក្រីក្រ ខេត្តវិញឡុងបានអំពាវនាវចលនាសប្បុរសជនចូលរួមវិភាគទាន និងផ្សព្វផ្សាយសាងសង់ថ្មីផ្ទះមហាសាមគ្គីបាន២.២២១ ខ្នង ក្នុងនោះ ផ្ទះមហាសាមគ្គី៣០៧ខ្នង ផ្តល់ជូនគ្រួសារក្រីក្រ គ្រួសារប្រកៀកបន្ទាត់ក្រ ជាជនជាតិខ្មែរ។

លោកង្វៀងមិញថៀង អនុប្រធានគណៈជនជាតិខេត្តវិញឡុង ឱ្យដឹងបន្ថែម៖ អនុវត្តកម្មវិធី ខេត្តវិញឡុងបានជ្រើសយកខ្លឹមសារលុបបំបាត់ផ្ទះបណ្តោះអាសន្នជូនគ្រួសារក្រីក្រ គ្រួសារប្រកៀកបន្ទាត់ក្រ ក្នុងតំបន់ជនរួមជាតិភាគតិច គឺជាភារកិច្ចដ៏សំខាន់មួយ។ ក្នុងឆ្នាំ២០២២ ជាសារវន្តខេត្តបានអនុវត្តសម្រេចការលុបបំបាត់ផ្ទះបណ្តោះអាសន្ន ជូនគ្រួសារក្រីក្រ គ្រួសារប្រកៀកបន្ទាត់ក្រលើភូមិសាស្ត្រខេត្ត។ ខណៈពេល “មានផ្ទះសម្បែងនឹងធឹង” គ្រួសារជនជាតិភាគតិចជាច្រើន មិនអល់អែកក្នុងការកែប្រែចម្ការចាស់ ពង្រីកនូវទម្រង់ធ្វើការរកស៊ីដើម្បីឈានឡើងចាកផុតពីភាពក្រីក្រ។ លោកថាច់តឹម លេខាសាខាបក្សនឹងជាប្រធានភូមិតាធាយ ឃុំតឹងមី ស្រុកត្រាអូង ឱ្យដឹង៖ “អាស្រ័យប្រភពទុនអនុគ្រោះរបស់រដ្ឋ បានជាគ្រួសារខ្មែរក្រីក្រ ជាច្រើនក្នុងភូមិមិនរារែកជួលដីដាំដំណាំរួមផ្សំ កែប្រែចម្ការចាស់ លក់ដូរជាលក្ខណៈគ្រួសារ ម្ល៉ោះហើយបានឈានឡើងចាកផុតពីភាពក្រីក្រ។ ខណៈបានចាកផុតភាពក្រីក្រ ជនរួមជាតិខ្មែរថែមទាំងព្រួតដៃរួមកម្លាំងជាមួយភូមិភាគ កសាងភូមិស្រុកកាន់តែសមរម្យ ស្រស់ស្អាត”៕

ហាថាញ-លីសៀ

ចែករំលែកអត្ថបទ

ពាក្យគន្លឹះ